Go Back

Thama Chapter 35

• 1. Na rĩrĩ, Musa agĩcokanĩrĩria kĩrĩndĩ gĩothe gĩa ciana cia Isiraeli, agĩkĩĩra atĩrĩ, Mohoro maya nĩmo Jehova aathanĩte nĩguo mũmekage.
• 2. Wĩra ũrĩrutagwo mĩthenya ĩtandatũ; no rĩrĩ, mũthenya wa mũgwanja mũũtue mũthenya mwamũre, ũtuĩke thabatũ ya kũhurũka o kũhurũka ki, yamũrĩirũo Jehova; mũndũ o na ũrĩkũ ũrĩa ũkaruta wĩra o na ũrĩkũ mũthenya ũcio, nĩakoragwo.
• 3. Mũtigaakie mwaki o na atĩa mũthenya ũcio wa thabatũ kũndũ kũrĩa guothe mũtũũrĩte.
• 4. Nake Musa akĩaria na kĩrĩndĩ kĩu gĩothe gĩa ciana cia Isiraeli, agĩkĩĩra atĩrĩ, Ũndũ ũyũ nĩguo Jehova amwathĩte mwĩkage, akoiga atĩrĩ,
• 5. Hothithaniai thĩinĩ wanyu indo cia kũrutĩrũo Jehova; mũndũ o wothe ũrĩa ũkũigua ngoro yake ĩkĩenda-rĩ, nĩarehage kĩndũ gĩa kũrutĩrũo Jehova; na rĩrĩ, indo iria ingĩrutwo nĩ ici, nĩ thahabu, na betha, na gĩcango;
• 6. na ndigi cia rangi wa bururu, na wa zambarau, na wa gakarakũ, na gatani ĩrĩa njega, o na ngore cia mbũri;
• 7. na njũa cia ndũrũme itoboketio rangi-inĩ igatunĩha, na njũa cia pomboo, o na mbaũ cia mĩtĩ ta mĩgaa;
• 8. na maguta ma gwakio, na mahuti marĩa manungaga wega ma gwĩkĩrũo maguta-inĩ ma gũitanagĩrĩrio, o na ma gwĩkĩrũo ũbumba ũrĩa ũnungaga wega;
• 9. na tũhiga tũrĩa twĩtagwo onigithi, na tũhiga tũngĩ twa gũthecererũo ebodi-inĩ, o na gakuo-inĩ ga gĩthũri.
• 10. Na nĩ wega andũ othe arĩa marĩ na ngoro ya ũũgĩ thĩinĩ wanyu moke, nĩguo mathondeke indo icio ciothe Jehova aathanĩte ithondekwo;
• 11. nacio nĩcio gĩikaro kĩu, na hema yakĩo, na kĩandarũa gĩakĩo, na ngathĩka ciakĩo, na mbaũ ciakĩo cia gwaka, na mĩgamba yakĩo, na itugĩ ciakĩo, o na makinya makĩo;
• 12. ningĩ mathondeke ithandũkũ rĩa ũira, na mĩtĩ yarĩo ĩrĩa mĩraya ya kũrĩkuua, na gĩikaro-gĩa-tha, o na gĩtama kĩrĩa gĩa kũhakania gĩa gũcunjurio mbere yakĩo;
• 13. na metha, na mĩtĩ yayo ĩrĩa mĩraya, na indo ciayo ciothe, o na mĩgate ya kũigwo mbere ya Jehova;
• 14. na mũtĩ wa kũigĩrĩrũo matawa ma kũmũrĩka na indo ciaguo, na matawa maguo mo mene, o na maguta ma gwakagio;
• 15. na kĩgongona gĩa gũcinĩrũo ũbumba, na mĩtĩ yakĩo ĩrĩa mĩraya, na maguta ma gũitanagĩrĩrio, na ũbumba ũrĩa ũnungaga wega, o na tama wa kweheheragio wa gũcunjuragio ũtambũrũkĩtio mũromo-inĩ wa itonyero rĩa gĩikaro;
• 16. na kĩgongona kĩa mahaki ma njino, hamwe na kĩnyamũ gĩakĩo gĩa gĩcango gĩtariĩ ta rũgara, na mĩtĩ yakĩo ĩrĩa mĩraya, na indo ciakĩo ciothe, o na kĩnyũngũ gĩa gwĩthambĩrũo, hamwe na kũgũrũ gwakĩo;
• 17. na ciandarũa iria icunjuragio mĩena-inĩ hau nja ya gĩikaro, na itugĩ ciacio, na makinya ma itugĩ icio, o na tama wa kweheheragio wa gũcunjurio ũtambũrũkĩtio mũromo-inĩ wa kuuma na nja;
• 18. na higĩ cia gĩikaro, na cia itugĩ cia nja, o na mĩhĩndo yacio;
• 19. na nguo irĩ riri ndume wega cia kũrutaga wĩra nacio handũ hau hatheru, nacio nĩcio nguo iria nyamũre cia Haruni ũrĩa mũthĩnjĩri-Ngai, o na nguo cia ariũ ake, cia kũrutaga wĩra wa athĩnjĩri-Ngai mehumbĩte.
• 20. Nakĩo kĩrĩndĩ gĩothe gĩa ciana cia Isiraeli gĩkiuma harĩ Musa gĩkĩharagania.
