Go Back

Thaburi Chapter 61

• 1. KAYŨ gakwa ta kaigue, Ngai; thikĩrĩria ihoya rĩakwa.
• 2. Ngũgũkaĩra ndĩ o mũthia-inĩ wa thĩ, rĩrĩa ngoro yakwa ĩthirĩtwo nĩ hinya: ndwara ũnginyie ndũmba ya ihiga igũrũ, ĩrĩa ĩndaihĩire makĩria.
• 3. Nĩ tondũ nĩwe ũtũire ũrĩ irahĩro rĩakwa, rũtara rũraya, rũa hinya, rũa kũũrĩra thũ.
• 4. Nĩndekwo ndũũre ndĩ mũgeni wa hema-inĩ yaku nginya tene; nĩngĩrekwo ndahĩre o wĩhitho-inĩ wa mathagu maku.
• 5. Amu wee, Ngai, nĩũiguĩte mĩĩhĩtwa yakwa; nĩ kũngaĩra ũngaĩire igai rĩa arĩa etigĩri rĩĩtwa rĩaku.
• 6. Matukũ ma mũthamaki nĩũkũmonganĩrĩria na mangĩ; mĩaka yake ikaigana ta ya njiaro nyingĩ.
• 7. Egũtũũra aikarĩire gĩtĩ kĩa ũnene mbere-inĩ ya Ngai o nginya tene: athĩrĩra ũtugi o na ũhoro ũrĩa wa ma mamũrindagĩrĩre.
• 8. Na nĩndĩĩkĩinagĩra rĩĩtwa rĩaku ngĩrĩkumagia mĩndĩ na mĩndĩ, ’hingagie mĩĩhĩtwa yakwa mũthenya o mũthenya.

Home