Go Back
Thaburi Chapter 77
- 1. NĨ NGAI ngũkaĩra, ndĩmũiguithie mũgambo wakwa;
ĩĩ-ni, mũgambo wakwa nĩ Ngai ngũiguithia, nake no akĩndegere gũtũ.
- 2. Mũthenya wa mĩnyamaro yakwa nĩ Mwathani ndakĩrongoririe;
guoko gwakwa kwaraire kwarĩtwo na gũtiregere;
ngoro yakwa ĩgakĩrega kũhorereka.
- 3. Ndenda kũririkana Ngai, ngaigua ngĩtangĩka;
ndageria kwĩheeha na ngoro, roho wakwa ũgakĩaga hinya.
- 4. Wee wagiragia imone cia maitho makwa ihingĩke;
ndanyamarĩkaga o mũno ngakĩremwo nĩ kwaria.
- 5. Ngĩgĩtarania ũhoro wa matukũ marĩa mahĩtũku,
mĩaka o ĩrĩa yarĩ ya tene.
- 6. Ngĩĩririkania ningĩ ũrĩa ndainaga ũtukũ,
na ngĩikara o ngĩĩhehaga na ngoro;
roho wakwa ũgĩgĩcũrania mũno.
- 7. Ngĩkĩũria, Ĩ Mwathani-rĩ, aahota gũteana mĩndĩ na mĩndĩ?
githĩ ndarĩ hingo agacoka gũkenanĩra rĩngĩ?
- 8. Ũtugi wake nĩ mũhuku o kũhuka kinya tene na tene?
uuge wake anga ũgũtũũra ũtahingĩte nginya njiarũa na njiarũa?
- 9. Mũrungu-rĩ, nĩ kũriganĩrũo ariganĩirũo nĩ uuma-andũ wake?
nĩ kũhingĩrĩria ahingĩrĩirie matha make nĩ ũndũ wa kũrakara?
- 10. Ngĩya kuuga atĩrĩ, Ũyũ nĩ waga-hinya ndĩ naguo;
ngũcoka kũririkana mĩaka ĩrĩa ya guoko kwa ũrĩo kwa Ũcio-wĩ-Igũrũ-Mũno.
- 11. Kwĩririkania nĩngwĩririkania mawĩko ma Jehova;
amu ngũkĩĩririkania maũndũ maku ma kĩgeganio marĩa wekaga tene.
- 12. Ngwĩrurumia ũhoro wa wĩra ũcio waku wothe,
mĩĩkĩre ĩo yaku ndĩkĩĩheehe ũhoro wa ũrĩa ĩtariĩ.
- 13. Njĩra ĩrĩa ũgeraga, wee Ngai, no ya ũtheru-inĩ:
nĩ mũrungu ũrĩkũ ũkĩrĩ, mũnene ta Ngai?
- 14. Wee-rĩ, nĩwe Mũrungu ũrĩa wĩkaga maũndũ ma kĩgeganio;
nĩũmenyithanĩtie hinya waku thĩinĩ wa irĩndĩ cia thĩ.
- 15. Guoko gwaku nĩ gũkũũra wakũũrire kĩrĩndĩ gĩaku nakuo,
o cio ciana cia Jakubu na Jusufu.
- 16. Maĩ ma iria-inĩ nĩmaakuonire, wee Ngai;
maĩ macio nĩmaakuonire, makĩigua guoya;
kũu kũrikĩru gũgĩkĩinaina.
- 17. Matu namo magĩiturũra maĩ o boo!
kũu igũrũ nĩ kũruruma kwarurumaga;
mĩguĩ yaku nayo ĩkĩrathũkanga.
- 18. Mũgambo wa ngwa ciaku nĩ kĩhuhũkanio-inĩ wagambagĩra;
heni igakĩmũrĩkaga mabũrũri;
thĩ ĩkĩrika gũthingitha o na gũtetema ĩgagĩtetema.
- 19. Njĩra yaku nĩ iria-inĩ yagereire,
mĩirigo yaku ĩgathiĩra o kũu maĩ-inĩ macio maingĩ,
namo makinya maku matingĩatuĩrĩkire.
- 20. Watongoririe kĩrĩndĩ gĩaku ta ũrĩa rũũru rũtongoragio,
ũgĩgĩtwara na moko ma Musa na Haruni.
Home