Go Back

Thama Chapter 39

• 1. Na rĩrĩ, nguo iria ndume wega irĩ riri cia kũrutaga wĩra nacio handũ harĩa hatheru, o na nguo iria nyamũre cia kwĩhumbwo nĩ Haruni, magĩcituma na ndigi cia rangi wa bururu, na wa zambarau, na wa gakarakũ, o ta ũrĩa Jehova aathire Musa gwĩkwo.
• 2. Ningĩ agĩtuma ebodi na ndigi cia thahabu, na cia rangi wa bururu, na wa zambarau, na wa gakarakũ, hamwe na gatani ya ndigi njeke ciogothetwo.
• 3. Magĩkĩhũrahũra thahabu, makĩmĩtua ithuma hũthũ mũno, makĩmĩtinangia ĩtuĩke ngucio njeke nĩguo mũtumi ũrĩa mũũhĩgĩrĩru ũtumi ũcio amĩtumanie na ndigi icio cia rangi wa bururu, na wa zambarau, na wa gakarakũ, o na gatani ya ndigi njeke ciogothetwo.
• 4. Nao magĩthondekera ebodi ĩo ngwa igĩrĩ igĩtumanio nayo, nĩguo ĩnyitithanio nacio o mĩthia-inĩ yerĩ yayo.
• 5. O naguo mwĩhotoro ũrĩa ũgemetio wega wa kũmĩnyitia wa igũrũ rĩayo, warĩ wa kĩndũ o ro kĩmwe nayo, o na ningĩ ũgĩtuĩka ũthondeketwo wĩ wa mũthemba o ũmwe na ebodi ĩo yo nyene, ũgĩgĩtumwo na ndigi cia thahabu, na cia rangi wa bururu, na wa zambarau, na wa gakarakũ, hamwe na gatani ya ndigi njeke ciogothetwo, o ta ũrĩa Jehova aathire Musa gwĩkwo.
• 6. Ningĩ magĩthondeka tũhiga tũrĩa twa onigithi, magĩtwĩkĩra tũkonyo-inĩ tũgemie twa thahabu, na magĩtũkurura marĩĩtwa ma ciana cia Isiraeli o ta ũrĩa kanyamũ ga gwĩkĩra rũũri gekagwo.
• 7. Agĩgĩĩkĩra tũhiga tũu ngwa-inĩ cia manyitithanĩrio ma ebodi ciande-inĩ, nĩ getha tũhiga tũu tũtuĩke twa gũtũma ciana cia Isiraeli iririkanagwo; o ta ũrĩa Jehova aathire Musa gwĩkwo.
• 8. Ningĩ agĩtuma gakuo ga gĩthũri; gagĩtumwo nĩ mũtumi mũũhĩgĩrĩru ũtumi ũcio o ta ũrĩa ebodi yatumĩtwo; agĩgĩgatuma na ndigi cia thahabu, na ndigi cia rangi wa bururu, na wa zambarau, na wa gakarakũ, hamwe na gatani ya ndigi njeke ciogothetwo.
• 9. Nao magĩgatuma ge thikwea koinanĩirũo, na kũraiha gwako gũgĩtuĩka irata rĩmwe, na kwarama gwako gũgĩtuĩka irata rĩmwe o ro ũguo, ge koinanĩre.
• 10. Magĩgĩgathecerera tũhiga twa goro mĩhari ĩna; mũhari wa mbere ũkĩgĩa kahiga ka wakiki ũrĩa mũtune, na ka yakuti ĩrĩa ĩhaana ngoikoni, o na ka baregathu; tũu tũgĩtuĩka twa mũhari ũcio wa mbere.
• 11. Naguo mũhari wa kerĩ, makĩwĩkĩra kahiga ga thumarati, na ka yakuti ĩrĩa ya rangi wa bururu, o na ka arimathi;
• 12. naguo mũhari wa gatatũ, makĩwĩkĩra kahiga ka wakiki ũrĩa wa bururu, na ka yacimu, o na ka amethuthito.
• 13. O naguo mũhari wa kana, makĩwĩkĩra kahiga ga thumarati ĩrĩa theru, na ka onigithi, o na ka njathibi; tũhiga tũu tũgĩgĩthecererũo tũkonyo-inĩ tũgemie twa thahabu, tũkĩnyitithanio natuo.
• 14. Tũhiga tũu tũgĩgĩtuĩka ikũmi na twĩrĩ o ta marĩĩtwa ma ciana cia Isiraeli, o ta ũrĩa marĩĩtwa ma cio matwaranĩte; natuo tũgĩkururũo o ta ũrĩa kanyamũ ga gwĩkĩra rũũri gekagwo, kahiga o kahiga gagĩgĩkururũo rĩĩtwa igũrũ rĩako, o ta ũrĩa marĩĩtwa ma mĩhĩrĩga ĩo ikũmi na ĩĩrĩ yatariĩ.
