Go Back

Thama Chapter 26

• 1. O na ningĩ nĩũgathondeka gĩikaro kĩgĩe na matama ikũmi macunjurĩtio, na mathondekwo na gatani ya ndigi njeke ciogothetwo, na ndigi cia rangi wa bururu, na wa zambarau, o na wa gakarakũ, na magemio na mĩhianano ya makerubi ĩtumanĩtio namo nĩ mũndũ mũũhĩgĩrĩru wĩra ũcio.
• 2. Naguo ũraihu wa tama o tama ũtuĩke mĩkono mĩrongo ĩĩrĩ na ĩnana, na kwarama kwaguo gũtuĩke mĩkono ĩna; namo matama macio mothe maiganane na mĩena yothe.
• 3. Matama matano-rĩ, nĩmanyitithanio hamwe, maturumithanio, na macio mangĩ matano manyitithanio hamwe, maturumithanio o ro ũguo.
• 4. Ningĩ ũgakundĩkĩrĩra ciana cia ndigi cia rangi wa bururu, ũciĩkĩre mwena-inĩ wa tama wa mbere ũũrutĩtie mũthia-inĩ wa harĩa matama mekũnyitithanĩrio; o na ningĩ wĩke o ta ũguo mũthia-inĩ wa tama wa kerĩ ũrĩa ũrigĩtie na nja o handũ harĩa ũkũnyitithanĩrio na ũrĩa ũngĩ.
• 5. Ũgakundĩka ciana mĩrongo ĩtano cia ndigi ũciĩkĩre tama-inĩ ũmwe; o na ũkundĩke ciana ingĩ mĩrongo ĩtano cia ndigi, ũciĩkĩre mwena-inĩ wa tama ũcio ũngĩ wa kerĩ harĩa ũkũnyitithanĩrio na ũrĩa ũngĩ; nacio ciana icio ciikare iringaine.
• 6. Ningĩ ũcoke ũthondeke ngathĩka mĩrongo ĩtano cia thahabu ũnyitithanie matama macio, nĩguo gĩikaro kĩu gĩtuĩke kĩndũ o ro kĩmwe.
• 7. Ningĩ ũgathondeka matama ma gũcunjurio ma ngore cia mbũri matuĩke hema ya kũhumba gĩikaro kĩu; ũmathondeke ikũmi na ũmwe.
• 8. Na rĩrĩ, ũraihu wa tama o tama nĩũtuĩke mĩkono mĩrongo ĩtatũ, na kwarama gwa tama o tama gũtuĩke mĩkono ĩna; namo matama macio ikũmi na ũmwe maiganane na mĩena yothe.
• 9. Matama matano-rĩ, nĩũkamanyitithania meikarie mwanya, namo marĩa mangĩ matandatũ ũkamanyitithania o ro ũguo, meikarie mwanya; naguo tama wa ĩtandatũ ũkaũthunanĩra mwena wa na mbere wa hema.
• 10. Ningĩ ũgakundĩkĩrĩra ciana mĩrongo ĩtano cia ndigi, ũciĩkĩre mũthia-inĩ wa tama handũ harĩa matama mekũnyitithanĩrio; o na ũkundĩkĩrĩre ciana ingĩ mĩrongo ĩtano ũciĩkĩre mũthia-inĩ wa tama wa kerĩ harĩa ũkũnyitithanĩrio na ũrĩa ũngĩ.
• 11. Ũcoke ũthondeke ngathĩka mĩrongo ĩtano cia gĩcango ũcitonyie ndigi-inĩ cia ciana icio ngundĩke ũnyitithanie matama macio, nĩ getha hema ĩo ĩtuĩke kĩndũ o ro kĩmwe.
• 12. Nakĩo gĩcunjĩ kĩa matama macio ma hema ĩo kĩrĩa kĩraiharaihu gũkĩra harĩa gĩikaro kĩu gĩakinya, o kĩu gĩgũikara gĩcunjurĩte na mwena wa thutha-rĩ, nĩkĩrekwo gĩcunjure o ro ũguo na kũu thutha wa gĩikaro.
