Go Back

Thama Chapter 16

• 1. Nao makĩgwata rũgendo rũao moimĩte hau Elimu; nakĩo kĩrĩndĩ gĩothe gĩa ciana cia Isiraeli gĩgĩkinya werũ wa Sini, ũrĩa wĩ gatagatĩ ka Elimu na Sinai, mũthenya wa ikũmi na ĩtano wa mweri wa ĩĩrĩ kĩarĩkia kuuma bũrũri wa Misiri.
• 2. Nakĩo kĩrĩndĩ kĩu gĩothe gĩa ciana cia Isiraeli gĩgĩteteria Musa na Haruni kũu werũ-inĩ;
• 3. nacio ciana cia Isiraeli ikĩmera atĩrĩ, Na arĩ korũo nĩ kũũragwo tworagĩirũo na guoko kwa Jehova o ro kũu bũrũri wa Misiri, hĩndĩ ĩrĩa twaikaraga tũkuhĩhĩirio nĩ nyũngũ cia nyama, o na hĩndĩ ĩrĩa twarĩaga mũgate o nginya tũkahũna! Nĩ ũndũ-rĩ, mwatũrutire kũu, mũgĩtũrehe werũ-inĩ ũyũ, mũũrage kĩrĩndĩ gĩkĩ gĩothe na ng’aragu.
• 4. Hĩndĩ ĩo Jehova agĩkĩĩra Musa atĩrĩ, Nĩngũmuurĩria irio ciume igũrũ o ta mbura; nao andũ nĩmakoimagara mũthenya o mũthenya makonganie cia kũmaigania, nĩguo ndĩmagerie kana nĩmarĩthiaga marũmĩrĩire watho wakwa, kana aca.
• 5. Na nĩgũgakinya atĩrĩ, atĩ mũthenya wa ĩtandatũ, methondekera iria mainũkĩtie, nĩikonwo ituĩkĩte maita merĩ ma iria monganagia mũthenya o mũthenya.
• 6. Nao Musa na Haruni makĩĩra ciana ciothe cia Isiraeli atĩrĩ, Hwaĩ-inĩ-rĩ, nĩguo mũrĩmenya atĩ Jehova nĩwe wamũrutire bũrũri wa Misiri;
• 7. na rũcinĩ-rĩ, nĩguo mũkaroka kuona ũnene wa Jehova; nĩ gũkorũo nĩaiguĩte ũrĩa mũtetetie Jehova; no rĩrĩ, ithuĩ tũrĩ a, atĩ nĩkĩo mũgũtũtetia?
• 8. Nake Musa akiuga atĩrĩ, Ũndũ ũcio-rĩ, ũkoneka hĩndĩ ĩrĩa Jehova akamũhe nyama cia kũrĩa hwaĩ-inĩ, na rũcinĩ amũhe mũgate wa kũmũigana; nĩ ũndũ Jehova nĩaiguĩte ũrĩa mũramũtetia; kaĩ ithuĩ tũrĩ a? Gũteta kũu-rĩ, gũtitũkoniĩ ithuĩ, gũkoniĩ Jehova.
• 9. Musa agĩkĩĩra Haruni atĩrĩ, Ĩra kĩrĩndĩ gĩothe gĩa ciana cia Isiraeli atĩrĩ, Kuhĩhĩriai haha mbere ya Jehova, nĩ gũkorũo nĩaiguĩte ũrĩa mũramũtetia.
• 10. Na gũgĩkinya atĩrĩ, atĩ hĩndĩ ĩrĩa Haruni aaragia-rĩ, kĩrĩndĩ gĩothe gĩa ciana cia Isiraeli gĩkĩrorereria na kũu werũ-inĩ, na rĩrĩ, riri wa Jehova ũkĩoneka o kũu gĩtugĩ-inĩ kĩu gĩa itu.
