Go Back

Thama Chapter 17

• 1. Nakĩo kĩrĩndĩ gĩothe gĩa ciana cia Isiraeli gĩgĩthiĩ rũgendo kiumĩte werũ wa Sini, o ta ũrĩa matĩĩna ma rũgendo rũacio maatariĩ, o na ta ũrĩa Jehova aaciathaga, igĩkĩamba hema ciacio Refidimu; naho handũ hau hagĩkorũo hatarĩ maĩ ma kũnyuwo nĩ andũ.
• 2. Tondũ ũcio, andũ makĩnegenia Musa, makiuga atĩrĩ, Ndũgĩtũhe maĩ tũnyue. Nake Musa akĩmera atĩrĩ, Niĩ-rĩ, mũkũ’negeneria kĩ? Ningĩ-rĩ, Mũkũgeria Jehova nĩ ũndũ kĩ?
• 3. Andũ acio magĩkinyotera kũu nĩ kwaga maĩ, magĩgĩtetia Musa mũno, makiuga atĩrĩ, Wagĩtũrutire Misiri ũũke ũtũũragĩre gũkũ na nyota, ithuene, na ciana ciitũ, o na ũhiũ witũ nĩ ũndũ kĩ?
• 4. Nake Musa agĩkaĩra Jehova, akiuga atĩrĩ, Ngũgĩĩka andũ aya atĩa? Matigairie hanini ma’hũre na mahiga nyuguto.
• 5. Nake Jehova akĩĩra Musa atĩrĩ, Ta hĩtũka ũthiĩ mbere ya andũ acio, na woe athuri amwe a andũ a Isiraeli mũthiĩ; nao o naruo rũthanju rũaku, rũrĩa wagũthire maĩ ma rũũĩ naruo, thiĩ ũrũnyitĩte na guoko gwaku.
• 6. Na atĩrĩrĩ, niĩ nĩngũthiĩ ndũgame mbere yaku igũrũ rũaro-inĩ rũa ihiga kũu Horebu; wee nawe ũgũthe ihiga rĩu, na nĩhekuuma maĩ andũ manyue. Nake Musa agĩĩka o ta ũguo, athuri acio a Isiraeli me ho makĩĩonagĩra.
• 7. Nake agĩĩta handũ hau Masa, o na Meriba, nĩ ũndũ wa ũrĩa ciana cia Isiraeli cianegeneire ho, o na ũrĩa ciageririe Jehova, ikiuga atĩrĩ, Ĩ Jehova akĩrĩ hamwe na ithuĩ hihi, kana aca?
• 8. Hĩndĩ ĩo Aamaleki magĩũka, makĩhũranĩra na andũ a Isiraeli kũu Refidimu.
• 9. Nake Musa akĩĩra Joshua atĩrĩ, Tũthurĩre andũ, mũthiĩ mũkahũrane na Aamaleki; rũciũ nĩguo niĩ na niĩ ngathiĩ kũrũgama kĩrĩma igũrũ ngwatĩte rũthanju rũa Ngai na guoko.
• 10. Joshua agĩgĩĩka o ta ũguo erĩtwo nĩ Musa, agĩkĩhũrana na Aamaleki; nao Musa, marĩ na Haruni na Huri, magĩthiĩ kĩrĩma-inĩ kĩu igũrũ.
• 11. Na gũgĩkinya atĩrĩ, atĩ hĩndĩ ĩrĩa Musa aambararia guoko gwake na igũrũ, andũ a Isiraeli makahootana, na rĩrĩa aagũithia guoko gũkarora thĩ, hĩndĩ ĩo Aamaleki nao makahootana.
• 12. No rĩrĩ, moko ma Musa makĩnoga andũ magĩkĩoya ihiga makĩmũigĩra thĩ, akĩrĩikarĩra; nao Haruni na Huri makĩmũnyita moko mamaambararĩtie na igũrũ, ũmwe akamũnyita guoko kũmwe, nake ũrĩa ũngĩ akamũnyita guoko kũrĩa kũngĩ; namo moko make magĩikara o ro ũguo marũmĩtio o nginya hĩndĩ ĩrĩa riũa rĩathũire.
• 13. Nake Joshua akĩagia Aamaleki hinya hamwe na andũ ao arĩa maamateithagia akĩmanina o kũmanina na hiũ cia njora.
• 14. Nake Jehova akĩĩra Musa atĩrĩ, Andĩka ũndũ ũyũ ibuku-inĩ, ũtũũre ũririkanagwo, na ũwarĩrie harĩ Joshua, nĩguo awĩiguagĩre na matũ make, atĩ nĩnganina Aamaleki mathire biũ, matikanacoke kũririkanwo kũndũ guothe thĩ, o na rĩ.
• 15. Nake Musa agĩaka kĩgongona, agĩgĩĩta Jehova-nisi,
• 16. akiuga atĩrĩ, Jehova nĩ kwĩhĩta ehĩta, atĩ Jehova egũtũũra arũaga mbaara na Aamaleki njiaro-inĩ ciothe, o rũciaro.

Home