Go Back

Thaburi Chapter 147

• 1. GOOCAI Jehova; amu kũgooca Ngai witũ na rũĩmbo nĩ ũndũ mwega; kũmũkumia-rĩ, nĩ ũndũ ũrĩ gĩkeno, ningĩ noguo wagĩrĩire.
• 2. Jehova nĩwe wakaga Jerusalemu; a Isiraeli arĩa aingate, nĩwe ũmacokagĩrĩria.
• 3. Andũ arĩa athuthĩku ngoro, nĩ kũhonia amahonagia, akamoha nguraro ciao.
• 4. Ataraga njata o ũrĩa ciigana; ciothe akaitua marĩĩtwa.
• 5. Mwathani witũ nĩ mũnene, akagĩa ũhoti mũno; ũmenyi wake ndũrĩ gĩturi.
• 6. Andũ arĩa ahoreri, Jehova nĩamanyitagĩrĩra, no andũ arĩa aaganu nĩ kũharũrũkia amaharũrũkagia o nginya tĩri-inĩ.
• 7. Kĩinĩrei Jehova mũmũcokerie ngatho, mũinĩre Ngai witũ mũmũgooce na kĩnanda kĩa mũgeto,
• 8. O we ũrĩa ũhumbagĩra igũrũ na matu, akĩrĩ o we ũthagathagagĩra thĩ mbura, na nĩwe ũtũmaga nyeki ĩmere irĩma-inĩ.
• 9. Nĩwe ũheaga nyamũ irio ciacio, gwata ciana cia mahuru iria ikayaga.
• 10. We ti atĩ akenagĩra hinya ta wa mbarathi; magũrũ ma mũndũ, ti atĩ nĩangĩigua wega nĩmo.
• 11. Jehova-rĩ, aiguaga wega no ũndũ wa arĩa amwĩtigĩri, o arĩa maikaraga metereire ũtugi wake.
• 12. Gooca Jehova, wee Jerusalemu; kĩrahe Ngai waku, wee Zayuni!
• 13. Amu mĩgĩĩko ya ihingo ciaku nĩamĩĩkĩrĩte hinya; kũu gwaku thĩinĩ-rĩ, nĩarathimĩte ciana ciaku.
• 14. Atũmĩte gwaku gũtũũre thayũ o nginya ndere, na nĩakũhũnagia ngano, o ĩrĩa ĩrĩ ũnoru.
• 15. Arekagia uuge wake ũgakinya gũkũ thĩ; ũhoro wake nĩũhanyũkaga narua mũno.
• 16. Nĩwe ũtũmaga kuure tharunji, ĩhaana ta guoya mwerũ; nayo mbaa akamĩhura ta mũhu.
• 17. Mbura yake ya mbembe amĩitaga ta twenyũ twa mũgate: heho ĩo yake-rĩ, nũ ũngĩhota kũmĩĩtiirĩrĩria?
• 18. Agacokaga kũrekia ũhoro wake agatũma itwekũke; ahurutithagia rũhuho rũake, maĩ magakĩnyũrũrũka.
• 19. Ũhoro wake nĩ Jakubu oimagĩrĩria, nĩ Isiraeli amenyithagia mĩtugo ĩrĩa aathanĩte, o na matua marĩa atuĩte.
• 20. Ndarĩ eka rũrĩrĩ rũngĩ ta ũguo; matua macio make-rĩ, ndũrĩrĩ itirĩ ciamamenya. Goocai Jehova!

Home