Go Back

Thimo Chapter 25

• 1. ICI O NACIO nĩ thimo cia Suleimani, ciacokereirũo ikĩandĩkwo riita rĩngĩ nĩ andũ a Hezekia, ũrĩa warĩ mũthamaki wa Juda.
• 2. Harĩ Ngai, kũhumbĩka ũndũ nĩ gwa kũmwĩkĩrĩrithia, no athamaki, ũndũ ũmekĩrĩrithagia nĩ gũthuuthuuria ũhoro o gũthuuthuuria.
• 3. Kũraiha na igũrũ nĩ matu-inĩ kũraihĩte, na kũrika na thĩ nĩyo ĩrikĩte, ngoro cia athamaki nacio itingĩtuĩrĩka.
• 4. Taaha gĩko gĩthire betha-inĩ, na nĩĩriuma kĩndũ gĩthondeke nĩ mũtheria;
• 5. Ehutia andũ arĩa aaganu harĩ mũthamaki, na gĩtĩ gĩake kĩa ũnene nĩgĩkũrũmio nĩ ũthingu.
• 6. Rĩrĩa mwĩ mbere ya mũthamaki, tiga gwĩthũng’ĩrĩria, na ndũkerũgamie harĩa ha makang’ũ,
• 7. Amu nĩ kaba wĩrũo, Ambata haha, gũkĩra ũcokio na mũhuro mũnene arĩ o ho, mũrĩkĩtie kuonana nake na maitho.
• 8. Ndũkanathiĩ kũgariũrana na mũndũ na kĩhĩko, ndũkae kũrigwo nĩ ũrĩa ũgwĩka cira wathira, rĩrĩa mũndũ ũcio wanyu arĩkorũo agũconorithĩtie.
• 9. Ariai ũhoro wanyu na mũndũ ũcio arĩ we, ũgĩtige gũtengũra ndundu yene,
• 10. Mũndũ wa kũigua ũndũ ũcio ndagagĩkũrume, na ũtũũre na ũcuke ũtangĩgũthira.
• 11. Kiugo gĩa kwario o ihinda rĩagĩrĩire, no ta matunda ma thahabu me tũtiti-inĩ twa betha.
• 12. Mindo ya thahabu, na ithaga rĩa ngingo, o rĩa thahabu ĩrĩa ngembu, nĩ taguo irũithia rĩa mũndũ mũũgĩ rĩtariĩ gũtũ-inĩ kũrĩa kũigu.
• 13. Ta ũhehu wa tharunji hingo ya magetha, noguo mũrekio mwĩhokeku ahaana harĩ amũrekia, amu nĩagandũraga ngoro cia acio mamwathaga.
• 14. Matu na rũhuho itekũrehe mbura, nĩguo mũndũ atariĩ ũrahaga ũheani wake na gũtarĩ.
• 15. Ũkirĩrĩria mũraya ũtũmaga mũnene agucĩrĩrĩke, na rũrĩmĩ ruororo nĩruunaga ihĩndĩ.
• 16. Wona ũũkĩ-rĩ, rĩa o ũrĩa ũgũkũigana, nĩ getha ndũkae kwĩhũnĩrĩria ũcoke kũũtahĩka.
• 17. Ikinya rĩaku ta nĩrĩtĩragĩrie gũthiĩ kwa mũndũ ũrĩa ũngĩ, ndakae kũnogio nĩwe, agũthũũre.
• 18. Mũiganirĩri igenyo nĩ ndotono, nĩ njomo, nĩ mũguĩ ũrĩa mũnore.
• 19. Kwĩhoka mũndũ mũgarũka hingo ya mĩnyamaro no ta igego ituĩku kana kũgũrũ kũgondoku.
• 20. Mũndũ wa gũthuuthĩra ũngĩ wĩ na ngoro nditũ no ta ũrĩa wa kwĩruta nguo rĩrĩa kwĩ heho, kana ta thiki ĩgĩitĩrĩrio igata.
• 21. Mũgũthũũri angĩkorũo nĩahũtiĩ, mũhe irio arĩe; na aakorũo nĩanyotiĩ, mũhe maĩ anyue:
• 22. Amu weka ũguo, nĩ makara me mwaki ũramũhũmbĩrĩra mũtwe, nake Jehova no agĩkũhe ngerenwa.
• 23. Rũhuho rũrĩa ruumaga na gathigathini rũrehage o mbura, o naruo rũrĩmĩ rũa njukũ rũrehage ũthiũ mũthimbu.
• 24. Nĩ kaba gũtũũra nyũmba igũrũ na nja, koine-inĩ kayo, gũkĩra nyũmba nene thĩinĩ hamwe na mũtumia wa kĩmbĩmbĩ.
• 25. Maĩ mahehu harĩ mũndũ mũnyotu, noguo ũhoro mwega ũtariĩ uumĩte bũrũri mũraya.
• 26. Gĩthima kiunjuge, itherũkĩro ithũkie, noguo mũndũ mũthingu ahaana ũrĩa ũterũmagia harĩ arĩa aaganu.
• 27. Kũrĩa ũũkĩ mũingĩ ti wega, na andũ gwĩtuĩrĩria ũrĩa mangĩĩtĩithia o ene, kĩu ti gĩtĩo.
• 28. Mũndũ ũtahotaga gwatha ngoro yake atariĩ ta mũciĩ mũmomoku na kwaga ũkaaga rũirigo.

Home