Go Back

Thaburi Chapter 49

• 1. IGUAI ũhoro ũyũ, inyuĩ iruka ciothe cia andũ; tegai matũ, inyuothe mũtũũraga gũkũ thĩ;
• 2. Gwata inyuĩ andũ o ũguo, na inyuĩ mũrĩ igweta, inyuĩ itonga o na inyuĩ ngĩa, mũkĩigue inyuothe hamwe.
• 3. Kanua gakwa nĩgekwaria ciugo cia ũũgĩ ũrĩa wa ma; mwĩrurumio wa ngoro yakwa-rĩ, ũkuumana na ũtaũku.
• 4. Ngũinamĩrĩria gũtũ ndĩĩiguĩre ngerekano; ũhoro ũyũ wakwa mũhumbĩke ngũũhumbũria ngĩinagia kĩnanda kĩa mũgeto.
• 5. Nĩ kĩ kĩngĩtũma ndĩĩtigĩre matukũ maakinya marĩa moru, rĩrĩa njigĩrĩirio nĩ waganu wa arĩa mendaga kũndunya gĩikaro,
• 6. O arĩa mehokaga ũtonga wao, magakĩĩraha tondũ wa ũrĩa maingĩhĩtie indo?
• 7. Gũtirĩ ũngĩhota o na atĩa gwĩkũũrĩra mũrũ wa nyina, atĩ arutĩre Ngai kĩndũ kĩngĩmũkũũra;
• 8. (Nĩ gũkorũo ũkũũri wa mĩoyo yao nĩ goro o mũno; no ũtiganwo naguo o nginya tene;)
• 9. Gũtingĩhoteka, atĩ nĩguo mũndũ ũcio atũũre o gũtũũra, atarĩ hingo akonana na kuora.
• 10. Tondũ nĩ kuona akona atĩ andũ arĩa ogĩ no makuaga, gwata kĩrimũ o na ũrĩa kĩnunwa nĩ gũthira mathiraga o hamwe; ũtonga wao magakĩũtiga na andũ angĩ.
• 11. Mbĩrĩra nĩcio ituĩkaga nyũmba ciao cia tene na tene, nocio itũũro ciao nginya njiarũa na njiarũa, o ro acio metanagia ng’ũndũ na marĩĩtwa mao ene.
• 12. Andũ-rĩ, matitũũraga, o na me na igweta; mahaana o ta nyamũ, ũrĩa ikuaga.
• 13. Ĩo nĩyo njĩra ya arĩa irimũ cia mwĩiganio: nao amarũmĩrĩri nĩmagathagĩrĩria ndeto ciao.
• 14. Nĩ kwa ngoma merekeirio, o ta rũũru rũa ng’ondu; mũrĩithi wao nĩ gĩkuũ: rũcinĩ magatuĩka a gwathagwo nĩ andũ arĩa arũngĩrĩru; na kĩhũmba kĩao no gĩthirĩrĩkĩre kwa ngoma, akĩrĩ kuo ũtũũro wao.
• 15. Ĩndĩ muoyo wakwa-rĩ, Ngai nĩ gũkũũra akaũkũũra moko-inĩ ma kũu kwa ngoma; nĩ gũkorũo we nĩwe ũkanjiyũkia.
• 16. Ndũkanetigĩre, mũndũ aatonga, na riri wa gwake weongerera:
• 17. Tondũ-rĩ, aakua, ndarĩ kĩndũ agathiĩ nakĩo; riri ũcio wake ndũgaikũrũkania nake.
• 18. O na angĩtuĩka atĩ rĩrĩa aarĩ muoyo nĩegathagĩrĩria-rĩ, (o nawe, andũ magagĩkũgatha weĩka wega-rĩ,)
• 19. Gũthiĩ agathiĩ o kũrĩ riika rĩrĩa rĩa maithe, acio matagacoka kuona ũtheri rĩngĩ.
• 20. Andũ-rĩ, o na me na igweta, na ti ataũku, mahaana o ta nyamũ, ũrĩa ikuaga.

Home