• 21. Nao andũ othe arĩa maarĩ na ngoro ciahĩahĩaga nĩ kwenda gwĩka wega, o na arĩa othe maarĩ na maroho megwĩtĩkĩra ũndũ ũcio, magĩtwara indo cia kũrutĩrũo Jehova, cia wĩra wa hema-ya-gũtũnganwo, o na cia mawĩra mothe marĩa mamĩkoniĩ, o na ũndũ wa nguo iria nyamũre.
• 22. Nao magĩthiĩ ho othe, arũme o na andũ-a-nja, o arĩa othe maarĩ na ngoro igwĩtĩkĩra ũndũ ũcio, nao magĩtwara mĩthemba ya mbini ng’emie, o na icũhĩ cia matũ, na icũhĩ cia ciara iria cia gwĩkĩra marũũri, o na ituro, ona mathaga ma mĩthemba yothe ya thahabu; ũguo noguo andũ othe, mũndũ o mũndũ, ũrĩa warĩ na thahabu ĩngĩrutĩka, aarutĩire Jehova kĩndũ gĩa thahabu.
• 23. Ningĩ andũ othe, o mũndũ ũrĩa wakoragwo arĩ na ndigi cia rangi wa bururu, na wa zambarau, o na wa gakarakũ, o na gatani ĩrĩa njega, na ngore cia mbũri, na njũa cia ndũrũme itoboketio rangi-inĩ igatunĩha, o na njũa cia pomboo, agĩcitwara.
• 24. Nao andũ othe, o mũndũ ũrĩa warĩ na kĩndũ kĩa betha kana gĩa gĩcango kĩngĩrutĩka, agĩgĩtwara gĩkarutĩrũo Jehova; nao andũ othe, o mũndũ ũrĩa wakoragwo arĩ na mbaũ cia mũtĩ ta mũgaa ingĩrutĩrũo wĩra o na ũrĩkũ thĩinĩ wa wĩra ũcio, agĩcitwara.
• 25. Nao andũ-a-nja othe arĩa maarĩ na ngoro irĩ na ũũgĩ makĩogotha ndigi na moko mao, magĩgĩtwara ndigi icio ciothe iria mogothete cia rangi wa bururu, na wa zambarau, na wa gakarakũ, o na gatani ĩrĩa njega.
• 26. O nao andũ-a-nja othe arĩa maarĩ na ngoro ciahĩahĩaga nĩ kũgĩa na ũũgĩ, makĩogotha ngore cia mbũri.
• 27. Nao aathani magĩtwara onigithi, na tũhiga tũngĩ twa gũthecererũo ebodi-inĩ, na gakuo-inĩ ga gĩthũri,
• 28. na mahuti marĩa manungaga wega, na maguta ma gwakio, o na ma gũthondekwo maguta marĩa maitanagĩrĩrio, o na ma gũthondeka ũbumba ũrĩa ũnungaga wega.
• 29. Ũguo noguo ciana cia Isiraeli ciatwarire na kwĩendera indo cia kũrutĩrũo Jehova; andũ othe, mũndũ mũrũme o na mũndũ-wa-nja, arĩa mendithagio nĩ ngoro gũtwara indo cia wĩra ũcio wothe Jehova aathanire akĩĩra Musa ũrutwo-rĩ, nĩmaacitwarire.
• 30. Nake Musa akĩĩra ciana cia Isiraeli ũũ: Atĩrĩrĩ, Jehova nĩ gwĩta etĩte Bezaleli wa Uri mũrũ wa Huri, wa mũhĩrĩga wa Juda, akamũthura akamũgweta rĩĩtwa,
• 31. na akamũiyũria roho wa Ngai, nĩguo agĩe na ũũgĩ, na ahiũhage kũigua ũrĩa maũndũ matariĩ, o na kũmamenya wega, na atuĩke mũũhĩgĩrĩru mawĩra ma mĩthemba yothe;
• 32. ningĩ ahotage gũthugunda mĩrutĩre ya mawĩra ma ũũgĩ marĩa makoniĩ thahabu, na betha, o na gĩcango,
• 33. o na makoniĩ wacũhia wa tũhiga twa gũthecererũo indo-inĩ, na wai wa mĩtĩ, nĩguo atuĩke mũũhĩgĩrĩru ũruti wĩra wa ũũgĩ wa mĩthemba yothe.
• 34. Ningĩ nĩamwĩkĩrĩte ngoro-inĩ yake ũhoti wa kũrutana, o na akawĩkĩra ngoro-inĩ ya Oholiabu wa Ahisamaku wa mũhĩrĩga wa Dani o nake.
• 35. Acio nĩo aiyũrĩtie ũũgĩ ngoro-inĩ ciao, nĩguo marutage mawĩra ma mĩthemba yothe, namo nĩmo ma wacũhia wa mahiga, o na ma kũruta mawĩra ma mĩthemba yothe ya ũũgĩ, na kũgemia indo na ũndũ wa gwĩkĩra marooro ma rangi wa bururu, na ma rangi wa zambarau, na ma rangi wa gakarakũ, na gũtuma gatani ĩrĩa njega, na kũruta wĩra wa ũtumi wa matama; naguo ũguo nĩ ta kuuga o mawĩra marĩa marutagwo ma mĩthemba yothe, o na mawĩra marĩa mathugundagwo ma ũũgĩ.

Home