Go Back

Thaburi Chapter 78

• 1. ATĨRĨRĨ, kĩrĩndĩ giitũ, ta tegai matũ mũigue kĩrĩra gĩakwa; inamĩrĩriai matũ manyu mũigue ciugo iria kanua gakwa gekwaria.
• 2. Ngũtumũra kanua njarie na ngerekano; njitũrũre thimo cia maũndũ ma tene,
• 3. Marĩa twanaigua na tũkamamenya, o marĩa maithe maitũ maanatwĩra.
• 4. Tũtingĩmahitha ciana ciao, tiga twĩrage rũciaro rũrĩa rũĩ thutha ũkumio wa Jehova, kinya ũhoro wa hinya wake, na wa maũndũ ma magegania marĩa aaneka.
• 5. Nĩ gũkorũo nĩ ũira aahandire harĩ mbarĩ ya Jakubu, akĩũtua kĩrĩra thĩinĩ wa Isiraeli; nĩ gwatha aathire maithe maitũ, atĩ maũndũ macio mamenyithie ciana ciao;
• 6. Nĩguo rũciaro rũrĩa rũĩ thutha rũmamenye, o cio ciana iria irĩciaragwo; nacio ciarahũke kwĩra ciana ciacio:
• 7. Nĩ getha itue Ngai mwĩhoko wacio, na imenye gũkariganĩrũo nĩ mawĩko ma Mũrungu, tiga o kũrũmia irũmagie maathani make;
• 8. Na itikahaane ta maithe ma cio, rũciaro rũrĩa rũarĩ rũremi na rũa rũng’athio, rũciaro rũtenyitĩtie ngoro, namo maroho mao mataakindĩirie harĩ Mũrungu.
• 9. Ariũ a Efiraimu-rĩ, o na me na mathaita mao na magwete mota, nĩmaahũndũkire mũthenya ũrĩa wa ndathano.
• 10. Matiarũmirie kĩrĩkanĩro kĩa Ngai, nĩ kũrega maaregire gũtwarana na kĩrĩra gĩake;
• 11. Na nĩ kũriganĩrũo maariganĩirũo nĩ mĩĩkĩre yake, nginya o maũndũ make ma magegania marĩa aanamonia.
• 12. We nĩ maũndũ ma kĩgeganio ekire maitho-inĩ ma maithe mao, me bũrũri wa Misiri, kũu gwetagwo werũ wa Zoani.
• 13. Nĩ gwatũrania aatũranirie iria, akĩmaringia; maĩ agĩtũma marũgame ta kĩhumbu.
• 14. Ningĩ mũthenya nĩaamatongoragia na itu, na ũtukũ wothe akamathiĩ mbere na ũtheri wa mwaki.
• 15. Kũu werũ-inĩ nĩaatũranirie ndũmba cia mahiga, agĩkĩmahe maĩ maingĩ ma kũnyua o ta moimĩte na thĩ kũrĩa kũriku.
• 16. Rũaro rũa ihiga o naruo agĩtũma ruume ithima cia maĩ, agĩikũrũkithia maikũrũki maigana ta njũĩ.
• 17. Nao no gũkĩrĩrĩria o kũmwĩhia, o makĩng’athagĩria Ũrĩa-wĩ-Igũrũ-Mũno me bũrũri ũcio wa nyota.
• 18. Ningĩ ngoro-inĩ ciao makĩgeria Mũrungu nĩ gwĩtia irio nĩ ũndũ wa njeme ĩrĩa maarĩ nayo.
• 19. Ĩĩ-ni Ngai nĩ kwarĩrĩra maamwarĩrĩire; makĩũrania ũũ: Mũrungu-rĩ, aahota kwara metha werũ-inĩ?
• 20. Ndũmba ya ihiga, ĩĩ, nĩaamĩgũthire, maĩ magĩitũrũrũka boo!-- hakĩgwata gũikũrũka njũĩ: ĩ, irio o nacio, aahota kũheana? aakĩonera kĩrĩndĩ gĩake nyama?
• 21. Jehova rĩrĩa aaiguire ũguo agĩtũkũya; mbarĩ ya Jakubu makĩgwatĩrio mwaki wa kũmehia, Isiraeli-rĩ, magĩgĩtogererũo nĩ marakara,
• 22. Nĩ ũndũ matietĩkirie Ngai, na matiigana kwĩhoka ũhonokania wake.
• 23. No we agĩatha kũrĩa matu-inĩ, agĩkĩhingũra mĩrango ya igũrũ;
• 24. Akĩmaitũrũrĩra mana ta mbura marĩe, ngano ya kũu igũrũ-rĩ, nĩyo aakĩmaheire.
