Go Back

Thama Chapter 18

• 1. NA RĨRĨ, Jethero, mũthĩnjĩri-Ngai wa Midiani, mũthoniwe wa Musa, akĩigua ũhoro wothe ũrĩa Ngai ekĩte nĩ ũndũ wa Musa, o na ũndũ wa andũ ake Aisiraeli, wa ũrĩa Jehova aamarutire Misiri.
• 2. Nake Jethero, mũthoniwe ũcio wa Musa, nĩwe watũire na Zipora, mũtumia wa Musa, rĩrĩa aamũcokirie gwa ithe
• 3. me na tũhĩĩ twake twĩrĩ; natuo kamwe getagwo Gerishomu, nĩ ũndũ oigire atĩrĩ, Ndũũrĩte bũrũri ũtarĩ witũ ndĩ mũgeni kuo;
• 4. nako karĩa kangĩ getagwo Eliezeri, nĩ ũndũ oigire atĩrĩ, Ngai wa awa, nĩwe warĩ mũndeithia, na nĩwe wa’honokirie ndikoragithio na rũhiũ rũa Firauni.
• 5. Nake Jethero ũcio mũthoniwe wa Musa agĩthiĩ he Musa me na tũhĩĩ tũu twake o na mũtumia wake, akĩmũkora o kũu werũ-inĩ kũrĩa andũ maambĩte hema ciao, kĩrĩma-inĩ kĩa Ngai;
• 6. nake akĩĩra Musa atĩrĩ, Nĩ niĩ Jethero mũthoniguo, na nĩ gũũka ndoka kũrĩ wee twĩ na mũtumia waku na tũhĩĩ twake twerĩ.
• 7. Nake Musa akiumagara, agĩthiĩ gũtũnga mũthoniwe, agĩkĩmũinamĩrĩra, o na akĩmũmumunya; nao erĩ, o mũndũ akĩhoya ũrĩa ũngĩ ũhoro wake; magĩcoka magĩtonya hema.
• 8. Ningĩ Musa agĩkĩhe mũthoniwe ũhoro wa maũndũ mothe marĩa Jehova ekĩte Firauni, o na andũ a Misiri, nĩ ũndũ wa andũ a Isiraeli, o na akĩmũhe ũhoro wa maũndũ mothe ma thĩna marĩa moneire njĩra magĩthiĩ, o na ũrĩa Jehova aamahonokirie kũrĩ mo.
• 9. Nake Jethero agĩkena mũno nĩ ũndũ wa maũndũ macio mothe mega Jehova ekĩte nĩ ũndũ wa andũ a Isiraeli, akĩmahonokia akĩmaruta moko-inĩ ma andũ a Misiri.
• 10. Nake Jethero akiuga atĩrĩ, Jehova ũcio wamũhonokirie inyuĩ akĩmũruta moko-inĩ ma andũ a Misiri, o na akĩmũruta guoko-inĩ kwa Firauni, arogathwo, o ũcio wahonokirie andũ akĩmaruta moko-inĩ ma andũ a Misiri.
• 11. Rĩu ti-itherũ ndĩ kũmenya atĩ Jehova nĩwe mũnene gũkĩra ngai ciothe; o na mũno nĩ ũndũ wa ũrĩa aamakĩririe hinya menenehetie.
• 12. Nake Jethero, mũthoniwe wa Musa, akĩrehe kĩndũ gĩa kũrutĩra Ngai ihaki rĩa njino, o na indo cia magongona mangĩ; nake Haruni, o na athuri arĩa angĩ othe a ciana cia Isiraeli, magĩthiĩ kũrĩanĩra irio na mũthoniwe ũcio wa Musa me mbere ya Ngai.
• 13. Na gũgĩkinya atĩrĩ, atĩ rũciũ rũrũ rũngĩ, Musa akĩroka gũikara thĩ acirĩre andũ acio; nao magĩtinda marũgamĩte marigicĩirie Musa kuuma rũcinĩ nginya o hwaĩ-inĩ.