• 13. Naguo mũkono ũmwe wa matama ma mwena ũmwe, o na mũkono ũmwe wa mwena ũcio ũngĩ, nayo nĩ ya icunjĩ cia matama iria itigarĩte nĩ ũndũ wa ũrĩa tama wa hema ũraihĩte, icio-rĩ, nĩciikare icunjurĩte mĩena-inĩ ya gĩikaro kĩu mwena ũyũ, o na mwena ũrĩa ũngĩ, nĩ getha kĩhumbwo nĩcio.
• 14. Ningĩ ũcoke ũthondekere hema ĩo kĩandarũa kĩa njũa cia ndũrũme, itoboketio rangi-inĩ igatunĩha, gĩa kũmĩhumbĩra o na ũthondeke kĩandarũa kĩngĩ kĩa njũa cia pomboo, gĩa gwĩkĩrũo igũrũ rĩa kĩu kĩngĩ.
• 15. Ningĩ ũgaatũra mbaũ cia gwaka gĩikaro kĩu cia mũtĩ ta mũgaa, cia kũrũgamagio na igũrũ.
• 16. Na kũraiha kwa rũbaũ, o rũbaũ, gũtuĩke mĩkono ikũmi; na kwarama gwacio, o rũbaũ, gũtuĩke mũkono ũmwe na nuthu.
• 17. Ningĩ o rũbaũ rũgĩe na tũng’ote twĩrĩ twa kũnyitithania mbaũ icio; ũguo nĩguo ũgathondeka mbaũ ciothe cia gĩikaro kĩu.
• 18. Nacio mbaũ cia mwena wa gũthini wa gĩikaro kĩu, o ũcio ũrorete na kũu gũthini, ũcithondeke mĩrongo ĩĩrĩ.
• 19. Ningĩ ũcoke ũthondeke makinya ma betha mĩrongo ĩna, ma kũgĩa na thĩ ya mbaũ icio mĩrongo ĩĩrĩ, hagĩe makinya merĩ ma kũigĩrĩrũo rũbaũ rũmwe, nĩ getha tũng’ote tũu twĩrĩ twa kũnyitithania tũtonyagio thĩinĩ wamo, o na hagĩe makinya mangĩ merĩ ma kũigĩrĩrũo rũbaũ rũrĩa rũngĩ rũa kerĩ nĩ getha tũng’ote twaruo twa kũrũnyitithania tũtonyagio thĩinĩ wamo.
• 20. Ningĩ mwena ũrĩa ũngĩ wa gĩikaro kĩu, o ũrĩa ũrorete gathigathini, ũgĩe mbaũ ingĩ mĩrongo ĩĩrĩ,
• 21. hamwe na makinya ma cio mĩrongo ĩna ma betha; o makinya merĩ ma kũigĩrĩrũo rũbaũ rũmwe, o na makinya mangĩ merĩ ma kũigĩrĩrũo rũbaũ rũrĩa rũngĩ.
• 22. Ningĩ mwena wa na thutha wa gĩikaro kĩu, ũrĩa ũrorete ithũĩro, ũkaũthondekera mbaũ ithathatũ.
• 23. Ningĩ ũgathondeka mbaũ igĩrĩ cia gwĩkĩrũo tuune-inĩ twerĩ twa na kũu thutha wa gĩikaro kĩu,
• 24. irutio o mũhuro irĩ o igĩrĩ igĩrĩ, ithiĩ inyitithanĩtio o ro ũguo ciambatanie ikinyĩre gĩcũhĩ kĩrĩa kĩrĩ o igũrũ mũno gĩa koine-inĩ; nacio mbaũ icio cierĩ ũgacithondeka o ro ũguo, ituĩke cia tuune tũu twerĩ,
• 25. handũ hau hagĩe mbaũ inyanya na makinya ma cio ma betha ikũmi na matandatũ, o makinya merĩ ma kũigĩrĩrũo rũbaũ rũmwe, o na mangĩ merĩ ma kũigĩrĩrũo rũbaũ rũrĩa rũngĩ.
