Go Back

Thama Chapter 37

• 1. Na rĩrĩ, Bezaleli agĩthondeka ithandũkũ rĩrĩa rĩa ũira na mbaũ cia mũtĩ ta mũgaa; nakuo kũraiha kwarĩo gũgĩtuĩka mĩkono ĩĩrĩ na nuthu, nakuo kwarama kwarĩo gũgĩtuĩka mũkono ũmwe na nuthu, o nakuo kũraiha na igũrũ kwarĩo gũgĩtuĩka mũkono ũmwe na nuthu,
• 2. agĩkĩrĩĩkĩra thahabu therie mũno mbarĩ ciothe ciarĩo, thĩinĩ, o na igũrũ, o na ningĩ akĩrĩrigicĩria mũnyamũ wa thahabu mĩthia-inĩ ya igũrũ.
• 3. Ningĩ akĩrĩthondekera icũhĩ inya cia thahabu, agĩciĩkĩra magũrũ-inĩ marĩo mo mana; icũhĩ icio-rĩ, igĩrĩ ikĩgĩa mwena ũmwe, na iria ingĩ igĩrĩ ikĩgĩa mwena ũrĩa ũngĩ.
• 4. Ningĩ agĩacũhia mĩtĩ mĩraya ya mũthemba ta mũgaa, akĩmĩhumba igũrũ guothe na thahabu.
• 5. Nayo mĩtĩ ĩo mĩraya akĩmĩtonyia icũhĩ-inĩ cia mĩena-inĩ ya ithandũkũ rĩu, rĩkuuagwo nayo.
• 6. Ningĩ agĩthondeka gĩikaro-gĩa-tha na thahabu therie mũno; nakuo kũraiha gwakĩo gũgĩtuĩka mĩkono ĩĩrĩ na nuthu, o nakuo kwarama gwakĩo gũgĩtuĩka mũkono ũmwe na nuthu.
• 7. Agĩcoka agĩthondeka makerubi merĩ ma thahabu; akĩmathondeka ma gũturũo, akĩmaiga mĩthia-inĩ yerĩ ya gĩikaro-gĩa-tha;
• 8. kerubi ĩmwe akĩmĩĩkĩra mũthia ũmwe, nayo kerubi ĩrĩa ĩngĩ akĩmĩĩkĩra mũthia ũrĩa ũngĩ; na rĩrĩ, makerubi macio magĩtuĩka kĩndũ o ro kĩmwe na gĩikaro-gĩa-tha, manyitaine nakĩo mĩthia-inĩ yerĩ.
• 9. Namo makerubi macio magatambũrũkia mathagu mamo na igũrũ, makahumba gĩikaro-gĩa-tha na mathagu mamo, maroranĩtie mothiũ; namo mothiũ ma makerubi macio magaikara marorete gĩikaro-gĩa-tha.
• 10. Ningĩ agĩthondeka metha ya mbaũ cia mũtĩ ta mũgaa, kũraiha kwayo gũgĩtuĩka mĩkono ĩĩrĩ, na kwarama kwayo gũgĩtuĩka mũkono ũmwe, na kũraiha na igũrũ kwayo gũgĩtuĩka mũkono ũmwe na nuthu;
• 11. agĩcoka akĩmĩĩkĩra thahabu therie mũno igũrũ rĩayo guothe, o na akĩmĩrigicĩria mĩena yothe mũnyamũ wa thahabu mĩthia-inĩ ya igũrũ.
• 12. O na ningĩ akĩmĩĩkĩra kabaũ gaceke mĩena yothe, gakĩrigicĩria, nako gakĩarama o ta ũrĩa rũhĩ rũaramĩte; agĩcoka agĩgekĩra mũnyamũ wa thahabu igũrũ rĩako guothe.
• 13. Ningĩ agĩgĩthondekera metha ĩo icũhĩ inya cia thahabu, agĩciĩkĩra mĩthia-inĩ yothe ĩna ya igũrũ ya magũrũ ma metha ĩo.
• 14. Nacio icũhĩ icio igĩkuhanĩrĩria na kabaũ kau gaceke karigicĩirie metha ĩo, igĩtuĩka handũ ha gũtonyagio mĩtĩ ĩrĩa mĩraya ya gũkuuaga metha ĩo,
• 15. nayo mĩtĩ ĩo mĩraya akĩmĩthondeka na mĩtĩ ta mũgaa, akĩmĩhumba igũrũ guothe na thahabu, nĩguo metha ĩo ĩkuuagwo nayo.
• 16. Agĩcoka agĩthondeka indo cia kũigagĩrĩrũo metha; nacio nĩ thani nene ciayo, na iciko, na mbakũri, o na ikobo cia gũitaga kĩrĩa gĩkũrutwo gĩa kũnyuwo. Indo icio ciothe agĩcithondeka na thahabu therie mũno.
• 17. Ningĩ agĩthondeka mũtĩ wa kũigĩrĩrũo matawa na thahabu therie mũno, naguo mũtĩ ũcio wa kũigĩrĩrũo matawa akĩũthondeka na ũndũ wa kũũtura; gĩtina kĩaguo agĩgĩturanĩria hamwe na mũtĩ waguo; na rĩrĩ, ikombe ciaguo, o na ikonyo ciaguo, o na mahũa maguo, indo icio ciothe-rĩ, igĩthondekwo irĩ kĩndũ o kĩmwe, igwataine naguo;
