Go Back

Thaburi Chapter 48

• 1. KŨNENEHA, nĩ Jehova nĩ wa kũgoocwo mũno kũu arĩ, itũũra-inĩ rĩa Ngai witũ, o kũu kĩrĩma gĩake kĩamũre.
• 2. Kĩo nĩ gĩthaka mũno mũtũũgĩrĩre wakĩo; gĩkenagĩrũo nĩ thĩ yothe, kĩrĩma kĩu gĩa Zayuni, kĩu kĩĩ mwena wa gathigathini, o kĩo gĩtũũro kĩa Mũthamaki ũrĩa mũnene.
• 3. Kũu nyũmba-inĩ ciakuo cia ũnene Ngai nĩemenyithanĩtie atĩ nĩwe rĩangĩro iraya na igũrũ.
• 4. Amu-rĩ, athamaki nĩmaagĩĩturanĩire, makĩhĩtũka rũtere marehanĩte othe hamwe.
• 5. Magĩkĩĩonera, na ihinda o rĩu makĩgega, makĩmaka mũno, rĩrĩ rĩngĩ magĩũka o makĩũra.
• 6. O hau-hau nĩ kũinaina maaitĩkire kũinaina; makĩnyitwo nĩ ruo, ta rũa mũndũ mũka aagwata kũrũmwo.
• 7. Wee-rĩ, no taguo ũtũmaga marikabu iria cia Tarashishi ithuthĩke nĩ rũhuho rũrĩa ruumaga na irathĩro.
• 8. O ta ũrĩa twanaigua, noguo tuonete itũũra-inĩ rĩa Jehova mwene mbũtũ cia ita, o kũu gĩtũũro kĩu kĩa Ngai witũ: we Ngai nĩegũkĩrũmia gĩtũũre ho tene na tene.
• 9. Ũtugi waku, Ngai, nĩtũtaranĩtie ũhoro waguo twĩ thĩinĩ wa hekarũ yaku.
• 10. Ũguo rĩĩtwa rĩaku rĩtariĩ, Ngai, noguo ngumo yaku ĩigana o nginya ituri cia thĩ; guoko gwaku kwa ũrĩo-rĩ, kũiyũire o ũthingu.
• 11. Kĩrĩma gĩa Zayuni ta nĩgĩkene, aa mwarĩ wa Juda nĩmagĩcanjamũke, nĩ ũndũ wa matuĩro macio maku.
• 12. Ceeraceerai Zayuni, o na mũgĩgũtũnganĩrie; ta gerai icũĩro ciakuo ndaihie na igũrũ.
• 13. Rũmbũiyai mũno ũrĩa kũirigĩtwo, na mũroranie nyũmba ciakuo cia ũnene; nĩ getha mũkeraga rũciaro rũrĩa rũĩ thutha.
• 14. Amu Ngai ũcio nowe Ngai witũ tene na tene; nĩwe ũrĩtũtongoragia nginya hingo ĩtagathira.

Home