• 15. Ningĩ gakuo kau ga gĩthũri magĩgatumĩrĩra irengeri cia thahabu therie mũno itariĩ ta mĩhĩndo mĩceke ya kuogothwo.
• 16. Magĩcoka magĩthondeka tũkonyo twĩrĩ tũgemie twa thahabu, o na icũhĩ igĩrĩ cia thahabu; nacio icũhĩ icio cierĩ magĩciĩkĩra mĩthia-inĩ yerĩ ya gakuo kau.
• 17. Nacio irengeri icio cierĩ cia kuogothwo cia thahabu magĩciĩkĩra icũhĩ-inĩ icio cierĩ mĩthia-inĩ ya gakuo kau.
• 18. O nayo mĩthia ĩrĩa ĩngĩ yerĩ ya irengeri icio cia kuogothwo, makĩmĩnyitithania na tũkonyo tũu twerĩ tũgemie, magĩcoka makĩmĩĩkĩra ngwa-inĩ iria igĩrĩ cia manyitithanĩrio ma ebodi ciande-inĩ, o mwena wa na mbere wayo.
• 19. O na ningĩ magĩthondeka icũhĩ ingĩ igĩrĩ cia thahabu, magĩciĩkĩra mĩthia-inĩ yerĩ ya mĩena ya gakuo kau ga gĩthũri, o mwena ũrĩa ũriganĩtie na ebodi na thĩinĩ.
• 20. Na ningĩ magĩcoka magĩthondeka icũhĩ ingĩ igĩrĩ cia thahabu, magĩciĩkĩra ngwa-inĩ icio cierĩ mĩena-inĩ yerĩ ya ebodi ĩo, mũhurahuro wa icio ingĩ, o mwena wa na mbere wayo, hakuhĩ na inyitithanĩrio, o hau igũrũ rĩa harĩa mwĩnyitio ũrĩa ũgemetio wega wa ebodi ũrĩ.
• 21. Nako gakuo kau ga gĩthũri, o na ebodi io, magĩcinyitithania na karũkwa ka rangi wa bururu, na ũndũ wa kuohania icũhĩ icio na icũhĩ iria ingĩ itumĩrĩirũo ebodi, nĩ getha karũkwa kau gaikarage karĩ igũrũ rĩa harĩa mwĩnyitio ũrĩa ũgemetio wega wa ebodi ũrĩ, na nĩ getha gakuo kau ga gĩthũri gatikarekanie na ebodi; o ta ũrĩa Jehova aathire Musa gwĩkwo.
• 22. Nayo nguo ĩo ndaya ya kwĩhumbanĩrio na ebodi akĩmĩtuma ĩrĩ o ĩmwe yothe, ya rangi mũtheri wa bururu;
• 23. na akĩmĩĩkĩra irima gatagatĩ kayo rĩa gũtonyagĩria mũtwe rĩrigicĩirio gatamĩ ga kũrũmia mbarĩ ciothe ciarĩo, o ta ũrĩa nguo ya gĩthũri ĩrĩa ya gwĩkĩrũo mbaara-inĩ ĩtariĩ irima rĩayo, nĩ getha ndĩkanatembũke.
• 24. Nao makĩgemia mwena wa mũhuro wa nguo ĩo ndaya na tũcunjura tũtariĩ ta matunda ma makomamanga twa ndigi cia rangi wa bururu, na wa zambarau, na wa gakarakũ, hamwe na gatani ya ndigi njeke ciogothetwo.
• 25. Ningĩ magĩthondeka njingiri cia thahabu therie, magĩcirigicĩria mũthia-inĩ wa nguo ĩo ndaya, mĩena-inĩ yayo guothe, magĩthiĩ magĩcihakanagia na makomamanga macio;
• 26. o njingiri ĩmwe, na ikomamanga rĩmwe, o njingiri ĩmwe, na ikomamanga rĩngĩ rĩmwe, igĩgĩthiĩ irũmanĩrĩire o ro ũguo irigicĩirie mwena wa mũhuro wa nguo ĩo ndaya ya gũtungata nayo, o ta ũrĩa Jehova aathire Musa gwĩkwo.