• 25. Andũ magĩkĩrĩa irio o iria cia ihoti; nĩ rĩĩgu mũingĩ aamarehithĩirie, wa kũmahũnia.
• 26. Aatũmire igũrũ gũũke rũhuho rũrĩa ruumaga na irathĩro, ningĩ rũa na gũthini o naruo akĩrũerekeria na hinya wake.
• 27. Akĩmaharũrũkĩria nyama nyingĩ ta rũkũngũ, nyamũ ii mathagu ciigana o ta mũthanga ũrĩa wĩ ndere-inĩ cia iria.
• 28. Agĩcigũithangia gatagatĩ-inĩ ga kambĩ yao, o kũu mĩena-inĩ ya iraaro ciao.
• 29. Magĩkĩrĩa, makĩhũna mũno; kũmahe nĩaamaheire kĩrĩa maacemekagĩra.
• 30. O mataanakĩiguĩra njeme yao kĩnyiria, irio icio o itaanakinya kuuma tũnua twao,
• 31. Marakara ma Ngai magĩtogororoka nĩ ũndũ wao, makĩũraga arĩa atungu gĩkundi, kũirũra magĩkĩirũra aanake a Isiraeli.
• 32. O na gũtuĩkĩte ũguo, o no gũthiĩrĩrĩra maathiĩrĩire o kwĩhia, na mawĩko make ma magegania matimetĩkie.
• 33. Tondũ ũcio matukũ mao agĩtũma mathire o tũhũ, mĩaka yao akĩmĩninithia o na matebebe.
• 34. Rĩrĩa aamoraga-rĩ, hĩndĩ ĩo magacoka kũmũũrĩrĩria, magakĩhũndũka magacoka kũrongoria Mũrungu na kĩyo.
• 35. Na makaririkana atĩ Ngai nĩwe ndũmba yao ya ihiga, magakĩririkana atĩ Mũrungu Ũrĩa-wĩ-Igũrũ-Mũno nĩwe mũmakũũri.
• 36. No nĩ kũgathima maamũgathimagĩra kanua, nĩmĩ ciao nĩ kũmũhenia maamũhenagia nacio.
• 37. Nĩ gũtuĩka ngoro ciao itiakindĩirie harĩ we, na ha ũhoro wa kĩrĩkanĩro gĩake matiarĩ a kwĩhokeka.
• 38. Nake-rĩ, tondũ wa ũrĩa e wa matha maingĩ, nĩ kũhumbĩra aahumbagĩra waganu wao, akarega kũmanina; ĩĩ-ni, nĩ kaingĩ eheririe marakara make, akaaga kwarahũra marũrũ make mothe.
• 39. Akaririkana atĩ o no mwĩrĩ o ũguo, wa nyama; no rũhuho, ũrĩa rũhĩtũkaga na rũticoke rĩngĩ.
• 40. Nĩ kaingĩ atĩa maamũng’athĩirie me kũu werũ-inĩ, magakĩmũiguithia kĩeha me kũu rũng’ũrĩ-inĩ!
• 41. No gũcoka maacokaga o kũgeria Mũrungu, o we Ũrĩa Mũtheru wa Isiraeli-rĩ, magakĩmũthirĩkia.
• 42. Matiaririkanaga guoko gwake, kana mũthenya ũrĩa aamakũũrire harĩ mũmaitha;
• 43. Makĩririkane ũrĩa aaringire ciama ciake thĩinĩ wa bũrũri wa Misiri, agĩkĩonania morirũ macio make kũu werũ-inĩ wa Zoani:
• 44. Akĩgarũrania njũĩ cia ene-kuo igĩtuĩka thakame, o gwata mĩtaro yao, magĩkĩremwo nĩ kũnyua maĩ mayo.
• 45. Agĩtũma ngi kũrĩ o, mĩrumbĩ mĩingĩ mĩingĩ, ikĩmarĩa; na ciũra, nacio ikĩmonũhanga;
• 46. Uumithio wao wa mĩgũnda naguo akĩũhe itono, ũrĩmi ũcio wao ũgĩkĩrekererio ngigĩ.
• 47. Mĩthabibu yao akĩmĩanangithia mbura ya mbembe, o nginya mĩkũyũ yao agĩkĩmĩanangithia mbembe iria ndungu.
• 48. Mahiũ mao o namo akĩmanenganĩra harĩ mbura ĩo ya mbembe, ndũru icio ciao agĩcitigĩra rũheni.
• 49. Agĩcoka akĩrekia marakara make marĩa maakanu mamagũĩre, matũkũya, na mathũgũta, na mathĩna, o mbũtũ ya araika arĩa arehi ũũru.