• 14. Na rĩrĩ, mũthoniwe wa Musa ona maũndũ mothe marĩa ekaga andũ acio, akiuga atĩrĩ, Ũndũ ũyũ ũrekana na andũ aya-rĩ, nĩ ũrĩkũ? Ũgũikara thĩ arĩ o wee wiki, nao andũ aya othe magatinda marũgamĩte makũrigicĩirie kuuma rũcinĩ nginya o hwaĩ-inĩ nĩ ũndũ kĩ?
• 15. Musa agĩkĩĩra mũthoniwe atĩrĩ, Nĩ ũndũ andũ aya mokaga kũrĩ niĩ matuĩrie ũrĩa Ngai ekwenda;
• 16. na hĩndĩ ĩrĩa me na kaũndũ mokaga kũrĩ niĩ, na niĩ ngamatuithania o mũndũ na mũndũ ũrĩa ũngĩ, ngamamenyithia irĩra cia watho wa Ngai wa kũrũmĩrĩrũo, o na mawatho make.
• 17. Nake mũthoniwe wa Musa akĩmwĩra atĩrĩ, Ũndũ ũyũ ũreka ti mwega.
• 18. Ti-itherũ weka ũguo nĩũkwĩagia hinya wee mwene, o na wagie andũ aya mwĩ nao hinya; nĩ ũndũ ũhoro ũcio nĩũgũkũritũhĩra mũno; ndũngĩhota gũtũũra wĩkaga ũndũ ũcio ũrĩ o wiki.
• 19. Rĩu ta gĩthikĩrĩrie mũgambo wakwa ngĩgũtaara, o nake Ngai arogĩa hamwe nawe. Wee mwene-rĩ, tũũra ũrũgamĩrĩire andũ aya mbere ya Ngai, na ũtwaragĩre Ngai maũndũ mao,
• 20. na ũmarutage irĩra cia watho wa Ngai wa kũrũmĩrĩrũo, o na mawatho make, o na ũmonagĩrĩrie mĩthiĩre ĩrĩa maagĩrĩirũo nĩ gũthiaga nayo, o na wĩra ũrĩa maagĩrĩirũo nĩ kũrutaga.
• 21. Ningĩ atĩrĩ, thĩinĩ wa andũ aya-rĩ, wĩthurĩre andũ amwe arĩa ahoti, metigĩrĩte Ngai, na aaria a ũhoro-wa-ma, na arĩa mathũũrĩte kwamũkĩra ihaki, ũmatue anene gũkĩra arĩa angĩ nĩguo mamarorage, na maathage andũ ngiri o ngiri, na igana o igana, na mĩrongo ĩtano ĩtano, o na ikũmi ikũmi;
• 22. na ũreke andũ acio matuithanagie andũ macira mao ma mahinda mothe, na gũtuĩke atĩrĩ, atĩ ũndũ o wothe ũrĩa waneneha makũrehagĩre arĩ wee, no rĩrĩ, maũndũ mothe marĩa manyinyi, matuage cira wamo arĩ o. Kũngĩtuĩka ũguo-rĩ, wee wahũthĩrũo nĩ maũndũ, mũtwaranie mũrigo ũcio nao.
• 23. Ũngĩĩka ũndũ ũcio, o nake Ngai agwathe wĩkage o ro ũguo-rĩ, hĩndĩ ĩo wee wakĩhota gũtũũra wĩ mwega, o nao andũ aya othe maaya kũhota gũcoka kwao na ũhoreri.
• 24. Tondũ ũcio Musa akĩigua mũgambo wa mũthoniwe, agĩĩtĩkĩra ũhoro ũcio, nake agĩĩka maũndũ macio mothe o ta ũguo oigĩte.
• 25. Musa agĩgĩthura andũ arĩa ahoti kĩrĩndĩ-inĩ gĩa Isiraeli, akĩmatua anene a kũroraga andũ nĩguo mamaathage, amwe maathage ngiri o ngiri, na angĩ igana o igana, na angĩ mĩrongo ĩtano ĩtano, o na angĩ ikũmi ikũmi.
• 26. Nao andũ acio magatuithanagia andũ macira mao ma mahinda mothe; maũndũ marĩa maagĩa hinya-rĩ, magatwarĩra Musa, no macira marĩa manyinyi makamatuithanagia arĩ o.
• 27. Nake Musa magĩkĩrĩkanĩra na mũthoniwe ethiĩre, nake agĩkĩĩinũkĩra bũrũri wao.

Home