• 26. Ningĩ ũcoke ũthondeke mĩgamba ya mĩtĩ ta mũgaa; ĩtano yayo ĩtuĩke ya kũnyita mbaũ cia mwena ũmwe wa gĩikaro kĩu,
• 27. o na ĩngĩ ĩtano ya kũnyita mbaũ cia mwena ũrĩa ũngĩ wakĩo; na hacoke hagĩe mĩgamba ĩngĩ ĩtano ya kũnyita mwena wa na thutha wa gĩikaro kĩu, o ũrĩa ũrorete ithũĩro.
• 28. Naguo mũgamba wa gatagatĩ, o ũcio ũgwĩkĩrũo gatagatĩ ka mbaũ icio irũngiĩ, ũtuĩkanĩrie gatagatĩ gacio, ũkinye mũthia ũyũ, na ũrĩa ũngĩ.
• 29. Nacio mbaũ icio irũngiĩ ciothe ũgacihumba igũrũ guothe na thahabu, na icũhĩ ciacio, iria igũtonyio mĩgamba, ũcithondeke cia thahabu, ningĩ o nayo mĩgamba ũmĩhumbe igũrũ guothe na thahabu.
• 30. Nakĩo gĩikaro kĩu ũgagĩaka o ta ũrĩa mũthondekere wakĩo ũrĩa wonetio kĩrĩma-inĩ watariĩ.
• 31. Ningĩ ũgatuma gĩtama gĩa kũhakania na ndigi cia rangi wa bururu, na wa zambarau, na wa gakarakũ, o na gatani ya ndigi njeke ciogothetwo; na kĩgemio na mĩhianano ya makerubi ĩtumanĩtio nakĩo nĩ mũndũ mũũhĩgĩrĩru wĩra ũcio.
• 32. Na rĩrĩ, nĩũgagĩcuuria itugĩ-inĩ inya cia mũtĩ ta mũgaa, ihumbĩtwo igũrũ guothe na thahabu; na ciĩkĩrũo tũhocio twa thahabu, o na itonyio makinya-inĩ mana ma betha.
• 33. Nakĩo gĩtama kĩu gĩa kũhakania ũgagĩcuuria mũhuro wa mũhari ũrĩa ũrĩ ngathĩka, narĩo ithandũkũ rĩa ũira ũrĩtonyie na kũu mbarĩ ĩrĩa ĩngĩ ya gĩtama kĩu, nakĩo gĩtama kĩu kĩmũhakanĩrie handũ harĩa hatheru, o na harĩa hangĩ hatheru mũno makĩria.
• 34. Ningĩ gĩikaro-gĩa-tha ũgakĩigĩrĩra igũrũ rĩa ithandũkũ rĩa ũira, o handũ hau hatheru mũno thĩinĩ.
• 35. Nayo metha ũmĩige mwena wa na nja wa gĩtama kĩu gĩa kũhakania, naguo mũtĩ wa kũigĩrĩrũo mataa ũũige mwena-inĩ wa gĩikaro ũrĩa ũrorete gũthini ũng’ethanĩire na metha; o nayo metha yo nyene ũmĩige mwena ũrĩa ũrorete gathigathini.
• 36. Naguo mũromo-inĩ wa Hema-rĩ, ũgacuuria tama ũngĩ wa kweheheragio ũthondeketwo nĩ mũndũ mũũhĩgĩrĩru ũtumi wa ndigi cia rangi wa bururu, na wa zambarau, na wa gakarakũ, o na gatani ya ndigi njeke ciogothetwo.
• 37. Ningĩ tama ũcio wa kweheheragio ũũthondekere itugĩ ithano harĩa ũrĩhocagio, nacio ituĩke cia mũtĩ ta mũgaa, na ũcihumbe igũrũ guothe na thahabu; na tũhocio twacio tũtuĩke twa thahabu, na ũcithondekere makinya matano ma gĩcango.

Home