Go Back

Thama Chapter 23

• 1. Ndũkanamemerekie ndeto cia maheni; ningĩ ndũkaneĩkĩre he mũndũ mwaganu ũhoro-inĩ wa kũiganĩrĩra kĩgenyo.
• 2. Ndũkanarũmanĩrĩre na mũingĩ ũgeke ũũru hamwe naguo, o na kana warie ũhoro wa kũhotomia cira nĩ ũndũ wa kwenda kũrũmanĩrĩra na mũingĩ;
• 3. ningĩ ndũkanenderere mũndũ mũkĩa cira-inĩ wake.
• 4. Ũngĩtũnga ndegwa ya mũndũ ũrĩa mũrĩ ũthũ nake yũrĩte, o na kana ndigiri-rĩ, ndũrĩ hingo ũtaagĩrĩirũo nĩ kũmũcokeria.
• 5. Ningĩ ũngĩona ndigiri ya mũndũ ũrĩa ũgũthũũrĩte ĩgũĩte ĩkaremererũo nĩ mũrigo wayo, nawe ũkorũo ũkĩigua ta ũtangĩmũteithia-rĩ, no mũhaka mũteithanie nake kũmĩoya.
• 6. Ndũkanathũkĩrie mũthĩni wanyu cira wake ũrĩa e naguo.
• 7. Themaga ũhoro o wothe wa maheni; ningĩ ndũkanoragithie mũndũ ũtarĩ ũũru ekĩte, kana ũrĩa mũthingu; nĩ gũkorũo niĩ ndingĩtua atĩ mũndũ mwaganu nĩ mũthingu.
• 8. Ndũkanaamũkĩre ihaki o na atĩa, nĩ ũndũ ihaki nĩrĩo rĩtũmaga arĩa me na maitho matuĩke atumumu, narĩo nĩrĩo rĩthũkagia cira wa ũrĩa mũthingu.
• 9. Na ndũkanahinyĩrĩrie mũndũ wa kũngĩ, nĩ gũkorũo nĩmũũĩ ũrĩa ngoro ya mũndũ ũrĩa ũikarĩte bũrũri ũtarĩ wao ĩiguaga, kuona atĩ o na inyuĩ nĩmwaikarĩte bũrũri ũtarĩ wanyu o kũu Misiri.
• 10. Handaga irio mĩgũnda ya bũrũri waku mĩaka ĩtandatũ, na ũgethe irio ciothe iria ciumĩtie mĩaka ĩo;
• 11. no mwaka wa mũgwanja nĩũkareka ĩhurũke ĩruĩre, nĩguo andũ arĩa athĩni maakanĩtie nawe monage gĩa kũrĩa; nacio irio iria maatigia irĩagwo nĩ nyamũ cia werũ. O ũguo noguo ũgekaga mũgũnda waku wa mĩthabibu o naguo, o na wa mĩtamaiyũ.
• 12. Ningĩ nĩ mĩthenya ĩtandatũ ũkarutaga wĩra waku, na mũthenya wa mũgwanja ũkahurũka, nĩ getha ndegwa yaku na ndigiri ihurũkage, o na ningĩ nĩ getha mũrũ wa ngombo yaku ya mũirĩtu, na mũgeni ũrĩa wĩ gwaku mũciĩ, manogokage.
• 13. Na rĩrĩ, maũndũ marĩa mothe ndĩmwĩrĩte-rĩ, mamenyagĩrĩrei; na mũtikanagwete marĩĩtwa ma ngai ingĩ, kana maiguwo makĩgwetwo na kanua gaku.
• 14. Atĩrĩrĩ, nĩ mahinda matatũ o mwaka ũgatua ma gĩathĩ gĩa kũndirikana.
• 15. Gĩathĩ kĩa mbere-rĩ, nĩ kĩa mĩgate ĩrĩa ĩtarĩ mĩimbie; nĩ matukũ mũgwanja ũkarĩaga mĩgate ĩo ĩtarĩ mĩimbie, o ta ũrĩa ndagwathire, na gĩathĩ kĩu kĩgĩage mweri wa Abibu o ta ũrĩa gwatuirũo (nĩ gũkorũo mweri ũcio nĩguo mwoimire Misiri); na mbere yakwa hatikanoneke mũndũ o na ũrĩkũ wĩ moko matheri.
• 16. Gĩathĩ kĩrĩa kĩngĩ nĩ imatha rĩa irio cia mũro wa mbere, iria wahandire mũgũnda waku; o Nakĩo kĩrĩa kĩngĩ nĩ kĩa igetha rĩa irio ciothe ciitwo makũmbĩ, mwaka ũgĩthiĩ gũthira, o hĩndĩ ĩrĩa ũkũgetha irio cia mĩgũnda ĩrĩa ũrutaga wĩra