• 11. Nake Jehova akĩaria na Musa, akĩmwĩra atĩrĩ,
• 12. Nĩnjiguĩte ũrĩa ciana cia Isiraeli itetete. Aria nacio ũciĩre atĩrĩ, Hwaĩ-inĩ mũrĩrĩaga nyama, na rũcinĩ mũrĩhũnagio nĩ mũgate; na nĩmũkũmenya atĩ niĩ nĩ niĩ Jehova Ngai wanyu.
• 13. Na gũgĩkinya atĩrĩ, atĩ hwaĩ-inĩ wakinya, hagoka tũmakia-arũme; natuo tũkaiyũra handũ hau maambĩte hema ciao; na rũcinĩ-rĩ, ime rĩkaroka kũgĩa o handũ hau maambĩte hema ciao, rĩkaharigicĩria.
• 14. Na rĩrĩ, ime rĩu rĩaitĩka, kũndũ kũu werũ-inĩ guothe gũkaiyũra tũnyamũ tũthiũrũrĩ, tũnyihĩte o ta ũrĩa ime rĩikaraga rĩĩ thĩ hĩndĩ ĩrĩa rĩamatio nĩ mbaa.
• 15. Na rĩrĩa ciana cia Isiraeli cionire tũnyamũ tũu, ĩkĩũrania o mũndũ na mũndũ atĩrĩ, Ĩ nĩ kĩ gĩkĩ? Nĩ ũndũ itiamenyaga kĩrĩa kĩo. Nake Musa agĩciĩra atĩrĩ, Nĩ irio iria Jehova amũheete cia kũrĩa.
• 16. Naguo ũndũ ũrĩa Jehova amwathĩte mwĩkage nĩ ũyũ, atĩrĩ, Cokagĩrĩriai tũnyamũ tũtũ, mũndũ o mũndũ o ta ũrĩa mũrĩĩre wake ũtariĩ; oyagĩrai mũndũ o mũndũ kĩbaba kĩmwe kĩrĩa gĩĩtagwo omeri, o ta ũrĩa andũ anyu maigana; o mũndũ wanyu oyagĩre andũ a hema yake.
• 17. Nacio ciana cia Isiraeli igĩĩka o ta ũguo, andũ amwe ao magĩcokereria tũingĩ, na amwe tũnini.
• 18. Na rĩrĩ, maacoka gũthima na kĩbaba kĩu gĩĩtagwo omeri, hakĩoneka atĩ o na mũndũ ũrĩa wacokereirie tũingĩ ndaarĩ kĩndũ o na kĩ aatigarĩirio, o nake ũrĩa wacokereirie tũnini, ndaanyihirie. O mũndũ wao aacokereirie o ta ũrĩa mũrĩĩre wake watariĩ.
• 19. Nake Musa akĩmera atĩrĩ, Mũndũ o na ũrĩkũ ndagatũtigie tũkinyie rũcinĩ.
• 20. No nĩmaaregire kũigua Musa, na amwe ao magĩtũtigia tũgĩkinyia rũcinĩ, tũgĩkĩbutha tũkĩgĩa tũgunyũ, tũkĩnunga ũũru. Musa agĩkĩrakario mũno nĩo.
• 21. Nao makarokaga gũtũcokereria rũcinĩ o rũcinĩ o mũndũ o ta ũrĩa mũrĩĩre wake ũtariĩ; na riũa rĩaara, tũgatweka tũkahũa.
• 22. Na gũgĩkinya atĩrĩ, atĩ mũthenya wa itandatũ wakinya magĩcokereria irio icio maita merĩ, o mũndũ ibaba igĩrĩ; nao anene othe arĩa maathaga kĩrĩndĩ kĩu magĩthiĩ makĩhe Musa ũhoro ũcio.
