Go Back

Thama Chapter 3

• 1. Na rĩrĩ, Musa nĩ gũkorũo aakorirũo akĩrĩithia ndĩithia ya mũthoniwe Jethero mũthĩnjĩri-ngai wa Midiani, nake akĩmĩtwara mbarĩ ĩrĩa ĩngĩ ya werũ wakuo, agĩkinya kĩrĩma-inĩ kĩa Ngai na kũu Horebu.
• 2. Nake mũraika wa Jehova akĩmuumĩrĩra arĩ rũrĩrĩmbĩ-inĩ rũa mwaki ruoimaga kĩhinga-inĩ, agĩcũthĩrĩria, na atĩrĩ, kĩhinga kĩu nĩ mwaki kĩraakana, na gĩtingĩhĩa.
• 3. Nake Musa akiuga atĩrĩ, Rĩu nĩngũkerũra naho, nĩ getha nyone kĩũndũ gĩkĩ, ’menye kĩrĩa gĩkũgiria kĩhinga kĩhĩe.
• 4. Nake Jehova ona atĩ egũkerũra naho nĩguo one wega-rĩ, we Ngai agĩkĩmwĩta e kĩhinga-inĩ kĩu thĩinĩ, akiuga atĩrĩ, Musa, Musa. Nake agĩcokia atĩrĩ, Niĩ ũyũ.
• 5. Agĩkiuga atĩrĩ, Menya ũkuhĩhĩrie haha; amba ũrute iratũ ciaku magũrũ, nĩ gũkorũo hau ũrũngiĩ nĩ handũ hatheru.
• 6. O na ningĩ agĩcoka akiuga atĩrĩ, Nĩ niĩ Ngai wa thoguo, Ngai wa Iburahimu, Ngai wa Isaaka, Ngai wa Jakubu. Nake Musa akĩhitha ũthiũ tondũ nĩetigagĩra gũcũthĩrĩria Ngai.
• 7. Nake Jehova akiuga atĩrĩ, Ti-itherũ nĩnyonete mĩnyarirĩko ya andũ akwa arĩa marĩ Misiri, na ngaigua kĩrĩro kĩao nĩ ũndũ wa akaburũ akuo, tondũ nĩnjũĩ maruo marĩa marĩ namo;
• 8. na niĩ ngĩikũrũkĩte nĩguo ndĩmateithũre moko-inĩ ma andũ a Misiri, ndĩmarute bũrũri ũcio, ndĩmahire bũrũri mwega mwariĩ, wa bũthi wa iria na ũũkĩ, na nĩkuo gũtũirũo nĩ kĩruka kĩrĩa gĩa Kanaani, na kĩa Ahiti, na kĩa Amori, na kĩa Perizi, na kĩa Hivi, na kĩa Jebusi.
• 9. Na rĩrĩ, rĩu kĩrĩro gĩa ciana cia Isiraeli nĩkĩnginyĩire, o na ningĩ nĩnyonete kũhinyĩrĩrio kũrĩa mahinyagĩrĩrio nĩ andũ a Misiri.
• 10. Tondũ ũcio, ũka rĩu ngũtũme kũrĩ Firauni nĩ getha ũkoimagarie andũ akwa ciana cia Isiraeli ũmarute bũrũri wa Misiri.
• 11. Nake Musa akĩũria Ngai atĩrĩ, Niĩ na niĩ ndĩ ũ wa gũthiĩ kũrĩ Firauni, nĩ getha ngoimagarie ciana cia Isiraeli ndĩcirute bũrũri wa Misiri?
• 12. Nake akĩmwĩra atĩrĩ, Ti-itherũ niĩ mwene nĩndĩrĩgĩaga hamwe nawe; naguo ũndũ ũyũ nĩguo ũgatuĩka kĩmenyithia kũrĩ wee gĩa atĩ nĩ niĩ ngũtũmĩte; atĩrĩrĩ, rĩrĩa ũgakorũo ũrĩkĩtie kuumagaria andũ acio ũkamaruta bũrũri wa Misiri, nĩ gũkũ kĩrĩma-inĩ gĩkĩ mũgatungatĩra Ngai.