• 17. Nĩ mahinda matatũ o mwaka arũme othe thĩinĩ wanyu marĩthiaga kwĩonania mbere ya Mwathani Jehova.
• 18. Ndũkanathenganĩrĩrie mũgate mũimbie na thakame ya igongona rĩakwa, o na kana ũreke maguta ma gĩathĩ gĩakwa matigare maraare makinyie rũcinĩ
• 19. Maciaro ma mbere ma irio cia mũro wa mbere cia mĩgũnda yaku, ũrĩmatwaraga nyũmba ya Jehova Ngai waku. Na ningĩ-rĩ, ndũkanaruge kori na iria rĩa nyina.
• 20. Atĩrĩrĩ, nĩngũrekia mũraika agũtongorie, na akũmenyagĩrĩre njĩra-inĩ ũgĩthiĩ, agũkinyie kũndũ kũrĩa ngũthondekeire.
• 21. Menyagĩrĩrai mũno ũhoro wake, na mũiguage mũgambo wake, na mũtikamũrakarie nĩ gũkorũo mwaagarara watho, ndakamuohera nĩ ũndũ rĩĩtwa rĩakwa rĩĩ thĩinĩ wake.
• 22. No rĩrĩ, ũngĩigua mũgambo wake na ma, na wĩkage ũrĩa wothe njugaga-rĩ, nĩndĩrĩtuĩkaga thũ ya thũ ciaku, o na nduĩke mũmuku wa amuku aku.
• 23. Nĩ gũkorũo mũraika wakwa nĩegũkũgĩa mbere, agũkinyie mabũrũri ma Aamori, na Ahiti, na Aperizi, na Akanaani, na Ahivi, o na Ajebusi, na nĩngamanina.
• 24. Ndũkanainamĩrĩre ngai ciao ũcihoe, kana ũcitungatĩre, kana wĩke ũndũ o na ũmwe ũkoniĩ ngai icio, no rĩrĩ, nĩũgacing’aũranagia biũ, nacio itugĩ ciao cia kũhoyũo ũciunange tũcunjĩ.
• 25. Jehova Ngai wanyu nowe inyuĩ mũgatungatĩra, nake nĩakarathima irio cianyu, o na maĩ marĩa mũkanyuaga; na nĩngamwehereria mĩrimũ yume thĩinĩ wanyu.
• 26. Bũrũri waku-rĩ, gũtikoneka nda o na ĩmwe ĩkũhuna, kana ĩgũthata o namo matukũ marĩa wee waathĩrĩirio gũtũũra muoyo-rĩ, nĩngamahingia.
• 27. Nĩngatũma ũhoro wakwa ũrĩa ũguoyohanagia ũkũgĩage mbere, na nĩnganyaririthia ndũrĩrĩ ciothe iria ũgakinya gwacio, na ndũme thũ ciaku ciothe ikũhutatĩre ciũre.
• 28. Ningĩ nĩngarekia magi me mbora, mathiage kũu mbere yaku, makaingate Ahivi, na Akanaani, o na Ahiti, makweherere.
• 29. Na rĩrĩ, ndikamaingata makweherere mwaka o ro ũmwe, nĩ getha hihi bũrũri ndũgatigwo ũkirĩte ihooru, nacio nyamũ cia werũ ciingĩhe kuo mũno ikũnyarirage.
• 30. No rĩrĩ, ngamaingata hanini, o hanini, nĩguo makweherere, o nginya hĩndĩ ĩrĩa mũgakorũo mũingĩhĩte a kũgaya bũrũri ũcio.
• 31. Naguo mũhaka wa bũrũri waku, ngaũrutia o Iria Itune, ndĩũkinyie o iria-inĩ rĩa Afilisti, ningĩ ndĩũrutie werũ-inĩ ndĩũkinyie o Rũũĩ rũa Farati nĩ ũndũ-rĩ, andũ arĩa matũũraga bũrũri ũcio nĩngamarekereria ndĩmaneane moko-mĩ manyu, nawe nĩũkamaingata makweherere.
• 32. Mũtikanagĩe kĩrĩkanĩro o na kĩrĩkũ nao, kana kĩrĩkanĩro na ngai ciao.
• 33. Andũ acio matikanatũũre bũrũri waku, nĩguo matigatũme ũnjĩhie nĩ ũndũ ũngĩgatungatĩra ngai ciao, ũndũ ũcio ndũrĩ hingo ũtagakũgucĩrĩria wagane.

Home