• 23. Nake akĩmera atĩrĩ, Ũyũ nĩguo ũhoro ũrĩa Jehova oigĩte, atĩrĩ, rũciũ nĩguo mũthenya wa kũhurũka o kũhurũka ki, na nĩguo thabatũ nyamũrĩre Jehova; nĩ ũndũ ũcio hĩhiai o tũrĩa mũkwenda kũhĩhia, o na mũruge na maĩ tũrĩa mũkwenda kũruga; na tũrĩa tuothe tũrĩtigara, wĩigĩrei tũraare tũmenyereirũo nginya rũcinĩ.
• 24. Nao magĩtũiga tũgĩkinyia o rũcinĩ rũrũ rũngĩ, o ta ũrĩa Musa oigĩte gwĩkwo; na tũtianungire kana tũkĩgĩa kagunyũ, o na kamwe.
• 25. Nake Musa akiuga atĩrĩ, Rĩai tũu ũmũthĩ, nĩ ũndũ ũmũthĩ nĩguo thabatũ ya Jehova; ũmũthĩ mũtingĩtuona kũu werũ-inĩ.
• 26. Mũrĩtũcokagĩrĩria mĩthenya itandatũ, no mũthenya wa mũgwanja nĩguo thabatũ; mũthenya ũcio tũtirĩonekaga o na atĩa.
• 27. Na gũgĩkinya atĩrĩ, atĩ mũthenya ũcio wa mũgwanja, andũ amwe makiumagara magatũcokererie, no mationire o na tũnini.
• 28. Nake Jehova akĩĩra Musa atĩrĩ, Nĩ nginya hĩndĩ ĩ mũgũtũũra mũregete kũmenyerera maathani makwa, o na mawatho makwa?
• 29. Atĩrĩrĩ, menyai ũndũ ũyũ, atĩ tondũ Jehova nĩamũheete mũthenya ũcio wa thabatũ-rĩ, mũthenya wa itandatũ arĩmũheaga irio cia kũmũigania mĩthenya ĩĩrĩ; inyuothe o mũndũ nĩaikarage o harĩa arĩ mũthenya wa mũgwanja na ndakoimagare.
• 30. Tondũ ũcio andũ magĩikara mahurũkĩte mũthenya wa mũgwanja.
• 31. Nao andũ acio a nyũmba ya Isiraeli magĩtwĩta Mana; natuo twatariĩ ta mbeũ cia korianda, natuo twarĩ twerũ, na mũcamo watuo watariĩ ta wa tũmĩgate tũhũthũ tũthondeketwo na ũũkĩ.
• 32. Ningĩ Musa akiuga atĩrĩ, Ũyũ nĩguo ũndũ ũrĩa Jehova aathanĩte wĩkwo, Atĩ mũige irio icio kĩbaba kĩgima kĩrĩa gĩĩtagwo omeri nĩ ũndũ wa njiaro cianyu; nĩ getha cionage irio iria ndamũheaga mũrĩe mũrĩ werũ-inĩ, hĩndĩ ĩrĩa ndamũrutire bũrũri wa Misiri.
• 33. Nake Musa akĩĩra Haruni atĩrĩ, Oya nyũngũ ũmĩĩkĩre kĩbaba kĩmwe kĩiyũru kĩa mana macio, ũmaige mbere ya Jehova mamenyagĩrĩrũo nĩ ũndũ wa njiaro cianyu.
• 34. Na rĩrĩ, o ta ũrĩa Jehova erire Musa gwĩkwo, ũguo noguo Haruni ekire, agĩkĩmaiga, o hau mbere ya Ithandũkũ rĩa Ũira, matũũre mamenyereirũo.
• 35. Nacio ciana cia Isiraeli ikĩrĩa mana macio mĩaka mĩrongo ĩna, o nginya rĩrĩa ciakinyire bũrũri ũtũũrĩtwo nĩ andũ; ũguo noguo ciarĩire mana macio o nginya rĩrĩa ciakinyire mĩhaka-inĩ ya bũrũri wa Kanaani.
• 36. Na rĩrĩ, kĩbaba kĩu gĩĩtagwo omeri nĩ ta gĩcunjĩ kĩmwe gĩa ikũmi kĩa eba ng’ima.

Home