Go Back

Thaburi Chapter 92

• 1. NĨ WEGA mũno gũcokagĩria Jehova ngatho, o na gũkumia rĩĩtwa rĩaku na rũĩmbo, wee Wĩ-Igũrũ-Mũno;
• 2. Nĩ wega kũrokaga kuonania ũhoro wa ũtugi waku o rũcinĩ, na kuonanagia wĩhokeku waku o ũtukũ o ũtukũ,
• 3. Gũkĩinagio kĩnanda kĩrĩa kĩa nga ikũmi, o kĩo kĩnanda kĩa mũgeto; o hamwe na kĩrurumĩ gĩa kĩrĩa kĩngĩ kĩgambi mũno.
• 4. Nĩ gũkorũo wee, Jehova, nĩũtũmĩte ngene nĩ ũndũ wa wĩko waku; nĩ gũkũngũiya ngũgĩkũngũiya nĩ ũndũ wa maũndũ marĩa moko maku mekĩte.
• 5. Ĩ maũndũ marĩa wĩkaga, wee Jehova, matikĩrĩ manene! meciria maku-rĩ, nĩ marikĩru mũno.
• 6. Mũndũ ũrĩa kĩnunwa ndangĩmenya ũhoro ũyũ; kĩrimũ gĩtingĩwĩkũũranĩra:
• 7. Atĩ rĩrĩa andũ arĩa amaramari mekũhamba ta ria, acio othe eki maũndũ ma waganu magagĩcanũka-rĩ, gĩtũmi no getha kũninwo makaninwo kinya tene na tene:
• 8. No wee, Jehova, tene na tene ũtũũraga ũrĩ o igũrũ.
• 9. Tondũ atĩrĩ, thũ ciaku, Jehova, thũ ciaku-rĩ, no gũtoma igagĩtoma; acio othe eki maũndũ ma waganu nĩ kũnyarirĩka makanyarirĩka.
• 10. Ĩndĩ rũhĩa rũakwa-rĩ, ũtũmĩte rũambarare o ta rũhĩa rũa mbogo; niĩ ndĩ mũhake maguta ma mũrugano.
• 11. Narĩo riitho rĩakwa nĩrĩrĩkĩtie kuona ũrĩa ndĩrendaga kuona harĩ arĩa maranjohagĩria, matũ makwa namo makarĩkia kũigua ũrĩa ndĩrendaga kũigua ha ũhoro wa eki-ũũru acio maranjũkĩrĩire.
• 12. Ũrĩa mũthingu we arĩhambaga ta mũkĩndũ, akũre o ta mũtarakwa wĩ kũrĩa Lebanoni.
• 13. Acio ahande nyũmba-inĩ ya Jehova-rĩ, nĩ kũhamba marĩhambagĩra kũu nja-inĩ cia Ngai witũ.
• 14. Magatũũra maciaraga maciaro o na marĩ akũrũ; magatũũra maiyũire ngogoyo, maikare marĩ o aruru;
• 15. Monanagĩrĩrie atĩ Jehova nĩ mũrũngĩrĩru, o we ndũmba yakwa ya ihiga, thĩinĩ wake gũtarĩ kaũndũ ka wogogi.

Home