Go Back

Thaburi Chapter 119

• 1. GŨKENA-RĨ, nĩ arĩa matũũraga na mĩthiĩre mĩkinyanĩru, nĩo arĩa ageri njĩra ya kĩrĩra kĩa Jehova.
• 2. Andũ gũkena no arĩa marũmagia maũira macio make, o arĩa mamũrongoragia na ngoro yothe.
• 3. Nĩo arĩa matekaga waganu o na ũrĩkũ, tiga kũgera mageraga o njĩra ciake.
• 4. Wee mwene nĩwatwathire tũiguage mataaro maku, tũkĩmamenyagĩrĩre o na kĩyo.
• 5. Na arĩ korũo mĩthiĩre yakwa ĩkĩrĩ mĩkindĩru, ngakĩrũmagĩrĩra mĩtugo o ĩo waathanire!
• 6. Hĩndĩ ĩo-rĩ, ndingĩgaconoka, nduĩkĩte atĩ maathani maku mothe nĩmo mbaragĩrĩra.
• 7. Nĩ ngatho ndĩrĩgũcokagĩria ndĩ o na ngoro nũngĩrĩru, ngĩĩruta ngĩmenyaga matua maku o ũguo me ma kĩhooto.
• 8. Mĩtugo ĩo mĩathane nĩwe, nĩndĩrĩmĩrũmagĩrĩra: nawe-rĩ, ndũgakĩndiganĩrie o biũ!
• 9. Mũndũ mwanake-rĩ, nĩ atĩa angĩtũma mĩthiĩre yake ĩtuĩke mĩtheru? nĩ atĩrĩ, nĩ kũmĩmenyagĩrĩra kũringana na ũrĩa uugĩte.
• 10. Niĩ nĩngũrongoretie na ngoro yakwa yothe: ndũkanakĩreke njange ndigane na maathani maku.
• 11. Uuge waku nĩndĩwĩigĩire thĩinĩ wa ngoro yakwa, ndikanae gũkwĩhia.
• 12. Wee Jehova, ũrokĩgathwo! kĩndutage mĩtugo ĩo wathanĩte.
• 13. Niĩ-rĩ, nĩ kwĩrana njokaga kwĩrana na mĩromo yakwa matuĩro mothe ma kanua gaku.
• 14. Njĩra ĩo ya maũira maku ndĩmĩiguagĩra wega gũkĩra ũtonga o ũrĩkũ kana ũrĩkũ.
• 15. Mataaro maku nĩmo ndĩrĩtaranagia ũhoro wamo, ngĩbaragĩrĩre njĩra ciaku.
• 16. Mĩtugo ĩo mĩathane nĩwe, noyo ndĩrĩĩkenagĩra nĩ ũndũ wayo; ndingĩriganĩrũo nĩ ũguo uugĩte.
• 17. Niĩ, ndungata yaku, njĩka wega, ndũũre o muoyo, nĩguo ngĩmenyagĩrĩre ũhoro waku.
• 18. ’Humbũria maitho, ndĩĩonere maũndũ ma magegania ndutĩte kĩrĩra-inĩ gĩaku.
• 19. Niĩ ndĩ mũgeni gũkũ thĩ: ndũgakĩ’hithe maathani maku.
• 20. Ngoro yakwa nĩ gũthuthĩka ĩthuthĩkĩte nĩ kwĩriragĩria matuĩro maku o mahinda mothe.
• 21. Arĩa egereri-rĩ, nĩ gũkũma ũmakũmĩte, magatuĩka athahu, acio a gũcanga matiganĩte na maathani maku.
• 22. Njaũra kĩnyenyo, na kĩrario, amu ndũire nũmĩtie maũira marĩa maku.
• 23. Gwata anene maanaikara makĩnjiragĩra, ĩndĩ ndungata ĩno yaku no gũtarania mĩtugo ĩrĩa waathanire.
• 24. Ĩĩ-ni, maũira maku nĩmo mangenagia, magagĩtuĩka nĩmo a’hei kĩrĩra.
• 25. Ngoro yakwa ĩgwataine o na tĩri: kĩrurumũkie muoyo wakwa kũringana na ũrĩa wanoiga.
• 26. Nĩndakuonirie ikĩro ciakwa, nawe ũkĩnjokeria ũhoro: no kĩndutage mĩtugo ĩrĩa waathanire.
• 27. Njiguithia ũrĩa njĩra ĩthiĩte ya mataaro macio maku, ngĩtaranagie maũndũ maku ũrĩa me magegania.
• 28. Ngoro yakwa nĩ gũtwekũka ĩratwekũka nĩ ũndũ wa kĩeha: njĩkĩra hinya kũringana na ũrĩa wanoiga.
• 29. ’Thengeria njĩra ya ũrongo-rĩ, na tondũ wa wega waku ĩtĩkĩra kũ’heaga kĩrĩra gĩaku.
• 30. Njĩra ya wĩhokeku nĩyo ’thurĩte; matua maku-rĩ, ndĩmaigĩte o mbere yakwa.
• 31. Maũira macio maku ndũire ngwatanĩte o namo: Jehova, ndũkanakĩreke njonoke.
• 32. Ndĩĩhanyũkaga o na njĩra ya maathani maku, wakorũo nĩwoneire ngoro yakwa mĩaramano.
• 33. Jehova, nyonereria njĩra ya mĩtugo ĩrĩa mĩathane nĩwe, na niĩ no nũmanĩrĩre nayo o nginya gĩturi.