• 13. Nake Musa akĩũria Ngai atĩrĩ, Rĩrĩa ngakinya kũrĩ ciana cia Isiraeli, ndĩciĩre ũũ: Ngai wa maithe manyu nĩwe ũndeketie kũrĩ inyuĩ, nacio injũrie atĩrĩ, Agĩĩtagwo atĩa? ngagĩciĩra atĩa hihi?
• 14. Nake Ngai akĩĩra Musa atĩrĩ, NIĨ NDŨIRE O TA ŨRĨA NDŨIRE; agĩcoka akiuga atĩrĩ, Ĩra ciana cia Isiraeli ũũ, atĩ ũrĩa wĩtagwo NIĨ NDŨIRE, nĩwe ũndũmĩte kũrĩ inyuĩ.
• 15. O na ningĩ Ngai akĩĩra Musa atĩrĩ, Ĩra ciana cia Isiraeli ũũ, atĩ Jehova, o we Ngai wa maithe manyu, o we Ngai wa Iburahimu, Ngai wa Isaaka, Ngai wa Jakubu, nĩwe ũndũmĩte kũrĩ inyuĩ; rĩu nĩrĩo rĩĩtwa rĩakwa tene na tene, na nĩrĩo kĩririkanania gĩakwa o nginya njiaro na njiaro.
• 16. Thiĩ ũũnganie athuri a Isiraeli, maikare hamwe, ũcoke ũmere atĩrĩ, Jehova, o we Ngai wa maithe manyu, o we Ngai wa Iburahimu, wa Isaaka, wa Jakubu, nĩanyumĩrĩire, akoiga atĩrĩ, Ti-itherũ nĩnjũkĩte kũmũng’ethera, na nĩnyonete maũndũ marĩa mwĩkagwo kũu Misiri;
• 17. niĩ na niĩ ngoiga atĩrĩ, Nĩngũmũruta mĩnyarirĩko-inĩ ya Misiri, ndĩmũhire bũrũri ũrĩa wa kĩruka gĩa Kanaani, na kĩa Ahiti, na Amori, na Perizi, na Hivi, na Jebusi, na nĩ bũrũri wa bũthi wa iria na ũũkĩ.
• 18. Nao nĩmagagĩthikĩrĩria mũgambo waku; nawe ũcoke ũthiĩ kũrĩ mũthamaki wa Misiri mũrĩ na athuri acio a Isiraeli mũmwĩre atĩrĩ, Jehova, o we Ngai wa Ahibirania, nĩatũkorete; tondũ wa ũguo, ta gĩtũhe rũtha tũthiĩ rũgendo rũa mĩthenya ĩtatũ werũ-inĩ nĩguo tũkarute igongona rĩa kũhaka Jehova Ngai witũ.
• 19. Na nĩnjũĩ atĩ mũthamaki wa Misiri ndetĩkĩra kũmũhe rũtha mũthiĩ, o na kũngĩĩkwo ũndũ wa hinya.
• 20. Na rĩrĩ, niĩ na niĩ nĩngatambũrũkia guoko gwakwa, ’hũre Misiri na maũndũ makwa mothe ma kũgegania marĩa ngeka o kũu bũrũri ũcio thĩinĩ, na thutha wa ũguo nĩakamũhe rũtha mũthiĩ.
• 21. Na niĩ nĩngatũma rũrĩrĩ rũanyu rũĩtĩkĩrĩke nĩ andũ a Misiri, na nĩgũgakinya atĩrĩ, atĩ rĩrĩa mũgathiĩ, mũtigathiĩ moko matheri;
• 22. no rĩrĩ, mũtumia o mũtumia nĩagetia ũrĩa ũngĩ makuhanĩrĩirie, o na mũgeni ũrĩa ũikaranĩtie nake nyũmba, indo cia betha, na cia thahabu, o na nguo; nacio-rĩ, nĩmũgaciĩkĩra ariũ anyu na airĩtu anyu; na nĩ kũhomia mũgakĩhomia andũ acio a Misiri.

Home