Go Back
Thaburi Chapter 145
- 1. NĨNGŨKŨGOOCA ngũtũũgĩrie, Ngai wakwa, wee Mũthamaki,
rĩĩtwa rĩaku-rĩ, ndĩrĩgathage nginya mĩndĩ na mĩndĩ.
- 2. Gũtirĩ mũthenya itarĩkũgathaga,
ngĩkumagie rĩĩtwa rĩaku nginya tene na tene.
- 3. Kũneneha nĩ Jehova, nĩ wa kũgoocwo mũno;
ũnene wake ndũngĩthuuthuurĩka.
- 4. Wee maũndũ marĩa waneka-rĩ, rũciaro o rũciaro no rũrahagĩre rũrĩa rũngĩ,
rũruumbũrĩre mawĩko macio maku ma ũhoti.
- 5. Nĩ gũtarania ndĩĩtaranagia ũtĩĩku waku, ũrĩa ũkaru waguo wĩ riri,
o gwata mawĩko maku, ũrĩa me ma magegania.
- 6. Maũndũ ma itua-nda marĩa wĩkaga-rĩ, andũ mariugaga ũrĩa me ma hinya;
o na niĩ, maũndũ maku no ng’anage ũnene wamo.
- 7. Marĩririkanaga ũrĩa wega waku ũingĩhĩte, maheanage ũhoro waguo,
ũthingu waku naguo, gũkũngũiya maũkũngũyagie.
- 8. Jehova nĩ muuma-andũ, ningĩ nĩ wa matha maingĩ;
ndahiũhaga kũrakara, na e na ũtugi mũnene.
- 9. Jehova-rĩ, nĩekaga andũ othe wega;
indo ciothe iria aathondekire gũtirĩ atarĩ tha nakĩo.
- 10. Mawĩra macio maku mothe, Jehova, megũtũũra o magũcokagĩria ngatho;
nao andũ arĩa maiguaine nawe, kũgatha no matũũre makũgathaga.
- 11. Megũtũũra moigaga ũrĩa ũthamaki waku wĩ riri,
o magĩteretaga ũhoro wa ũrĩa wee wĩ na ũhoti;
- 12. Maũndũ macio maku ma ũhoti mamamenyithie ciana cia kĩrĩndĩ,
o gwata ũthamaki waku, mamere ũrĩa ũkaru waguo wĩ riri.
- 13. Ũthamaki waku nĩ ũrĩa wa tene na tene,
wathani waku-rĩ, ũtũũraga nginya njiarũa na njiarũa.
- 14. Jehova atiiragĩrĩra arĩa othe mekwenda kũgũa,
na akainamũra arĩa othe mekonotete.
- 15. Andũ othe nowe maroragĩrĩria,
nawe ũkamaheaga irio ciao ihinda rĩacio rĩakinya.
- 16. Ũkumbatũragia guoko gwaku,
kĩrĩa gĩothe kĩĩ muoyo ũgakĩhũnia kĩrĩa gĩkwenda.
- 17. Jehova ikĩro-inĩ ciake ciothe no mũthingu,
maũndũ make mothe amekaga o na ũtugi.
- 18. Jehova-rĩ, arĩa othe mamũkayagĩra, akoragwo hakuhĩ nao,
o arĩa othe mamũkayagĩra nĩ kũmwĩhoka na ma.
- 19. Andũ arĩa amwĩtigĩri nĩamekagĩra ũrĩa mekwenda;
o na nĩaiguaga kĩrĩro kĩao, akamahonokia.
- 20. Jehova nĩamenyagĩrĩra arĩa othe mamwenda,
nao arĩa othe aaganu, nĩ kũnina akamanina.
- 21. Kanua gakwa gegũtũũra o gakumagia Jehova;
nao arĩa othe me mwĩrĩ marogathaga rĩĩtwa rĩake rĩamũre nginya mĩndĩ na mĩndĩ!
Home