Go Back

Thaburi Chapter 74

• 1. Ĩ NGAI, ũgĩtũteete nĩkĩ o gwata tene na tene? ng’ondu ciaku kwĩrĩithĩria-rĩ, marakara maku macitogagĩra nĩkĩ?
• 2. Ta kĩririkane kĩũngano gĩaku, kĩrĩa wegũrĩire o tene, o kĩo kĩrĩa wakũũrire gĩtuĩke mũhĩrĩga waku ũrĩa wĩgaĩire; ũkĩririkane kĩrĩma gĩa Zayuni, o kĩrĩa watũũrĩte.
• 3. Kũũra magũrũ werekere mwanangĩko-inĩ ũrĩa ũtũire kuo, ũkone ũũru wothe ũrĩa wĩkĩtwo nĩ thũ handũ harĩa haamũre.
• 4. A-muku aku nĩmaararamaga o gĩtũngano-inĩ gĩaku gatagatĩ; marũũri mao ene nĩmo maahandire matuĩke atĩ nomo marũũri.
• 5. O, makĩonwo, no ta andũ moereire mathanwa mateme mĩtĩ ĩrĩ mũtitũ.
• 6. Rĩrĩ rĩngĩ wĩra ũrĩa mũrame wothe ũrĩa wĩ kuo makaũmomora na ngomi o na nyondo.
• 7. Nyũmba ĩo yaku nyamũre nĩmaamĩmundirie mwaki; nĩ gũthahia mathahĩtie gĩtũũro kĩa rĩĩtwa rĩaku nĩ kũmĩgũithia o thĩ.
• 8. Moigire atĩrĩ, na ngoro, Nĩtũmonũhe o kũmonũha! gũcina nĩmacinĩte itũngano cia Mũrungu ciothe cia bũrũri, makainina.
• 9. Marũũri maitũ rĩu tũtimonaga: gũtitũire na mũnabii; o na thĩinĩ witũ gũtitũire wa kũmenya nĩ nginya rĩ.
• 10. Ĩ Ngai, nĩ hingo ĩigana atĩa mũmuku egũtũũra anyenyanaga? thũ-rĩ, no ĩtũũre ĩmenagĩrĩria rĩĩtwa rĩaku nginya o tene?
• 11. Ũhetete guoko nĩkĩ, o guoko kũu gwaku kwa ũrĩo? gũcomore gĩthũri-inĩ gĩaku, ũkĩmanine.
• 12. No ningĩ-rĩ, Ngai nowe Mũthamaki wakwa kuuma tene, ũrĩa ũtũire ekaga maũndũ ma kũhonokania o gũkũ thĩ.
• 13. Wee-rĩ, nĩwe waatũranirie iria rĩrĩa inene na hinya waku; mĩtwe ya inyamũ iria nene cia iria-inĩ, nowe wamĩbeberire ii maĩ-inĩ.
• 14. Wee-rĩ, nowe wathetherire ciongo cia kĩrĩa gĩĩtagwo rĩwiathani, ũgĩtũma gĩtuĩke kandũ ga kĩruka kĩrĩa gĩtũũraga werũ-inĩ.
• 15. Wee-rĩ, nĩwe watũrĩkithirie matherũkĩro ma maĩ o gwata ithima ciamo; wee ningĩ nowe wahũithirie njũĩ iria itahũaga.
• 16. Mũthenya nĩ waku, o naguo ũtukũ no waku; wee nowe ũthondekete imũrĩ cia igũrũ, o gwata riũa.
• 17. Wee-rĩ, nowe wekĩrire mĩhaka yothe ya thĩ; themithũ na thano, nowe watuire mahinda mene.
• 18. Ta kĩririkane ũũ, atĩ thũ nĩ kũnyenya ĩkũnyenyete, wee Jehova, na atĩ kĩrĩndĩ kĩu gĩtarĩ mbuguĩro nĩ kũmenereria kĩanamenereria rĩĩtwa rĩaku.
• 19. Ndũgakĩnenganĩre muoyo wa gatutura gaka gaku harĩ nyamũ; tiga gũgĩtũũra ũriganĩirũo nĩ mĩoyo ya athĩnĩki aku o nginya tene.
• 20. Ta bara wega kĩrĩkanĩro, amu kũndũ guothe kũrĩa kwĩ nduma bũrũri-inĩ gũtuĩkĩte o ciikaro cia ũtoi.
• 21. Ndũgakĩreke ũrĩa mũhinyĩrĩrie ahũndũke anyararĩkĩte; andũ arĩa athĩnĩki, o arĩa aagi-rĩ, tũma makĩgooce rĩĩtwa rĩaku.
• 22. Arahũka, Ngai, wĩcirĩrĩre; ririkana ũguo mũndũ ũrĩa ũtarĩ mbuguĩro atindaga agĩkũnyenya mũthenya wothe.
• 23. Tiga gũkĩriganĩrũo nĩ mũgambo wa acio me muku nawe; ngũĩ ya acio magũũkĩrĩire-rĩ, ĩhaicaga o na igũrũ hingo ciothe.

Home