Go Back

Thaburi Chapter 35

• 1. Ĩ JEHOVA, gariũrana na arĩa maragariũrana na niĩ; rũa na acio marandũithia.
• 2. Oya ngo, o gwata gĩthuma, warahũke ũkĩndeithie.
• 3. Ruta itimũ o narĩo, ũtĩmĩrie acio ma’thingatĩte: kĩĩre ngoro yakwa atĩrĩ, Nĩ niĩ ũhonokio waku!
• 4. Acio macaragia muoyo wakwa-rĩ, nĩmaconoke, manyararĩke; nĩmacokio na thutha, magegeare, acio ma’thugundagĩra ũndũ mũũru.
• 5. Nĩmatuĩke ta mũũngũ mũũmbũre nĩ rũhuho, nake mũraika wa Jehova o akĩmatindĩkaga.
• 6. Njĩra yao ĩrogĩa nduma, na ĩtendere, nake mũraika wa Jehova athingatanĩte o nao.
• 7. Nĩ ũndũ nĩmanyembeire wabu ya kũndega, na hatarĩ gĩtũmi; magakĩenjera muoyo wakwa irima, o ũguo, tũhũ.
• 8. Mwĩki ũguo arokorererũo nĩ mwanangĩko na aterĩgĩrĩire; wabu ĩo embanĩire ĩromũgwatia we mwene: arogũa thĩinĩ wayo aanangĩke arĩ we.
• 9. Nayo ngoro yakwa hĩndĩ ĩo no ĩcanjamũkĩre Jehova, ĩgĩkenyũke o gũkenyũka nĩ ũndũ wa ũhonokio waku.
• 10. Mahĩndĩ makwa mothe no makiuge atĩrĩ, Jehova, nũ ũkĩhaana tawe, o wee ũteithũraga mũndũ ũrĩa mũthĩnĩku harĩ ũrĩa ũmũkĩrĩtie hinya, ĩĩ-ni, ũrĩa mũthĩnĩki, o ũrĩa mwagi, ũgakĩmũteithũra harĩ ũrĩa ũmũburaga?
• 11. Nĩgũũkĩrĩte aiganĩrĩri igenyo; makanjũria maũndũ marĩa itekũmenya.
• 12. Wega wakwa mandĩhaga na ũũru, ngoro yakwa igagĩtigwo na ihooru.
• 13. No niĩ hakwa-rĩ, maarũara, ndehumbaga o ikũnia, o na ngethĩnia ngoro nĩ kwĩima irio: mahoya macio makwa no manjokerere o gĩthũri-inĩ gĩakwa mwene.
• 14. Ndaikaraga ta arĩ mũrata wakwa kana mũrũ wa maitũ ũrũarĩte; ngethikĩra o ’thitĩte nĩ kĩeha, ta mũndũ ũrarĩra akuĩrĩirũo nĩ nyina.
• 15. No niĩ-rĩ, ndahĩngwo, o no gũkena maakenire, magĩkĩĩũngania hamwe: ndonganĩirũo nĩ andũ a njerũa, arĩa itoĩ; magĩikara o makĩndarũraga mategũtigithĩria.
• 16. O ta ũrĩa gwĩkagwo nĩ ithagathago iria ithekererithagia andũ maruga-inĩ, o nao nĩ kũhagaria maa’hagaranagĩria magego.
• 17. Jehova, nĩ ihinda rĩigana atĩa ũgũikara o wĩroreire? ndũgĩtunyũkithie muoyo wakwa wanangi-inĩ wao; ũyũ wakwa wa mũmwe-rĩ, ũkĩmũhonokie harĩ ngatia icio.
• 18. Nĩ ngatho ndĩĩgĩgũcokagĩria ndĩ kĩũngano-inĩ kĩrĩa kĩnene; kũu gwĩ kĩrĩndĩ kĩingĩ nĩkuo ndĩrĩgũkumagĩria.
• 19. Acio metuĩte thũ ciakwa tũhũ, ndũkareke makangenerera; acio magĩ’thũũrĩte hatarĩ gĩtũmi-rĩ, tiga kũreka moinanĩre maitho.
• 20. Amu o ti ndeto cia thayũ maaragia, no nĩ maũndũ ma maheni mathugundaga ma kũigĩrĩra andũ a bũrũri arĩa ahoreri.
• 21. Ĩĩ-ni, o na nĩmanjathamagĩria tũnua twao, makoiga, Haiya! haiya! ũrĩa tũretereire-rĩ, maitho maitũ anga matiakĩona!
• 22. Ũhoro ũcio, wee Jehova, nĩwĩoneire; tiga gũgĩkira: Mwathani, tiga kũnjikara haraya.
• 23. Ĩribaribe, ũhindũke, ũnduĩre na kĩhooto; cira wakwa ũkĩnjirĩrĩre, wee Ngai wakwa, Mwathani wakwa.
• 24. Jehova Ngai wakwa-rĩ, nduĩra kũringana na ũthingu waku; ndũgakĩreke mangenerere.
• 25. Nĩmatige kũrekwo moige atĩrĩ, na ngoro ciao, Haiya! ũguo noguo tũrendaga! nĩmagirio moige atĩrĩ, Tũrĩ kũmũmerũkia!
• 26. Andũ acio mangenagĩrĩra rĩrĩa ndona ũũru-rĩ, nĩmaconoke, magegeare othe hamwe; acio meĩ’nenehagĩria-rĩ, marohubwo nĩ njono, o gwata ũnyararĩku.
• 27. Nao arĩa a kũigua wega ũthingu wakwa wahandĩka, nĩmakũngũiye, magĩe na gĩkeno; nĩmatũũre moigaga atĩrĩ, Jehova aroneneha, ũcio wĩkenagĩra nĩ ndungata yake gũikara ĩhoroheirũo!
• 28. Na niĩ rũrĩmĩ rũakwa no rũng’ung’uage ndeto cia ũthingu waku, ndindage mũthenya wothe ngĩtereta o cia gũkũgooca.

Home