Go Back

Thaburi Chapter 37

1. TIGAGA gwakanwo nĩ ngoro nĩ ũndũ wa arĩa eki ũũru; arĩa eki maũndũ ma wogogi-rĩ, tigaga kũigua ũiru nĩ ũndũ wao.
2. Tondũ ica-ikuhĩ nĩ gũtemwo marĩtemwo ta mahuti, marĩhoha ta ria rĩrĩa iruru, ũrĩa rĩcokaga kũhoha.
3. Wĩhokage o Jehova, na wĩkage wega; wĩtũũrĩre o bũrũri-inĩ, na ũthingatage o wĩhokeku.
4. Nĩrĩo ũngĩtũũra wĩkenagĩra nĩ ũndũ wa Jehova, nake nĩarĩkũheaga maũndũ marĩa ngoro yaku ĩhoyaga.
5. Ũhoro wa njĩra yaku, rekagĩrĩria Jehova; mwĩhokage o we, nake nĩwe ũrĩgũthondekagĩra.
6. Ũthingu waku nĩakauumĩria ware ta ũtheri, kĩhooto gĩa cira waku gĩkĩare o ta mũthenya barigici.
7. Kindagĩria harĩ Jehova, ũkamweterera ũtegũthethũka; tigaga gwakanwo nĩ ngoro nĩ ũndũ wa mũndũ ũrĩa ũgaacĩire njĩra-inĩ yake, atĩ ũhĩahĩe nĩ ũndũ wa mũndũ wĩkithagia maũndũ ma uungumania.
8. Eheragia marakara, tigana na matũkũya; tigaga gwakanwo nĩ ngoro, amu no gũtũma wĩke ũũru.
9. Tondũ arĩa mekaga ũũru nĩ kũng’ũrio makang’ũrio, no andũ arĩa metagĩrĩra Jehova, nĩo makagaya thĩ.
10. Amu-rĩ, no ihinda inyinyi, ũrĩa mwaganu acoke aagwo; ũkabara wega gĩikaro kĩu gĩake, na ndangĩkorũo ho.
11. No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.
12. Ũrĩa mwaganu nĩoingumanagĩria ũrĩa mũthingu maũndũ, akĩmũhagaranagĩria magego.
13. Ũcio-rĩ, Mwathani no gũtheka amũthekagĩrĩra, nĩ gũkorũo nĩoine atĩ mũthenya wake no ũrakinya.
14. Acio aaganu nĩmacomorete rũhiũ, na makageta ũta wao, nĩguo mairũre mũndũ ũrĩa mũthĩnĩki, o ũrĩa mwagi, kũũraga makĩũrage arĩa a mĩthiĩre mĩerekereru.
15. Rũhiũ rũu rũao nĩ ngoro ciao ene rũrĩtheca, namo mota mao no mathuthĩke.
16. Kĩndũ kĩnyinyi kĩĩ na mũndũ mũthingu gĩĩ kĩguni kũrĩ ũingĩ wa ũtonga wĩ na andũ aingĩ aaganu.
17. Tondũ-rĩ, moko ma arĩa aaganu nĩ kũbeberũo makabeberũo, no andũ arĩa athingu, Jehova nĩamatiiragĩrĩra.
18. Andũ arĩa akinyanĩru-rĩ, Jehova nĩarũmbũyagia matinda mao: igai rĩao nĩ rĩa gũgĩtũũra tene na tene.
19. Hingo ya mũtino, o matingĩconorithio; gwata matukũ ma ng’aragu no kũhũna makahũnaga.
20. No atĩrĩ, andũ arĩa aaganu nĩ gũtoma magatoma, thũ cia Jehova igatuĩka ta ũgemu wa mawerũ; nĩ kũmicĩrĩra igakĩmicĩrĩra, ithirĩrĩkĩre o ta ndogo.
21. Ũrĩa mwaganu ohoraga, akaaga gũcoka kũrĩha, ĩndĩ ũrĩa mũthingu ekanaga uuma-andũ, na kũheana akaheana.
22. Nĩ amu arĩa arathime nĩ Jehova nĩo makagaya thĩ, na arĩa arume nĩwe nĩ kũng’ũrio makang’ũrio.
23. Makinya ma mũndũ nĩ Jehova ũmũrũmagĩria, na gũkenera nĩakenagĩra njĩra ĩo yake.
24. O na aagũa, ndangĩtengemana o gũtengemana, tondũ Jehova akoragwo amũnyitĩrĩire guoko.
25. Ndarĩ mũnyinyi, na rĩu ndĩ mũkũrũ, na ndirĩ ndona mũndũ mũthingu atiganĩirio, kana mbeũ yake ĩkĩhoyanga irio.
26. Atindaga agĩĩkana uuma-andũ, o gwata kuohoranĩra, na mbeũ yake nayo no ndathime.
27. Wĩthemagie ũũru-inĩ, wĩkage o wega, nĩguo wĩtũũrĩre tene na tene.
28. Amu Jehova enda o maũndũ ma kĩhooto, na arĩa marĩ ũiguano nake ndangĩmatiganĩria; o nĩmamenyagĩrĩrũo nginya tene na tene: nayo mbeũ ya arĩa aaganu nĩ kũng’ũrio ĩkang’ũrio.
29. Arĩa athingu nĩo makagaya thĩ, na gũtũũra mamĩtũũre o nginya tene.
30. Ũrĩa mũthingu-rĩ, kanua gake nĩ ndeto cia ũũgĩ kang’ung’uaga, rũrĩmĩ rũake rũgakĩaragia kĩhooto.
31. Kĩrĩra kĩa Ngai wake kĩrĩ o ngoro-inĩ yake; makinya make gũtirĩ o na rĩmwe rĩngĩgĩtenderũka.
32. Ũrĩa mwaganu aikaraga agĩcũthagĩrĩria ũrĩa mũthingu, agacaragia ũrĩa angĩmũũragithia.
33. Jehova nake ndangĩmũtiga moko-inĩ make, kana amũtue mwĩhia aagwata gũcirithio.
34. Etagĩrĩra Jehova, ũrũmagĩrĩre njĩra yake, nake nĩagagũtũtũgĩria ũgae thĩ: arĩa aaganu makĩng’ũrio-rĩ, wee nĩũkerorera.
35. Ndanona mũndũ mwaganu arĩ na itua-nda inene, earamĩtie ta mũtĩ mũruru ũkũrĩire o imerero rĩaguo.
36. Ngĩcoka kũhĩtũka-rĩ, Hĩ, githĩ ndakĩrĩ ho! ngĩmũcaria na ndaigana kuoneka.
37. Bara wega mũndũ ũrĩa mũkinyanĩru ũrĩa mũrũngĩrĩru-rĩ, ũkĩmuone: nĩ amu ũcio, ũhoro wake wa thutha nĩ thayũ.
38. Ha ũhoro wa arĩa aremi, nĩ kũninwo makaninanĩrio hamwe; arĩa aaganu-rĩ, thutha wao nĩ kwagio ũkaagithio.
39. Arĩa athingu, ũhonokio wao uumaga kwĩ Jehova; nĩwe kĩirigo kĩao kĩa hinya hĩndĩ ya mĩnyamaro.
40. Jehova nĩ kũmateithia amateithagia, akamahatũra; amateithũraga harĩ arĩa aaganu, agakĩmahonokia, nĩ ũndũ we nĩwe marahĩire.

Home