Go Back

Thimo Chapter 6

• 1. MŨRŨ wakwa, ũngĩgakorũo ũtuĩkĩte ithenya rĩa mũndũ wa kwanyu, ũtuĩke atĩ nĩwe wa kũmũrĩhĩra thirĩ harĩ mũndũ wa kũngĩ-rĩ;
• 2. Ũngĩkorũo ũrĩ mũtege nĩ uuge wa kanua gaku, ũgakĩgwatithio nĩ uuge ũcio wa kanua gaku-rĩ,
• 3. No wĩke atĩrĩ, mũrũ wakwa, nĩguo wĩteithũrithie, kuona nĩwĩtonyetie guoko-inĩ kwa mũndũ ũcio wa kwanyu: thiĩ, ũkenyihie, ũmũringĩrĩrie mũno akuohore.
• 4. Ndũkareke maitho maku mone toro, o na kana ũreke imone ciaku icũnge;
• 5. Wĩteithũre ta thiya moko-inĩ ma mũguĩmi, kana ta nyoni guoko-inĩ kwa mũtegi.
• 6. Thiĩ harĩ thigiriri, wee kĩgũta gĩkĩ, ũgacũranie mĩtugo yayo, nĩguo ũkĩũhĩge!
• 7. Thigiriri yo ndĩrĩ na mũthamaki, kana mũrũgamĩrĩri, kana mũmĩathi,
• 8. Na no ĩĩigagĩra mũthithũ wa irio hingo ya riũa, ĩgakĩũnganagia kandũ kayo hingo ya magetha.
• 9. Wee kĩgũta gĩkĩ, ũgũkomerera nginya rĩ? ũrĩũkĩra rĩ, ũtige toro waku?
• 10. Atĩ no wambe ũkomakome, ũcoke toro hanini; atĩ ũkũnjanie hĩ kahinda ũgĩkome!
• 11. Ũhoro ũcio-rĩ, ũgatũma ũkĩa waku ũgũkorerere ta mũitũ, ũtharĩkĩrũo nĩ ũnyamari ta arĩ mũndũ ũgwete ngo.
• 12. Mũũra-huhũ-rĩ, mũndũ wa maũndũ maaganu, nĩ ũrĩa ũceerangaga e na kanua ke ndeto hotomu.
• 13. Nĩ kuuna oinagĩra ũrĩa ũngĩ riitho, na kuoyoiya akoyoyagia makinya, na nĩahenanagĩria na ciara cia moko.
• 14. Ngoro-inĩ yake no ruurugĩ arĩ naruo; hingo ciothe no ũũru athugundaga; nĩ mũhuri wa maũndũ ma thogothogo.
• 15. Tondũ wa ũguo-rĩ, mũtino wake ũkamũkora na kĩhobanĩrio, athuthĩke o hububuku, na hatarĩ kĩhonia.
• 16. Kũrĩ maũndũ matandatũ mathũirũo nĩ Jehova, ĩĩ-ni, o na nĩ mũgwanja ngoro yake yonaga me magigi:
• 17. Namo nĩ maitho ma ngũrũ, na rũrĩmĩ rũa ũrongo, na moko marĩa maitaga thakame ĩrĩa ĩtehĩtie;
• 18. Ningĩ ngoro ĩrĩa ĩthugundaga maũndũ ma waganu, na magũrũ marĩa mateng’eraga na ihenya makinye ũũru-inĩ;
• 19. Na mũira wa maheni ũtumũraga na mathara, na mũndũ wa kũhura thogothogo gatagatĩ ka andũ a nyũmba ĩmwe.
• 20. MŨRŨ wakwa, tũũra o ũrũmĩtie watho wa thoguo, na ndũkanatigane na kĩrĩra kĩa nyũkwa.
• 21. Ciĩoherere thĩinĩ wa ngoro yaku itũũre ho hingo ciothe; ciĩrigicĩrie ngingo.
• 22. Rĩrĩa ũgũthiĩ, nĩ ũhoro ũcio ũrĩgũtongoragia; wakoma-rĩ, nĩguo ũrĩkũmenyagĩrĩra, na wahindũka, nĩguo ũrĩgũteretagĩra.
• 23. Amu watho nĩ tawa, na kĩrĩra nĩ ũtheri, namo mataaro marĩa ma kũũhĩgia mũndũ nĩmo njĩra ya muoyo;
• 24. Maũndũ macio nĩ ma gũkũriganĩrĩria na mũndũ mũka ũrĩa mũũru, makũhonokie harĩ ũnyoroku wa rũrĩmĩ rũa mũka ũcio mũgeni.
• 25. Menya gũkerirĩria ũthaka wake na ngoro, na ndũkanetĩkĩre akũgwatie na imone ciake cia maitho.
• 26. Amu-rĩ, tondũ wa mũka wa maraya mũndũ mũrũme no gũthĩna o kinya atuĩke mũhoi wa kenyũ ka irio; mũka mũtharia nĩ muoyo wene aguĩmaga, na ũrĩ guo kĩndũ kĩa bata mũno.
• 27. No anga mũndũ angĩhota kũgwata mwaki na gĩthũri, na nguo ciake itihĩe?
• 28. Kana mũndũ akinyange makara me mwaki, na aage kũhĩa makinya?
• 29. No taguo mũndũ ũtonya kwa mũka wa mũndũ ũrĩa ũngĩ: gũtirĩ ũngĩhutia mũka ta ũcio na ndatuĩke mũgeru ngero.
• 30. Andũ matimenaga mũici, angĩkorũo aiyĩte no getha ehũnie rĩrĩa ahũtiĩ,
• 31. No aanyitwo, nĩarĩhaga maita mũgwanja, akaruta indo ciothe iria e nacio gwake.
• 32. Mũndũ wa gũtharia na mũndũ mũka nĩ kwaga aagĩte wĩcirio; ũndũ ũcio egwĩka nĩ wa kwĩnina we mwene.
• 33. Arĩona o nguraro, na anyararĩke; ũmeneku ũcio wake ndũngĩthambĩka.
• 34. Nĩ gũkorũo ũiru nĩwĩkagĩra mũndũ marũrũ manene, na ndarĩ tha angĩigua mũthenya wa kwĩrĩhĩria.
• 35. Kĩndũ gĩa gwĩkũũra nakĩo, gũtirĩ o na kĩrĩkũ angĩrora, na ndangihorera o na wamũhe mahaki maingĩ.

Home