Go Back

Thaburi Chapter 33

1. INYUĨ athingu, kũngũiyai nĩ ũndũ mwĩ na Jehova; andũ arĩa arũngĩrĩru nĩo maagĩrĩirũo nĩ kũmũkumia.
2. Cokeriani Jehova ngatho na kĩnanda kĩa mũgeto; mũmũinĩre mũkĩmũgoocaga na kĩnanda kĩrĩa kĩgete na nga ikũmi.
3. Itĩkai kũmũinĩra rũĩmbo rũerũ; iniai inanda na ũgereki, mũgĩkenũkaga o gũkenũka.
4. Nĩ ũndũ-rĩ, uuge wa Jehova nĩ mwerekereru; wĩra wake wothe nĩ wa kwĩhokwo.
5. Ũndũ ũrĩa enda nĩ ũthingu, o na kĩhooto: thĩ ĩiyũire ũtugi wa Jehova o kũiyũra.
6. Kũũmbwo kwa igũrũ, nĩ uuge wa Jehova warĩũmbire; mwaranĩrie wa ũingĩ wothe wakuo ũgĩkĩũmbwo nĩ mũheeho wa kanua gake.
7. Maĩ ma iria rĩrĩa inene amonganĩtie magaikara ta kĩhumbu; marĩa ma kũrĩa kũriku mũno amekĩrĩte nyũmba cia kũmaiga mũthithũ.
8. Andũ a thĩ yothe nĩmagĩĩtigĩre Jehova; mabũrũri mothe arĩa mamatũũraga nĩmamũguoyohere.
9. Amu nĩwe woigire, na gũgĩtuĩka guo; nĩwe waathanire, ũndũ ũcio ũgĩkĩgĩa, ũkĩrũma.
10. Jehova-rĩ, ũhoro ũrĩa wĩtaarĩtwo nĩ ndũrĩrĩ, nĩaũthatagia; mathugunda ma irĩndĩ, agatũma matuĩke ma mana.
11. Ũndũ ũrĩa Jehova etaarĩte arĩ we ũtũũraga wĩ mũrũmu nginya mĩndĩ na mĩndĩ, mathugunda ma ngoro yake-rĩ, magagĩkinyĩrĩra njiaro na njiaro.
12. Gũkena, nĩ rũrĩrĩ rũrĩa Jehova arĩ we Ngai waruo, o kĩo kĩrĩndĩ kĩrĩa ethurĩire gĩgatuĩka igai rĩake.
13. Jehova e kũrĩa igũrũ nĩacũthagĩrĩria; kũbara nĩabaraga ciana cia kĩrĩndĩ o ciothe:
14. E kũu gĩtũũro-inĩ gĩake nĩ kũng’etia ang’etagia andũ othe arĩa matũũraga thĩ;
15. O we mũũmbi wa ngoro ciao othe, namo mawĩra mao mothe agakĩmacucura.
16. Mũthamaki gũtirĩ ũngĩhonoka nĩ kũgĩa na ita nyingĩ; njamba ndĩngĩĩteithũra nĩ ũrĩa ĩĩ ngandĩru mũno.
17. Ha ũhoro wa kũhonokia mũndũ, mbarathi-rĩ, nĩ ya tũhũ, o na ndĩrĩ mũndũ ĩngĩguna nĩ hinya wayo kũneneha.
18. Atĩrĩrĩi, riitho rĩa Jehova rĩerekeire harĩ arĩa amwĩtigĩri, rĩgakĩerekera harĩ andũ arĩa merĩgagĩrĩra o ũtugi wake;
19. Nĩguo ateithũrage maroho mao gĩkuũ-inĩ, gwata hingo ya ng’aragu amaikaragie na muoyo.
20. Maroho maitũ-rĩ, makirĩrĩirie metereire o Jehova: we nowe ũteithio witũ o na ngo iitũ.
21. Nĩ amu ngoro ciitũ igũtũũra o ikenaga nĩwe, nĩ ũndũ rĩĩtwa rĩake rĩamũre nĩrĩo twĩhokete.
22. Ũtugi waku, Jehova, tũma ũikarage na ithuĩ, kũringana o na ũrĩa tũtũire tũkwĩrĩgĩrĩire.

Home