• 27. Ningĩ magĩtumĩra Haruni na ariũ ake makanjũ na gatani ya ndigi njeke ciogothetwo, naguo kanjũ o kanjũ ũgĩtumwo ũrĩ o ũmwe wothe;
• 28. na magĩtuma kĩremba gĩa gatani njega mũno, na tũkũbia twa gatani njega mũno o ro ũguo, o na thuruarĩ cia gatani ya ndigi njeke ciogothetwo,
• 29. na magĩtuma mĩĩhotoro na gatani ya ndigi njeke ciogothetwo, na ndigi cia rangi wa bururu, na wa zambarau, o na wa gakarakũ, ĩtumĩtwo nĩ mũndũ mũũhĩgĩrĩru ũtumi ũcio; o ta ũrĩa Jehova aathire Musa gwĩkwo.
• 30. Magĩcoka magĩthondeka gathuma ga gatanji karĩa kaamũre na thahabu therie mũno, na igũrũ rĩako magĩkurura ciugo ici; ŨYŨ NĨWE MŨTHERU WAMŨRĨIRŨO JEHOVA; magĩgĩcikurura ho o ta ũrĩa kanyamũ ga gwĩkĩra rũũri gekagwo.
• 31. Magĩgĩkoherera karũkwa ka rangi wa bururu, ga gũkohania na kĩremba mwena wa igũrũ wakĩo; o ta ũrĩa Jehova aathire Musa gwĩkwo.
• 32. Ũguo nĩguo wĩra ũcio wothe wa gũthondeka gĩikaro kĩa hema-ya gũtũnganwo warĩkirio; ciana icio cia Isiraeli igĩgĩĩka maũndũ mothe o ta ũrĩa Jehova aathire Musa gwĩkwo; ũguo noguo ciekire.
• 33. Nao andũ magĩtwarĩra Musa gĩikaro kĩu, o na Hema ĩo, na indo cia gwĩkĩrũo kuo, na ngathĩka ciayo cia kũnyitithania, na mbaũ ciayo, na mĩgamba yayo, na itugĩ ciayo, na makinya mayo;
• 34. na kĩandarũa kĩa njũa cia ndũrũme itoboketio rangi-inĩ igatunĩha, na kĩandarũa kĩa njũa cia pomboo, na gĩtama kĩrĩa gĩa kũhakania kĩa nyumĩrĩra ya handũ harĩa hatheru mũno;
• 35. na ithandũkũ rĩa ũira, na mĩtĩ yarĩo ĩrĩa mĩraya, na gĩikaro-gĩa-tha;
• 36. na metha, na indo ciothe ciayo, na mĩgate ĩrĩa ya kũigwo mbere ya Jehova;
• 37. na mũtĩ ũrĩa mũtheru wa kũigĩrĩrũo matawa, hamwe na matawa maguo, o marĩa ma kũigwo wega handũ hamo igũrũ rĩaguo, na indo ciothe ciaguo, o na maguta ma gwakio;
• 38. na kĩgongona gĩa thahabu, na maguta ma gũitanĩrĩrio, na ũbumba ũrĩa ũnungaga wega, na tama wa kweheheragio wa mũromo-inĩ wa Hema;
• 39. na kĩgongona kĩrĩa gĩa gĩcango, na kĩrũgara gĩakĩo gĩa gĩcango, na mĩtĩ yakĩo ĩrĩa mĩraya, o na indo ciakĩo ciothe, na kĩnyũngũ gĩa gwĩthambĩrũo, hamwe na kũgũrũ gwakĩo;
• 40. na matama ma kũiriga nja ya gĩikaro, na itugĩ cia mĩena yothe yayo, na makinya ma cio, na tama ũrĩa wa kweheheragio wa mũromo-inĩ wa nja ĩo ya hema, na mĩhĩndo yayo, na higĩ ciayo, o na indo ciothe cia kũrutwo wĩra wa gĩikaro kĩu nacio o kũu hema-inĩ-ya-gũtũnganwo;
• 41. na nguo iria itumĩtwo wega irĩ riri, cia kũruta wĩra nacio handũ harĩa hatheru ciĩhumbĩtwo, na nguo iria nyamũre cia Haruni mũthĩnjĩri-Ngai, o na nguo cia ariũ ake cia kũrutaga wĩra ũcio wa athĩnjĩri-Ngai nacio.
• 42. Na rĩrĩ, o ta ũrĩa maũndũ mothe maatariĩ, marĩa Jehova aathire Musa mekwo, ũguo noguo ciana cia Isiraeli ciekire, ikĩruta wĩra ũcio wothe.
• 43. Nake Musa akĩona wĩra ũcio wothe; na atĩrĩrĩ, ciana icio cia Isiraeli ciakorirũo iũrutĩte; o ta ũrĩa Jehova aathanĩte, ũguo noguo ciaũrutire; nake Musa agĩcirathima.

Home