Go Back

Isaia Chapter 1

• 1. MAYA nĩmo maũndũ marĩa maaguũrĩirio Isaia, mũrũ wa Amozu, makoniĩ Judea na Jerusalemu, matukũ marĩa Uzia, na Jothamu, na Ahazu, na Hezekia, maathamakaga Judea.
• 2. Atĩrĩrĩ, inyuĩ matu mairũ, ta thikĩrĩriai, o nawe thĩ-rĩ, ta tega matũ, nĩ gũkorũo Jehova nĩwe ũraaria. Niĩ-rĩ, ndũire ’heaga ciana irio cia gũcikũria, na ngacirera; nacio ikanema.
• 3. Ndegwa nĩyũĩ mwene yo, o na ndigiri ĩkamenya mũharatĩ wa mũmĩathi; no Isiraeli ndarĩ ũndũ oĩ; andũ akwa matiĩcũranagia wega maũndũ.
• 4. Hĩ! Kaĩ mwĩ rũrĩrĩ rũĩhagia-ĩ! Mwĩ kĩrĩndĩ gĩtitikanĩtie waganu, na rũruka rũa andũ eki naĩ; mwĩ ciana itũire ithũkagia maũndũ. Nĩmatirikĩte Jehova, makamena Ũcio Mũtheru wa Isiraeli, makamũhutatĩra, magacoka na thutha.
• 5. Nĩ kĩ gĩgĩtũmaga mwende kũhũrũo, mũgĩkĩrĩrĩria kũrema? Mũtwe wothe nĩ mũrũaru, na ngoro yothe ĩkaringĩka.
• 6. Kwarũma ikinya nginya o mũtwe-rĩ, hatirĩ handũ hagima; no nguraro theri, na mĩtunda, na ironda cia ndĩĩra; nacio ti hihire, kana ikohwo, o na kana ikororoio na maguta.
• 7. Bũrũri wanyu nĩ mũkiru ihooru, namo matũũra manyu magacinwo na mwaki; thĩ yanyu nĩĩraninwo nĩ andũ a ndũrĩrĩ o mũkĩonaga, ĩgakira ihooru o ta ĩng’aũranĩtio nĩ andũ a kũngĩ.
• 8. Nake mwarĩ wa Zayuni atigĩtwo wiki o ta gĩthũnũ kĩrĩ mũgũnda wa mĩthabibu, o na kana ta kanyũmba karĩ mũgũnda wa marenge, kana itũũra rĩthiũrũrũkĩirio nĩ thũ ciendete kũrĩtunyana.
• 9. Guca Jehova, Mũnene wa Ita, aatũtigĩirie tũtigi tũnini mũno twa andũ-rĩ, tũngĩtuĩkĩte ta Sodomu, na tũkahaanana na Gomora.
• 10. Ta iguai ndũmĩrĩri ya Jehova, inyuĩ mwathanaga Sodomu, na mũtege matũ mũigue kĩrĩra kĩa Ngai witũ, inyuĩ andũ a Gomora.
• 11. Magongona macio mũndutagĩra maingĩ-rĩ, nĩ ma kĩ? Ũguo nĩguo Jehova ekũũria. Nĩnjiganĩtwo nĩ mahaki ma njino ma ndũrũme, o na ngaiganwo nĩ maguta ma nyamũ cia gĩcegũ; ndikenagĩra thakame ya ndegwa, kana ya tũtũrũme, o na kana ya thenge.
• 12. Nũ ũmwathĩrĩirie gwĩkaga ũguo rĩrĩa mũũkĩte kwĩonania mbere yakwa, mũkĩrangaga nja cia nyũmba-inĩ yakwa?
• 13. Tigagai gũcoka kũrehe mahaki ma tũhũ; ũbumba no kĩndũ kĩa magigi harĩ niĩ, na mĩcemanio yanyu ya karũgamo-inĩ ka mweri, na ya mũthenya wa thabatũ, o na ya ciathĩ iria njathane, ndingĩhotana nayo; no cia waganu itũngano cianyu icio nyamũre.
• 14. Ngoro yakwa nĩĩthũire mĩcemanio yanyu ya karũgamo-inĩ ka mweri, o na ciathĩ cianyu iria njathane. Maũndũ macio nĩma’thĩnagia; ndingĩmakirĩrĩria, nĩ ũndũ nĩma’nogagia.
