Go Back

Thama Chapter 32

• 1. Na rĩrĩ, rĩrĩa andũ monire atĩ Musa egũikara mũno, aaga gũikũrũka oime kĩrĩma igũrũ-rĩ, andũ acio magĩkĩũngana magĩthiĩ he Haruni makĩmwĩra atĩrĩ, Ũkĩra, ũtũthondekere ngai iria irĩtũtongoragia; nĩ ũndũ-rĩ, mũndũ ũcio ti Musa watũrutire bũrũri wa Misiri, tũtiũĩ ũrĩa onete.
• 2. Nake Haruni akĩmera atĩrĩ, Tuai icũhĩ cia thahabu iria irĩ matũ ma atumia anyu mũcirute, o na iria irĩ matũ ma ariũ anyu, o na ma airĩtu anyu, mũndehere.
• 3. Nao andũ othe magĩtua icũhĩ icio cia thahabu iria ciarĩ matũ mao magĩcitwarĩra Haruni.
• 4. Nake akĩamũkĩra indo icio anengeretwo nĩo, agĩcitwekia, agĩcithondeka na gĩacũhia, ituĩke mũhianano ũtariĩ ta njaũ. Nao andũ arĩa maarĩ ho makiuga ũũ: Atĩrĩrĩ, wee Isiraeli, ici nĩcio ngai ciaku iria ciakũrutire bũrũri wa Misiri.
• 5. Na rĩrĩ, rĩrĩa Haruni onire ũrĩa ũhoro ũcio ũtariĩ, agĩaka kĩgongona mbere ya njaũ ĩo, nake agĩcoka akĩanĩrĩra akĩhunjia ũhoro kũrĩ andũ othe, akiuga atĩrĩ, Rũciũ nĩguo gũkagĩa gĩathĩ gĩa kũririkana Jehova.
• 6. Nao andũ othe makĩroka gũũkĩra rũcinĩ tene, makĩruta mahaki ma njino, o na magongona ma ũiguano, magĩcoka magĩikara thĩ marĩe, o na manyue; na thutha wa ũguo magĩũkĩra makĩina.
• 7. Nake Jehova akĩarĩria Musa, akĩmwĩra atĩrĩ, Ũkĩra ũikũrũke, nĩ gũkorũo andũ aku arĩa warutire bũrũri wa Misiri nĩmethũkĩtie;
• 8. nĩmagarũrũkĩte narua mũno, magatiga gũthiĩ na mĩthiĩre ĩrĩa ndamaathire mathiage nayo; nĩmatweketie indo, magethondekera mũhianano wa njaũ, nao nĩmaũinamĩrĩire makaũhoya, o na makaũrutĩra igongona, ningĩ makoiga atĩrĩ, Wee Isiraeli, ici nĩcio ngai ciaku iria ciakũrutire bũrũri wa Misiri.
• 9. Nake Jehova akĩĩra Musa atĩrĩ, Andũ aya nĩndĩmabarĩte ngona atĩ nĩ andũ aremu;
• 10. tondũ ũcio, tigana na niĩ nĩguo matũkũya makwa mamaingĩhĩre, ndĩmanine; njoke ngũtue rũrĩrĩ rũnene arĩ wee.
• 11. Nake Musa agĩthaitha Jehova Ngai wake, akiuga atĩrĩ, Jehova, nĩ kĩ gĩgũtũma matũkũya maku maingĩhĩre andũ aya aku warutire bũrũri wa Misiri na hinya mũnene, ũkĩmaruta kuo na guoko gwaku kwa hinya?
• 12. Na ningĩ atĩrĩ, Ũkũreka andũ a Misiri mahote kwaria moige ũũ nĩkĩ, atĩ Aamarutire gũkũ nĩ ũndũ wa kwenda kũmeka ũũru, akamoragĩre irĩma-inĩ, amanine matige gũtũũra thĩ? Garũrũka ũtige kũgĩa na matũkũya meĩ ũguo, wĩrire ũũru ũcio ũkwenda gwĩka andũ aku.
• 13. Ririkana Iburahimu, na Isaaka, o na Isiraeli, ndungata ciaku, iria wee mwene wehĩtĩire ũkĩĩgwetaga ũgĩciĩra atĩrĩ, Nĩngaingĩhia rũciaro rũanyu o ta njata cia igũrũ, o na ningĩ atĩrĩ, bũrũri ũyũ wothe ndaaririe ũhoro waguo-rĩ, nĩngaũhe njiaro cianyu, ũtuĩke igai rĩacio tene na tene.
• 14. Nake Jehova akĩĩricũkwo uuge ũcio oigĩte atĩ nĩegwĩka andũ acio ake ũũru.
• 15. Nake Musa akĩhũndũka, agĩikũrũka akiuma kĩrĩma-inĩ anyitĩte ihengere icio igĩrĩ cia ũira na guoko; nacio ciaandĩkĩtwo mĩena yerĩ yacio; mwena ũyũ, o na mwena ũrĩa ũngĩ, yothe yerĩ yarĩ mĩandĩke.
• 16. Nacio ihengere icio ciathondeketwo nĩ Ngai, o naguo mwandĩko ũrĩa waandĩkĩtwo ihengere-inĩ icio-rĩ, waandĩkĩtwo nĩ Ngai ũgakururũo igũrũ rĩa ihengere icio.