• 50. Agĩkĩnyorokeria marakara macio make njĩra; agĩtiga kũriganĩrĩria ngoro ciao na gĩkuũ, mĩoyo yao agĩkĩmĩnenganĩra harĩ mũthiro;
• 51. Akĩringa marigithathi mothe ma andũ a Misiri, nĩmo mũtũrio wa hinya wa hema-inĩ cia Hamu.
• 52. Nakĩo kĩrĩndĩ gĩake agĩkiumagaria ta ng’ondu, agĩikara agĩkĩerekagĩria o ta rũũru kũu werũ-inĩ.
• 53. Akĩmatwara o megangarĩte, hatarĩ ũndũ megwĩtigĩra, nacio thũ ciao-rĩ, ikĩhubĩkanio nĩ iria.
• 54. Akĩya gũkamakinyia rũtere-inĩ rũa kũndũ gwake kwamũre, kĩrĩma-inĩ gĩkĩ guoko gwake kwa ũrĩo kwegũrĩire.
• 55. Ningĩ akĩrutũrũra ndũrĩrĩ ithenge mbere yao, agĩkĩmagayania kũu gwacio na mũkanda gũtuĩke magai mao, agĩtũma mĩhĩrĩga ya Isiraeli ĩtũũre hema ciacio.
• 56. Ĩndĩ o, Ngai Ũrĩa-wĩ-Igũrũ-Mũno no kũgeria maamũgeragia, o na kũng’athia makamũng’athĩria, makĩaga gũtũũra marũmĩtie maũira marĩa make;
• 57. Nĩ gũcoka maacokire na thutha, makĩmũgarũka o ta maithe mao; nĩ kwera merire ta ũta ũrĩa ũhĩtithagia.
• 58. Amu nĩmaamũthirĩkagia nĩ kũgĩa na marutĩro mao ma igongona matĩri-inĩ ma kũndũ gũtũũgĩru, na magĩtũma aigue ũiru nĩ ũndũ wa mĩhianano yao ya gwacũhio.
• 59. Ũhoro ũcio Ngai nĩaaũiguire, agĩgĩtũkũya, agĩĩthamba Isiraeli o gwĩthamba;
• 60. Agĩthama gĩikaro gĩake kĩrĩa kĩarĩ Shilo, o hema ĩrĩa aahandĩte atũũranagie na andũ,
• 61. Akĩneana kĩrĩa kĩo hinya wake gĩtahwo, o kĩu kĩo igema rĩake agĩkĩneana moko-inĩ ma mũmaitha.
• 62. Kĩrĩndĩ gĩake nakĩo agĩkĩnenganĩra harĩ rũhiũ rũa njora; igai rĩu rĩake-rĩ, agĩkĩrĩtũkũĩra.
• 63. Aanake ao makĩrambio nĩ mwaki; airĩtu ao magikĩaga kũinagĩrũo rũĩmbo rũa ũhiki.
• 64. Athĩnjĩri-Ngai ao makĩirũrũo nĩ njomo, na atumia ao a ndigwa makĩaga kũgĩa na kĩgirĩko.
• 65. Hĩndĩ ĩo Mwathani akĩhindũka ta mũndũ uuma toro, ningĩ ta njamba ĩgĩkayũrũrũka nĩ ũndũ wa ndibei.
• 66. Akĩhũra a-muku ake akĩmacokia na thutha; akĩmatua imene cia tene na tene.
• 67. Agĩcoka ningĩ akĩrega hema ya Jusufu, mũhĩrĩga wa Efiraimu-rĩ, agĩkĩaga kũũthura;
• 68. Agĩthura mũhĩrĩga wa Juda; nĩ kĩrĩma gĩa Zayuni aathurire, o kĩu endete.
• 69. Agĩaka nyũmba yake nyamũre ĩhaana ta irĩma iria ndaya, ningĩ ĩkahaana ta thĩ, ũguo amĩrũmĩtie ĩtũũre kinya tene.
• 70. Ningĩ agĩthura Daudi ndungata yake, akĩmũruta ciugũ-inĩ cia ng’ondu;
• 71. Agĩkĩmũruta kũu aarũmagĩrĩra ng’ondu iria njiairĩ, akarĩithagie mbarĩ ya Jakubu, nĩo kĩrĩndĩ gĩake, akĩrĩithagie Isiraeli, o-o igai rĩake.
• 72. Nake agĩtũũra amarĩithagia kũringana na wagĩrĩru wa ngoro yake; agĩkĩmerekagĩria na wara wa moko make.

Home