• 15. Hĩndĩ ĩrĩa mũrĩambararagia moko manyu na igũrũ, nĩndĩrĩmũhithaga maitho makwa ndige kũmuona; ĩĩ, ti-itherũ, hĩndĩ ĩrĩa mũrĩhoyaga mahoya maingĩ, ndirĩmũiguaga; amu moko manyu maiyũrĩtwo nĩ thakame.
• 16. Wĩthambei mwĩtherie, mũgĩthengie ũũru wa ciĩko cianyu, ndige kũwona; tiganai na ũũru,
• 17. mwĩrute gwĩkaga wega; thingatagai cira wa kĩhooto, na mũherithagie arĩa mahinyanagĩrĩria; tuagai cira wa ciana cia ngoriai na kĩhooto, na mũthaithanagĩre mũtumia wa ndigwa.
• 18. Rĩu-rĩ, gĩũkei tũcire; ũguo nĩguo Jehova ekuuga. O na harĩa mehia manyu matunĩhĩte ta gakarakũ-rĩ, nĩmagathera o ta ira; o na maatuĩka matunĩhĩte o ta thakame, nĩmakerũha o ta guoya wa ng’ondu.
• 19. Mũngĩnjigua na mũnjathĩkagĩre, nĩmũrĩrĩaga indo ciothe iria njega cia thĩ;
• 20. no mũngĩrega mũcoke mũneme-rĩ, mũkaninwo na rũhiũ rũa njora; nĩ ũndũ nĩ kanua ka Jehova koiga ũguo.
• 21. Hĩ! Kaĩ itũũra rĩrĩa rĩĩhokeku nĩrĩtuĩkĩte ta mũmaraya-ĩ! Na nĩrĩo rĩaiyũrĩte ũtuanĩri cira na kĩhooto! Ũthingu nĩguo watũire thĩinĩ warĩo, no rĩu nĩ oragani me kuo!
• 22. Betha yaku ĩtuĩkĩte o nganga theri, o nayo ndibei yaku ĩgatukanio na maĩ.
• 23. Anene aku o nao nĩ kũrema maremete, magatuĩka a thiritũ ya aici; o mũndũ wao endaga ihaki, na akerirĩria ngukumio; andũ acio-rĩ, matituagĩra ciana cia ngoriai cira na kĩhooto, o nake mũka wa ndigwa ndangĩrekwo akinyie cira wake harĩ o.
• 24. Tondũ ũcio, Mwathani witũ, o we Jehova Mũnene wa Ita, Hoti ya Isiraeli, egũkiuga atĩrĩ, Hĩ! Nĩ kwĩaũra ngeaũra mũrigo harĩ thũ ciakwa, o na ndĩĩrĩhĩrie harĩ amuku akwa;
• 25. na nĩngakũhũgũrĩra guoko gwakwa, ngũtherie ũthirũo nĩ nganga ciaku ciothe, na kĩrĩa gĩothe wĩ nakĩo gĩtarĩ gĩtheru nĩngagĩtheria.
• 26. Na rĩrĩ, atua-cira aku ngatũma macoke gũtuĩka o ta ũrĩa maatariĩ rĩa mbere, o na arĩa makũheaga kĩrĩra matuĩke o ta ũrĩa maatariĩ kĩambĩrĩria-inĩ; nawe ũgacoka gwĩtagwo itũũra rĩa ũthingu, o itũũra rĩĩhokeku.
• 27. Na rĩrĩ, Zayuni rĩkahatũrũo na cira wa kĩhooto, o nao andũ arĩo, arĩa magakorũo macokete kuo, mahatũrũo na ũthingu.
• 28. No rĩrĩ, aagarari-watho, na ehia, makaninanĩrio hamwe, o nao andũ arĩa matirikĩte Jehova nĩ kũhukio makahukio.
• 29. Nĩ gũkorũo nĩmũgaconoka nĩ ũndũ wa mĩgandi ĩrĩa mweriragĩria, o na mũkorũo nĩ njono nĩ ũndũ wa mĩgũnda ĩrĩa mwĩthurĩire.
• 30. Nĩ ũndũ mũgatuĩka o ta mũgandi ũrĩa ũhohete mathangũ, o na ta mũgũnda ũrĩa ũtarĩ muunithĩrie maĩ.
• 31. O nake mũndũ ũrĩa wĩ na hinya agatuĩka o ta mbutha ya ũguta, na wĩra wake ũtuĩke o ta thandĩ; nĩakarĩrĩmbũkanĩrio hamwe naguo, na kwage wa kũmagiria mahĩe.

Home