Go Back

Thimo Chapter 1

• 1. ICI NĨ THIMO cia Suleimani mũrũ wa Daudi, ũrĩa warĩ mũthamaki wa Isiraeli:
• 2. Nĩ cia gũtũma mũndũ emenyere ũũgĩ-ũrĩa-wa-ma, na ataarĩke, na ahote gũkũũranaga ndeto iria ciumaine na mbuguĩro,
• 3. Na ataarĩke ũhoro-inĩ wa ũgerekereri wa maũndũ, akĩgĩe na mĩthiĩre ya ũthingu, na ya kĩhooto, o ĩrĩa mĩrũngĩrĩru;
• 4. Na nĩ cia gũtũma arĩa matarĩ ogĩ magĩe na wara mwega, na mũndũ mwanake agĩe na ũmenyi, o na ũgerereri;
• 5. Mũndũ ũrĩa mũũgĩ o nake aciigue, ongerereke wĩruti, ũrĩa mũtaũku akĩrĩkie kũgĩa na wĩtaari ũrĩa mũgima;
• 6. Ningĩ nĩ cia gũtũma mũndũ ahotage kũigua thimo o na ngerekano, ataũkagĩrũo nĩ mohoro ma andũ arĩa ogĩ, o na miugĩre yao ĩrĩa miumbĩke.
• 7. Gwĩtigĩra Jehova nĩkuo kĩambĩrĩria gĩa kũgĩa na ũmenyi ora-matũ-rĩ, ũũgĩ o na ũtaaro nĩ kũrurũka mairurũkaga.
• 8. Mũrũ wakwa, igua ũtaari wa thoguo, na ũmenye gũgatigana na kĩrĩra kĩa nyũkwa:
• 9. Thima-rĩ, maũndũ macio marĩikaraga ta thũmbĩ ya ngoga wĩ nayo mũtwe, na ta irengeri wĩ nacio ngingo.
• 10. MŨRIŨ, ũngĩhenererio nĩ arĩa mehagia, menya ũhenerereke.
• 11. Mangĩgakwĩra, Ũka, tũthiĩ, tũkohagĩrie andũ, thakame yao tũmĩite, nĩtũmacemagĩrĩre o na matehĩtie tũmahũrage tũhũ-rĩ,
• 12. Tũmamerũkagie marĩ o muoyo, o ta arĩ Kwa-ngoma kwamameria, tũkĩmameragie marĩ o agima, matuĩke o ta arĩa angĩ maharũrũkaga irima rĩu;
• 13. Nĩ kũgwata tũrĩgwataga ũmathi o wothe wĩ bata, tũkaiyũrie nyũmba ciitũ mataha;
• 14. Ũrĩringaga iringa rĩaku hamwe na ithuĩ; tũgũtuĩka a mondo ĩmwe ithuothe:
• 15. Mũrũ wakwa, menya ũkinye njĩra hamwe nao; giria kũgũrũ gwaku gũtigakinye makinya-inĩ mao,
• 16. Amu magũrũ ma andũ acio nĩ ũũru mateng’eragĩra, mahiũhaga no getha magaite thakame.
• 17. Thima-rĩ, nĩ tũhũ o na gĩkerenge gĩakorũo gĩtegetwo o maitho-inĩ ma nyoni o na ĩrĩ ĩrĩkũ:
• 18. Nao andũ acio nĩ thakame yao ene mohagĩria, mĩoyo yao ene nĩyo macemagĩrĩra.
• 19. Ĩo-rĩ, nĩyo njĩra ya mũndũ o wothe mũhahatĩria wa indo; ũhahatĩria ũcio nĩũtunyanaga mĩoyo ya arĩa me naguo.
• 20. MŨTUMIA ũyũ ũgwĩtwo Ũũgĩ-wa-ma nĩaanagĩrĩra e mabarabara-inĩ: atumũkaga na mũgambo arĩ ihaaro-inĩ;
• 21. Macemanĩrio-inĩ ma njĩra iria itindaga ironja, nĩkuo agũtũkaga arĩ; na rĩingĩrĩro-inĩ rĩa kĩhingo gĩa itũũra, o na kũu itũũra thĩinĩ, nĩkuo aaragĩria ciugo ciake:
• 22. Akoria, Inyuĩ andũ aya mũtarĩ ogĩ-rĩ, nĩ nginya rĩ mũgũtũũra mwendete o maũndũ ma wagi-ũũgĩ, nao arĩa atendi-ũhoro mekenagĩre nĩ ũtendĩ wao, na arĩa irimũ matũũre o mathũire ũmenyi?
• 23. Ta garũrũkai, ũtaaro ũyũ wakwa mũkĩũigue Atĩrĩrĩi! nĩngũmũitũrũrĩra roho wakwa, ngũmũmenyithia ũhoro ũrĩa ndĩ naguo.
• 24. Tondũ ndũire o ndĩmũgũtũkagĩra, na inyuĩ mũkarega kũnjigua, ngakĩmũtambũrũkagĩria guoko, na gũtirĩ mũndũ ũngĩrũmbũiya-rĩ,
• 25. Tiga o kwagĩra mũkaagĩra ũtaarani wakwa wothe bata, naguo ũtaaro wakwa mũtingĩwĩtĩkĩra-rĩ,
• 26. Niĩ na niĩ, mũthenya wanyu wa kuona mũtino nĩ gũtheka ngatheka; hingo ĩrĩa mũkagwatwo nĩ guoya no kũmũnyũrũria ngamũnyũrũria,
• 27. Rĩrĩa-ni mũgakorererũo nĩ guoya ũũkĩte ta kĩhuhũkanio, mũtino ũmũkore ta rũhuho rũa ngoma-cia-aka; rĩrĩa-ni mũgakinyĩrĩrũo nĩ mĩnyamaro na ruo rũa ngoro.
• 28. Hĩndĩ ĩo-rĩ, nĩ kũngaĩra makangaĩra, na ndĩkamaamũkĩria; nĩ kũnjaria makanjaria na kĩyo, na matikanyona:
• 29. Nĩ ũndũ ũmenyi nĩ kũũthũũra maaũthũũrire, makĩrega gũthura atĩ metigagĩre Jehova,
• 30. Magĩgĩtuĩka atĩ ũtaarani wakwa matingiwĩtĩkĩra, tiga o kũrurũka makĩrurũka ũtaaro wakwa wothe.
• 31. Tondũ ũcio-rĩ, maciaro ma njĩra ĩo yao nĩmo makarĩa, makĩhũne maũndũ marĩa o ene methugundĩire.
• 32. Nĩ amu kũhutata kwa andũ arĩa matarĩ ogĩ nĩ kũmoraga gũkamoraga, naguo mwĩaraganio wa irimũ no kũininithia ũkaininithia.
• 33. No rĩrĩ, mũndũ o wothe ũrĩnjiguaga arĩikaraga o na mwĩgangaro, atũũre o ahoreire gũtarĩ ũndũ mũũru wa gũtũma aigue guoya.

Home