Go Back

Thaburi Chapter 79

• 1. Ĩ NGAI, andũ a ndũrĩrĩ nĩ atonyu igai-inĩ rĩaku; hekarũ yaku theru gũthahia nĩmamĩthahĩtie; Jerusalemu magũtuĩte o irũndo irũndo.
• 2. Ciimba cia ndungata ciaku macitigĩire marera ma igũrũ, igatuĩka kandũ kamo, mĩĩrĩ ya andũ aku atheru magakĩmĩne nyamũ cia werũ-inĩ.
• 3. Maitangĩte thakame yao ta maĩ mbarĩ ciothe cia Jerusalemu, na gũkaaga ũngĩhota kũmathika.
• 4. Nĩ gũtuĩka tũtuĩkĩte kĩmene harĩ arĩa tũhakaine nao, tũgagĩtuĩka a gũthekererũo na kũnyũrũrio nĩ andũ arĩa matũthiũrũrũkĩirie.
• 5. Ĩ Jehova, nĩ nginya rĩ ũgũtũũra ũtũrakarĩire ta ũtũrakarĩire nginya tene? ũiru waku ũgũtũũra wakanĩte o ta mwaki?
• 6. Itũrũrĩra ndũrĩrĩ marũrũ maku arĩ cio, icio itakũũĩ, ũitũrũrĩre mothamaki macio matathathayagia rĩĩtwa rĩaku.
• 7. Nĩ ũndũ Jakubu nĩ kũmũrambũra mamũrambũrĩte, na gwake magagũtua o iganjo.
• 8. Ndũgatũririkanĩre mawaganu ma maithe maitũ; ta tũtũngie matha maku na ihenya, amu kũhinya tũrĩ ahinyu mũno.
• 9. Tũteithie, wee Ngai mwene ũhonokio witũ, nĩ ũndũ wa riri wa rĩĩtwa rĩaku; tũteithũre, ningĩ ũtũhoroherie mehia maitũ, no ũndũ wa rĩĩtwa o rĩu rĩaku.
• 10. Nĩ kĩ kĩngĩgĩtũma andũ a ndũrĩrĩ moragie, Ngai wao akĩrĩ ha? kũrĩhĩrio gwa thakame ĩrĩa ĩitĩtwo ya ndungata ciaku-rĩ, tũma kũmenyeke ndũrĩrĩ-inĩ o ithuĩ tũkĩonaga.
• 11. Gũcaya kwa mũgwate-rĩ, reke gũkinye mbere yaku; tondũ wa ũrĩa hinya wa guoko gwaku wĩ mũnene, kĩgitĩre arĩa matuĩrĩirũo gũkua;
• 12. Nao andũ acio tũhakaine nao, ũmacokererie ithũri-inĩ ciao maita mũgwanja kĩnyenya kĩao kĩrĩa makũnyenyete, wee Mwathani.
• 13. Weka ũguo-rĩ, ithuĩ kĩrĩndĩ gĩaku, o ithuĩ ng’ondu ciaku kwĩrĩithĩria, no tũtũũre tũgũcokagĩria ngatho nginya tene na tene, tũgĩtũũre tũganaga ũkumio waku o nginya njiarũa na njiarũa.

Home