• 17. Na rĩrĩa Joshua aaiguire inegene rĩa andũ makĩanĩrĩra mũno, akĩĩra Musa atĩrĩ, He inegene rĩa mbaara kĩraaro-inĩ.
• 18. Nowe akiuga atĩrĩ, Mĩgambo ĩo tiyo ya andũ mekuugĩrĩria nĩ kũhootana, o na kana ya andũ megũkaya nĩ kũhootwo; no rĩrĩ, mĩgambo ĩrĩa niĩ ngũigua nĩ ya andũ mekũina.
• 19. Na gũgĩkinya atĩrĩ, atĩ rĩrĩa aakuhĩhĩirie kĩraaro-inĩ, o rĩmwe akĩona njaũ ĩo, o na andũ makĩina; nake Musa agĩcinwo nĩ marakara, akĩnyuguta ihengere icio cierĩ, agĩciũragĩra o hau kĩanda-inĩ gĩa kĩrĩma.
• 20. Nake akĩnyita njaũ ĩo maathondekete, akĩmĩcina na mwaki, akĩmĩhũranga, ĩgĩtuĩka ta mũtu, agĩcoka akĩũita maĩ-inĩ marĩa maarĩ ho, agĩtũma andũ a Isiraeli mamanyuanĩrie naguo.
• 21. Nake Musa akĩĩra Haruni atĩrĩ, Kaĩ andũ aya magwĩkĩte atĩa atĩ nĩkĩo ũmarehithĩirie wĩhia mũnene ũũ?
• 22. Nake Haruni akĩmwĩra atĩrĩ, Wee mwathi wakwa, tiga gũcinwo nĩ marakara; wee mwene nĩũũĩ ũrĩa andũ aya matũire mendaga gwĩka ũũru.
• 23. Nĩ ũndũ maanjĩrire atĩrĩ, Tũthondekere ngai iria irĩtũtongoragia; nĩ ũndũ mũndũ ũcio ti Musa watũrutire bũrũri wa Misiri, tũtiũĩ ũrĩa onete.
• 24. Na niĩ ngĩkĩmera atĩrĩ, Mũndũ o wothe ũrĩa ũrĩ na thahabu, nĩacitue; nao magĩkĩ’nengera, ngĩmĩikia mwaki-inĩ, hagĩkiuma mũhianano ũyũ wa njaũ.
• 25. Na rĩrĩ, rĩrĩa Musa onire atĩ andũ nĩmaremete o kũrema, tondũ Haruni nĩwe watũmire mareme nĩguo mathekagĩrĩrũo nĩ thũ ciao,
• 26. hĩndĩ ĩo Musa akĩrũgama thome wa hau kĩraaro-inĩ, akiuga atĩrĩ, Mũndũ o wothe ũrĩa ũrĩ mwena wa Jehova-rĩ, nĩoke haha ndĩ. Nao ariũ a Lawii othe magĩkĩũngana harĩ we.
• 27. Agĩkĩmera atĩrĩ, Jehova, Ngai wa Isiraeli, ekuuga ũũ: O mũndũ wanyu nĩeohe rũhiũ rũake rũa njora njohero, mũthiĩ kũndũ guothe kĩraaro-inĩ muumĩte mwena ũmwe, o nginya mwena ũrĩa ũngĩ, o mũndũ orage mũrũ wa ithe, na mũndũ wa thiritũ yake, o na ũrĩa maikaranĩtie nake.
• 28. Nao ariũ acio a Lawii magĩĩka o ta ũrĩa Musa oigĩte; naguo mũthenya ũcio hagĩkua ta andũ ngiri ithatũ.
• 29. Nake Musa akiuga atĩrĩ, Wĩamũrĩrei Jehova ũmũthĩ, nĩ ũndũ o mũndũ wanyu nĩokirĩire mũriũ, o na agokĩrĩra mũrũ wa ithe; nĩguo Jehova amũrathime ũmũthĩ.
• 30. Na gũgĩkinya atĩrĩ, atĩ rũciũ rũrũ rũngĩ, Musa akĩroka kwĩra andũ atĩrĩ, Nĩmwĩhĩtie wĩhia mũnene mũno; tondũ ũcio rĩu nĩngwambata ’thiĩ kũrĩ Jehova; hihi no kuona ngĩmũhoroheria nĩ ũndũ wa wĩhia wanyu.
• 31. Musa agĩgĩcoka kũrĩ Jehova, akĩmwĩra atĩrĩ, Hĩ! Andũ aya nĩmehĩtie wĩhia mũnene mũno, tondũ nĩmethondekeire ngai cia thahabu.
• 32. Na atĩrĩrĩ, ũngĩkorũo nĩũkũmohera wĩhia wao, nĩ wega; no kũngĩkorũo ti ũguo-rĩ, ndagũthaitha ũhuure rĩĩtwa rĩakwa, njehere ibuku-inĩ rĩaku rĩrĩa wandĩkĩte.
• 33. Nake Jehova akĩĩra Musa atĩrĩ, Mũndũ ũrĩa wothe ũnjĩhĩtie-rĩ, ũcio nĩwe ngũhuura rĩĩtwa rĩake ndĩmweherie ibuku-inĩ rĩakwa.
• 34. Rĩu gĩthiĩ ũgatongorie andũ ũmatware bũrũri ũrĩa ndakũheire ũhoro waguo; na atĩrĩrĩ, mũraika wakwa nĩegũgũthiĩ mbere; no rĩrĩ, mũthenya ũrĩa ngoka gũcirithania-rĩ, nĩguo ngahũrĩra andũ acio ihĩtia rĩao.
• 35. Nake Jehova akĩhũra andũ acio nĩ ũndũ wa mũhianano ũcio wa njaũ maathondekete, o ũcio wathondeketwo nĩ Haruni.

Home