• 34. Njĩkĩra mbuguĩro, na kĩrĩra gĩaku nĩndĩrĩkĩrũmagia, ĩĩ-ni, ndĩkĩmenyagĩrĩre na ngoro yakwa yothe.
• 35. Tũma ’thiage na njĩra o ĩo ya maathani maku, amu nĩ gũkena ndĩĩkenagĩra nĩ ũndũ wamo.
• 36. Erekeria ngoro yakwa na kũrĩ maũira macio maku, ĩtige kwerekera na harĩ ũhahami.
• 37. Hũgũra maitho makwa matige kwĩrorera maũndũ matarĩ ma ma; rurumũkia muoyo wakwa ngĩthiaga o na njĩra ciaku.
• 38. Ndungata ĩno yaku, mĩrũmĩrie uuge waku, ũrĩa ũkoniĩ ũhoro wa gũgwĩtigĩra.
• 39. Njehereria kĩnyenyo kĩrĩa ndĩĩtigagĩra, nĩ amu matuĩro maku no mega.
• 40. Atĩrĩrĩ, mataaro maku nĩmo ndũire ndĩĩriragĩria: kĩrurumũkie muoyo wakwa nĩ ũndũ wa ũthingu waku.
• 41. Reke mĩtuganĩre yaku, wee Jehova, ĩkĩnginyĩrĩre, nginyĩrĩrũo nĩ ũhonokio waku kũringana o na uuge ũrĩa waku.
• 42. Nĩguo ngagĩkoragwo ndĩ na ũndũ wa gũcokeria ũrĩa ũngĩnjuka, nĩ amu ũhoro ũcio waku noguo ndĩĩhokete.
• 43. Ndũgagĩtunye kanua gakwa kiugo kĩrĩa kĩa ma o gũtunya, amu matua maku nĩmo ndũire ndĩĩrĩgĩrĩire.
• 44. Na niĩ nĩngũtũũra ’menyereire kĩrĩra gĩaku o ro hĩndĩ ciothe nginya tene o na tene;
• 45. Na ng’endage itarĩ na ũndũ ũkũ’hatĩka, nĩ gũkorũo nongoretie o ũmenyi wa mataaro macio maku.
• 46. O na maũira macio maku-rĩ, ndĩrĩheanaga ũhoro wamo mbere-inĩ ya athamaki, na ndiconoke.
• 47. Ngũtũũra ndĩĩkenagĩra nĩ ũndũ wa maathani maku, arĩ mo ngĩendete.
• 48. O na kwarĩra nĩndĩrĩaragĩra maathani macio maku hĩ, akĩrĩ mo nyenda, na gũikara njikarage ngĩtarania maũndũ ma mĩtugo ĩo wathanĩte.
• 49. Ririkanaga ũhoro ũrĩa werire ndungata ĩno yaku, nĩ gũtuĩka wee nĩũtũmĩte ngĩe na wĩrĩgĩrĩro.
• 50. Ũndũ ũcio nĩũ’horeragia ndĩ mĩtandiũko-inĩ, nĩ amu uuge waku nĩguo ũrurumũkagia muoyo wakwa.
• 51. Andũ arĩa egereri, kũndenda mandendete mũno, na ndirĩ ndakĩehũka ngatigana na kĩrĩra gĩaku.
• 52. Ndirikanaga matuĩro maku, Jehova, marĩa ma tene-inĩ, ngenina ihooru.
• 53. Nĩ’nyitagwo nĩ marakara marĩa maakanu nĩ ũndũ wa arĩa aaganu, nĩo arĩa matiganĩte na kĩrĩra gĩaku.
• 54. Mĩtugo ĩrĩa mĩathane nĩwe nĩyo ndũire nyinaga ndĩ mũciĩ ũyũ njikaire ndĩ mũgeni.
• 55. Nĩndirikanaga rĩĩtwa rĩaku, Jehova, ũtukũ, ngakĩmenyagĩrĩra kĩrĩra gĩaku.
• 56. Ũguo-rĩ, nĩguo nyonete, nĩ ũndũ ndũire nũmĩtie mataaro macio maku.
• 57. Jehova, nĩwe rũgai rũakwa; wee nĩndĩkĩtie gwĩtuĩra atĩ mohoro marĩa uugĩte nĩmo ngũtũũra nũmĩtie.
• 58. Ngũthaithĩte na ngoro yakwa yothe atĩ ũndugage: tũma wega waku ũnginyagĩre kũringana o na uuge ũrĩa waku.
• 59. Ndĩĩciragia ũhoro wa mĩthiĩre yakwa, ngagĩcokia makinya makwa na kũrĩ maũira maku arĩ mo.
• 60. Nĩ kũhiũha ’hiũhaga, itekũgonderera, ngakĩhiũha o kũmenyerera maathani macio maku.
• 61. Ndanarigicĩrio nĩ mĩũgũ ya andũ arĩa aaganu, no kĩrĩra gĩaku ndirĩ ndariganĩrũo nĩkĩo.
• 62. Ndĩrĩũkagĩra o ũtukũ gatagatĩ nĩ getha ngũcokerie ngatho nĩ ũndũ wa ũrĩa matua maku me ma kĩhooto.
• 63. Thiritũ yakwa no ya arĩa othe agwĩtigĩri, o acio mamenyagĩrĩra mataaro maku.
• 64. Ũtugi waku, Jehova, ũiyũire gũkũ thĩ o kũiyũra: kĩndutage mĩtugo ĩrĩa waathanire.
• 65. Ndungata ĩno yaku nĩũmĩĩkