Go Back

Thaburi Chapter 55

1. NGAI, tega matũ, ũigue ihoya rĩakwa; ndũgakĩĩhithe ngĩgũthaitha.
2. Thikĩrĩria ũhoro wakwa, na ũnjokerie: nĩ kũũrũra njũrũraga o ngĩng’ung’uaga na ngĩcayaga,
3. Nĩ ũndũ wa mũgambo wa thũ, tondũ o wa gũkĩgũmĩrũo nĩ arĩa imaramari: nĩ amu nĩ kũngũithĩria mangũithagĩria maũndũ maaganu, gũ’thũkĩra magagĩ’thũkĩra nĩ ũrĩa mandakarĩire.
4. Ngoro yakwa nĩ nduure mũno thĩinĩ wakwa, na ngagũĩrũo nĩ matebeba ta ma gĩkuũ.
5. Ndĩ mũtonye nĩ guoya o na gĩtetemo, ngakĩhubĩkanĩrio nĩ kĩmako kĩnene.
6. Ndĩrakiuga atĩrĩ, Na arĩ korũo ndĩ na mathagu ta ndutura! nĩ kũgũrũka ingĩĩgũrũkĩra, ’thiĩ ngahurũke.
7. Hĩndĩ ĩo ndethiĩra, ’thiĩ ndurure; ndathiĩ gũikara o werũ-inĩ.
8. Nĩ kũhanyũka ingĩhanyũka nginye harĩa he na mwĩgitio, ngegitie rũhuho rũrũ rũnene, nyume kĩhuhũkanio-inĩ.
9. Mwathani, manine; rigithania nĩmĩ ciao: amu gũkũ itũũra rĩrĩ nyonete o maũndũ ma ũtoi na mahiũrania.
10. Mũthenya o na ũtukũ marĩthiũrũrũkaga marĩ igũrũ rĩa rũirigo rũarĩo: kuo thĩinĩ gũikaraga waganu o na kĩũnũhu.
11. Gatagatĩ-inĩ karĩo no maũndũ ma ũmaramari kũrĩ; mathome-inĩ marĩo gũtirĩ hingo kwagaga ũhahanyi o na ũrĩa-ma.
12. Amu ningĩ ũrĩa ũ’hereketie ti thũ; hĩndĩ ĩo ndahota gwĩtiirĩrĩria: ningĩ ti ũrĩa mũ’thũũri wĩĩ’neneheirie; ũcio nĩ kwĩhitha ingĩmwĩhithĩte:
13. No rĩ’, nĩwe, wee, mũndũ wa riika rĩakwa, o wee mũthiritũ wakwa, mũrata wakwa ũrĩa tũmenyaine mũno.
14. Nĩtũragĩaga ndundu njega nawe, na tũgacangania hamwe na kĩrĩndĩ nyũmba-inĩ ya Ngai.
15. Marohobanĩrio nĩ gĩkuũ, maroikũrũka kwa ngoma marĩ o muoyo! amu ũũru nĩguo wĩ gĩtũũro-inĩ kĩao, gwata o thĩinĩ wa ngoro ciao.
16. No niĩ-rĩ, no ngayagĩre Ngai, nake we Jehova nĩarĩkĩ’honokia.
17. Hwaĩ-inĩ, na rũcinĩ, o na ningĩ mĩaraho, no ’ng’ung’uage o ngĩcayaga; nake mũgambo wakwa nĩekũũigua.
18. Rĩu nĩakũũrĩte muoyo wakwa njikare na thayũ itegũthengererũo nĩ mũndũ, amu nĩ aingĩ, acio mangoretie mbaara.
19. Kũigua-rĩ, Mũrungu nĩekũigua, na nĩekũmaherithia, o we ũrĩa ũtũire kuuma o tene wa tene, akĩherithie acio matagarũkagwo nĩ maũndũ, magakĩaga gwĩtigĩra Ngai.
20. Mũndũ ũcio-rĩ, arĩa maratũirie thayũ nake, nĩo atwarĩrĩire moko; nĩathahĩtie kĩrĩko gĩake.
21. Kanua gake kaanyorokete ta ngorono, na ngoro yake no mbaara; ciugo ciake ciororoete o ta maguta, nacio no ta hiũ njomore.
22. Rekereria mũrigo waku na harĩ Jehova; nĩwe ũrĩgũtiiragĩrĩra; ndarĩ hingo angĩreka ũrĩa mũthingu enyenyeke.
23. No andũ acio-rĩ, wee, Ngai, ũkamaharũrũkia o nginya thĩinĩ wa irima rĩrĩa rĩa ũũrĩro; andũ a thakame na ũrĩa-ma, matikaigananĩria matukũ mao: no niĩ hakwa-rĩ, wee nowe ngũtũũra ndĩĩhokete.

Home