Go Back

Thama Chapter 5

• 1. Thutha ũcio, Musa na Haruni magĩthiĩ kwa Firauni, makĩmwĩra atĩrĩ, Jehova, o we Ngai wa Isiraeli ekuuga ũũ: Reka andũ akwa mathiĩ, nĩ getha makagĩe na gĩathĩ gĩa kũndungatĩra kũu werũ-inĩ.
• 2. Nake Firauni akĩũria atĩrĩ, Nake Jehova nũ, ũcio ngwĩrũo atĩ njigue mũgambo wake ndeke Aisiraeli mathiĩ? Jehova ũcio ndimũũĩ niĩ, o na ningĩ ndingĩĩtĩkĩria Aisiraeli mathiĩ.
• 3. Nao makiuga atĩrĩ, Ngai wa Ahibirania nĩatũkorete; ta twĩtĩkĩrie tũthiĩ rũgendo rũa mĩthenya ĩtatũ werũ-inĩ, tũkarute igongona rĩa kũhaka Jehova Ngai witũ, nĩ getha ndagatũharũkĩre na mĩthiro, kana atũninithie na rũhiũ rũa njora.
• 4. Nake mũthamaki ũcio wa Misiri akĩmera atĩrĩ, Nĩ kĩ gĩtũmĩte inyuĩ Musa na Haruni mũtigithie andũ wĩra wao? Thiĩi mũkarute wĩra wanyu.
• 5. Nake Firauni akiuga atĩrĩ, Rĩu andũ a bũrũri nĩ aingĩ, na inyuĩ nĩmũgũtũma mahurũke magatiga kũruta wĩra wao.
• 6. Naguo mũthenya o ro ũcio Firauni agĩatha akaburũ arĩa maaroraga andũ, o na anyabara ao, akiuga atĩrĩ,
• 7. Mũtigũcoka kũhe andũ rũũa rũa ngano rũa gũthondeka matubarĩ naruo, ta ũrĩa mũrekaga mbere; rekei mathiage kwĩũnganĩria rũũa arĩ o.
• 8. Na rĩrĩ, menyererai atĩ mũigana wa matubarĩ marĩa marĩthondekaga ũgĩtarũo ũtuĩke o ta ũrĩa wa mbere; mũtikamanyihanyihĩrie o na hanini, nĩ ũndũ nĩ agũũtaru; nĩkĩo marakaya makoiga atĩrĩ, Reka tũthiĩ tũkarute igongona rĩa kũhaka Ngai witũ.
• 9. Nĩ wega maheo wĩra wa hinya gũkĩra mbere marutage, matigage kũrũmbũiya ndeto cia kũhenania.
• 10. Nao akaburũ acio maaroraga andũ makiumagara, o na anyabara ao, nao makĩarĩria andũ, makĩmera atĩrĩ, Firauni ekuuga atĩrĩ, Ndigũcoka kũmũhe rũũa.
• 11. Thiagai mũgecarĩria rũũa o kũrĩa mũrĩruonera; na rĩrĩ, gũtirĩ wĩra wanyu ũngĩnyihanyihio o na hanini.
• 12. Tondũ wa ũguo andũ makĩharaganĩria kũndũ guothe bũrũri-inĩ ũcio wa Misiri, nĩguo magecarĩrie itira cia rũũa rũa ngano ithenya rĩa rũũa rũu.
• 13. Nao akaburũ makamahĩkagĩrĩria mũno, makĩmeraga atĩrĩ, Ĩ mũtihiũhe, nĩguo mũnine wĩra wanyu wa mũthenya o mũthenya, o ta ũrĩa mũraũninaga hĩndĩ ĩrĩa mũrarehagĩrũo rũũa.
• 14. Nao anyabara a ciana cia Isiraeli arĩa maaigĩtwo nĩ akaburũ a Firauni a gũciroraga makĩhũrũo, makĩũragio atĩrĩ, Nĩ kĩ kĩgirĩtie mũnine wĩra wanyu wa ira o na wa ũmũthĩ, mũũmbe matubarĩ maigana o ta marĩa mũrombaga mbere?
• 15. Hĩndĩ ĩo anyabara acio a ciana cia Isiraeli magĩthiĩ gũkaĩra Firauni, makĩũria atĩrĩ, Nĩ kĩ gĩtũmĩte ũtwĩke ithuĩ ndungata ciaku maũndũ ta maya?
• 16. Rĩu ithuĩ ndungata ciaku tũtiheagwo rũũa, na twĩragwo atĩrĩ, Ũmbai matubarĩ; na atĩrĩrĩ, ithuĩ ndungata ciaku nĩtũrahũrũo mũno; no rĩri, andũ aku wee mwene nĩo mahĩtĩtie.
• 17. Nowe akiuga atĩrĩ, Mũrĩ igũũta, mũrĩ igũũta; nĩkĩo mũkuuga atĩrĩ, Reka tũthiĩ tũkarute igongona rĩa kũhaka Jehova.
• 18. Gĩũkĩrei, mũthiĩ, mũkarute wĩra; amu mũticoka kũheo rũũa; no rĩrĩ, mũigana wanyu wa matubarĩ ũgũtuĩka o ta ũrĩa wa mbere.
• 19. Nao anyabara acio a ciana cia Isiraeli makĩona atĩ nĩ acirĩre ũũru, rĩrĩa merirũo atĩrĩ, Mũtikũnyihanyihĩrio o na hanini matubarĩ marĩa mũũmbaga ma wĩra wanyu wa mũthenya o mũthenya.
• 20. Nao rĩrĩa moimaga he Firauni, magĩkora Musa na Haruni marũgamĩte njĩra-inĩ mametereire,
• 21. magĩkĩmera atĩrĩ, Jehova aromũbara atue cira wanyu; nĩ ũndũ nĩmũtũnungĩtie harĩ Firauni, o na harĩ ndungata ciake, o ta mũmanengerete rũhiũ matũũrage.
• 22. Nake Musa agĩcokerera Jehova, akĩmũũria atĩrĩ, Mwathani, wĩkĩte andũ aya maũndũ moru ũũ, nĩkĩ? Ningĩ-rĩ, nĩ kĩ gĩatũmire ũndekie?
• 23. Nĩ ũndũ-rĩ, gwata hĩndĩ ĩrĩa ndokire kũrĩ Firauni ndĩmwarĩrie ngĩgwetaga rĩĩtwa rĩaku, ndarĩ aatiga gwĩka andũ aya maũndũ moru; nawe-rĩ, o na gũteithũra ndũrĩ ũrateithũra andũ aku o na hanini.

Home