Go Back

Thimo Chapter 9

• 1. MŨTUMIA ũcio ũgwĩtwo Ũũgĩ-ũrĩa-wa-ma nĩeyakĩire nyũmba, na nĩaacũhĩtie itugĩ ciake mũgwanja.
• 2. Nĩ mũthĩnju ngoima ciake, ndibei yake nĩaringĩrĩirie, na nĩarĩkĩtie gũ tandĩka metha yake.
• 3. Nĩareketie airĩtu ake, akaanĩrĩrithia itũũra-inĩ o kũndũ gũtũũgaraire mũno,
• 4. Akoiga, Mũndũ o wothe ũtarĩ mũũgĩ, nĩakerũre atonye na gũkũ! mũndũ ũrĩa wagĩte wĩcirio-rĩ, we akamwĩra,
• 5. Ũkai mũkarĩe irio ciakwa, na mũnyue ndibei ĩrĩa ningĩrĩirie!
• 6. Inyuĩ andũ aya mũtarĩ ogĩ-rĩ, tigai ũhoro wanyu, nĩguo mũtũũre, mũcoke gũthiaga na njĩra o ĩrĩa ya mbuguĩro!
• 7. Ũrĩa wa gũtaara mũtendi nĩ njono ethũgũragĩra, na wa kũrũithia mwaganu nĩegĩragĩra kĩmeni.
• 8. Tiga kũrũithia mũtendi, gũthũũra ndagagũthũũre; rũithia mũndũ mũũgĩ, nake no akwende.
• 9. Mũndũ mũũgĩ, mũtaare, na nĩekũũhĩga makĩria; mũndũ mũthingu, mũrute, na nĩekwĩongerera wĩruti.
• 10. Gwĩtigĩra Jehova nĩkuo kĩrutĩrĩrio kĩa ũũgĩ-ũrĩa-wa-ma, na kũmenya Ũrĩa Ũmwe Mũtheru nokuo kũgĩa na mbuguĩro.
• 11. Amu, nĩ ũndũ wakwa matukũ maku nĩ kuongerereka makongerereka, mĩaka yaku ya gũtũũra ĩgĩkĩrĩrĩrie.
• 12. Wakorũo wĩ mũũgĩ, ũũgĩ ũcio nĩwe mwene ũrĩgunaga, na wakorũo wĩ mũtendi-rĩ, thĩna ũcio nowe ũrĩĩkuuagĩra.
• 13. Mũndũ mũka ũrĩa kĩrimũ nĩ wa mbĩrĩrĩka, nĩ mwagu ũũgĩ o kwaga, ndarĩ ũndũ amenyete.
• 14. Nake nĩ gũikara aikaraga thĩ mũromo-inĩ wa nyũmba yake, agaikaragĩra gĩtĩ itũũra-inĩ harĩa hatũũgaraire,
• 15. Nĩguo agũtũkagĩre andũ arĩa mekũhĩtũka, arĩa megwĩthiĩra merekereire na njĩra,
• 16. Akameraga atĩrĩ, Mũndũ o wothe ũtarĩ mũũgĩ, ta nĩakerũre atonye na gũkũ! ũrĩa ningĩ wagĩte wĩcirio, we akamwĩra,
• 17. Maĩ ma ũici me mũrĩo, na irio cia kũrĩĩrũo hitho-inĩ nĩ njega!
• 18. No mũndũ ũcio ndakoragwo amenyete atĩ nĩ andũ akuũ marĩ kuo, ndoĩ atĩ ageni a mũndũ mũka ũcio marĩ o kũrĩa kũriku kwa ngoma.

Home