• 18. na hagĩkĩgĩa honge ithathatũ ciumĩte mĩena-inĩ yaguo; honge ithatũ ciaguo ikiuma mwena ũmwe waguo, o nacio honge iria ingĩ ithatũ ikiuma mwena ũrĩa ũngĩ waguo:
• 19. rũhonge-inĩ rũmwe hakĩgĩa ikombe ithatũ ithondeketwo ta kĩro kĩa mũrothi hamwe na gĩkonyo kĩmwe kĩa ihũa, o na ihũa rĩmwe; naruo rũhonge-inĩ rũrĩa rũngĩ, hakĩgĩa ikombe ithatũ ithondeketwo ta kĩro kĩa mũrothi, hamwe na gĩkonyo kĩmwe kĩa ihũa, o na ihũa rĩmwe; ũguo nĩguo honge icio ithathatũ ciumĩte mũtĩ-inĩ ũcio wa kũigĩrĩrũo matawa ciathondeketwo.
• 20. Ningĩ mũtĩ-inĩ ũcio wa kũigĩrĩrũo matawa guo mwene ũkĩgĩa ikombe inya ithondeketwo ta kĩro kĩa mũrothi, hamwe na ikonyo ciaguo cia mahũa, o na mahũa maguo;
• 21. hagĩkĩgĩa gĩkonyo kĩmwe kĩgwatanĩtie honge igĩrĩ, nakĩo gĩgĩtuĩka gĩa gĩcunjĩ o kĩmwe na mũtĩ ũcio; o ũguo taguo hakĩgĩa gĩkonyo kĩngĩ kĩgwatanĩtie honge ingĩ igĩrĩ, nakĩo gĩgĩtuĩka gĩa gĩcunjĩ o kĩmwe na mũtĩ ũcio; ningĩ hagĩcoka hakĩgĩa o gĩkonyo kĩngĩ, kĩgwatanĩtie honge igĩrĩ, o nakĩo kĩu gĩgĩtuĩka gĩa gĩcunjĩ o kĩmwe na mũtĩ ũcio wa kũigĩrĩrũo matawa; gũgĩtuĩka o ro ũguo nĩ ũndũ wa honge icio ithathatũ cioimĩte mũtĩ-inĩ ũcio wa kũigĩrĩrũo matawa.
• 22. Na rĩrĩ, ikonyo ciaguo, o na honge ciaguo, igĩtuĩka kĩndũ o ro kĩmwe naguo; naguo mũtĩ ũcio wa kũigĩrĩrũo matawa wothe ũgĩthondekwo na thahabu therie mũno ũturĩtwo ũrĩ o kĩndũ kĩmwe.
• 23. Nake agĩthondeka matawa maguo mũgwanja o na mwĩhato waguo, o na thani cia mũrarĩ wa ndambĩ ciaguo, nacio icio ciothe agĩcithondeka na thahabu therie mũno.
• 24. Agĩgĩthondeka mũtĩ ũcio wa kũigĩrĩrũo matawa wothe, hamwe na indo ciaguo ciothe, na thahabu therie mũno; nayo ĩgĩthimwo ũritũ wayo warĩ wa taranda ĩmwe.
• 25. Ningĩ agĩthondeka kĩgongona gĩa gũcinagĩrũo ũbumba igũrũ rĩakĩo, agĩgĩthondeka na mũtĩ ta mũgaa; nakuo kũraiha gwakĩo gũgĩtuĩka mũkono ũmwe, na kwarama gwakĩo gũgĩtuĩka mũkono o ũmwe, gĩgĩgĩtuĩka gĩĩ thikwea, ningĩ kũraiha na igũrũ gwakĩo gũgĩtuĩka mĩkono ĩĩrĩ; nacio hĩa ciakĩo igĩtuĩka kĩndũ o ro kĩmwe nakĩo.
• 26. Nake agĩkĩhumba gĩothe na thahabu therie mũno, o igũrũ rĩakĩo, o na mĩena-inĩ, o na hĩa-inĩ ciakĩo, na agĩgĩthondekera mũnyamũ wa thahabu ũkĩrigicĩria mĩthia-inĩ ya igũrũ.
• 27. Ningĩ agĩgĩthondekera icũhĩ igĩrĩ cia thahabu, agĩciĩkĩra mũhuro wa mũnyamũ ũcio mbaru-inĩ ciakĩo cierĩ mĩena-inĩ yerĩ yakĩo, nacio igĩtuĩka cia gũtonyagio mĩtĩ ĩrĩa mĩraya ya gũgĩkuuaga.
• 28. Nake agĩthondeka mĩtĩ ĩo na mũtĩ ta mũgaa, akĩmĩhumba igũrũ guothe na thahabu.
• 29. Agĩcoka agĩthondeka maguta marĩa maamũre ma gũitanĩrĩrio, o na ũbumba ũrĩa mwega mũno wa mahuti marĩa manungaga wega, ũthondeketwo o ta ũrĩa mũndũ mũũhĩgĩrĩru ũthondeki ũcio aũthondekaga.

Home