Go Back

Thama Chapter 20

• 1. Nake Ngai akĩaria mohoro maya mothe, akiuga atĩrĩ,
• 2. Niĩ nĩ niĩ Jehova Ngai waku ũrĩa wakũrutire bũrũri wa Misiri, o nyũmba-inĩ ya ũkombo.
• 3. Ndũkanagĩe na ngai ingĩ tiga niĩ.
• 4. Ndũkanethondekere mũhianano mwacũhie, kana mũhianĩre wa kĩndũ o gĩothe gĩĩ kũrĩa igũrũ, kana wa kĩndũ gĩĩ gũkũ thĩ, kana wa kĩndũ kĩĩ maĩ-inĩ marĩa me mũhuro wa thĩ;
• 5. ndũkanaciinamĩrĩre kana ũcitungatĩre; nĩ gũkorũo niĩ Jehova Ngai waku ndĩ Ngai wĩ ũiru, ngakinyĩria ciana waganu wa maithe, nginya rũciaro rũa gatatũ na rũa kana rũa andũ arĩa ma’thũire;
• 6. na ngaiguĩra andũ ngiri na ngiri tha, o arĩa manyendete na makaigua maathani makwa.
• 7. Ndũkanagwete rĩĩtwa rĩa Jehova Ngai waku na itherũ, nĩ gũkorũo Jehova ndakoiga atĩ mũndũ ndehĩtie ũrĩa ũgwetaga rĩĩtwa rĩake na itherũ.
• 8. Ririkanaga mũthenya wa thabatũ ũwamũrage.
• 9. Rutaga wĩra mĩthenya ĩtandatũ, ũgeka maũndũ maku mothe;
• 10. no mũthenya wa mũgwanja nĩ thabatũ ya Jehova Ngai waku; mũthenya ũcio ndũkanarute wĩra o na ũrĩkũ, wee mwene, kana mũrũguo, kana mwarĩguo, kana ndungata yaku ya mũndũ mũrũme, kana ya mũndũ-wa-nja, kana ũhiũ waku, kana mũgeni ũrĩa ũrĩ gwaku mũciĩ;
• 11. nĩ gũkorũo Jehova ombire igũrũ na thĩ, na iria rĩrĩa rĩnene, o na indo ciothe iria irĩ kuo mĩthenya ĩtandatũ; akĩhurũka mũthenya wa mũgwanja; nĩ ũndũ ũcio Jehova akĩrathima mũthenya ũcio wa thabatũ, akĩwamũra.
• 12. Tĩa thoguo na nyũkwa, nĩguo matukũ maku maingĩhe ma gũtũũra bũrũri ũrĩa ũheetwo nĩ Jehova Ngai waku.
• 13. Ndũkanoragane.
• 14. Ndũkanatharanie.
• 15. Ndũkanaiye.
• 16. Ndũkanaigĩrĩre mũndũ ũrĩa ũngĩ kĩgenyo.
• 17. Ndũkanacumĩkĩre nyũmba ya mũndũ ũrĩa ũngĩ, ndũkanacumĩkĩre mũka wa mũndũ ũrĩa ũngĩ, kana ũcumĩkĩre ndungata yake ya mũndũ mũrũme kana ya mũndũ-wa-nja, kana ndegwa yake, kana ndigiri yake, o na kana kĩndũ gĩake gĩothe.
• 18. Na rĩrĩ, andũ arĩa othe maarĩ ho makĩigua ngwa ikĩgamba, na makĩona heni, o na makĩigua mũgambo wa coro ũkĩgamba; ningĩ makĩona kĩrĩma kĩu gĩgĩtoga ndogo; na mona maũndũ macio, makĩinaina, magĩthenga hau makĩrũgama haraya.
• 19. Magĩkĩĩra Musa atĩrĩ, Aragia na ithuĩ arĩ wee, na nĩtũkũigua, no Ngai nĩagĩtige kwaria na ithuĩ tũtigakue.
• 20. Nake Musa akĩĩra andũ atĩrĩ, Tigai gwĩtigĩra; nĩ gũkorũo Ngai nĩ gũũka okĩte kũmũgeria, na atĩ ũhoro wake wa ũrĩa etigagĩrũo ũmũkore, mũtikehie.
• 21. Nao andũ acio magĩkĩrũgama haraya, nake Musa agĩkuhĩhĩria nduma-inĩ ĩrĩa ndumanu harĩa Ngai aarĩ.
• 22. Nake Jehova akĩĩra Musa atĩrĩ, Ũyũ nĩguo ũhoro ũrĩa ũkwĩra ciana cia Isiraeli, atĩrĩ, Inyuĩ inyuene nĩmwĩoneire atĩ nĩ niĩ njarĩtie na inyuĩ ndĩ o igũrũ.
• 23. Mũtikanathondeke ngai ingĩ cia kũhoyanĩrio na niĩ, ngai cia betha, o na kana ngai cia thahabu; mũtikanaciĩthondekere o na atĩa.
• 24. ’Thondekagĩra kĩgongona ũgĩake na tĩri, na ũrutagĩre igũrũ rĩakĩo mahaki maku ma njino o na magongona ma ũiguano, ma ndũrũme ciaku, o na ndegwa ciaku; o na ningĩ atĩrĩ, kũndũ kũrĩa guothe ndĩrĩtũmaga rĩĩtwa rĩakwa rĩririkanagĩrũo-rĩ, kũu nĩkuo ndĩrĩmũkoraga, na nĩndĩrĩmũrathimaga.
• 25. O na ũngĩkorũo nĩũkanjakĩra kĩgongona na mahiga-rĩ, ndũkanagĩake na mahiga maicũhie; nĩ ũndũ-rĩ, ũngĩkĩrutĩra wĩra na gĩacũhia ũgĩgĩaka-rĩ, nĩũgakĩgwatia thahu.
• 26. Ningĩ-rĩ, ndũkanahaice kĩgongona-inĩ gĩakwa na ngaathĩ, nĩ getha ndũkonwo ta wĩ njaga wĩ ho.

Home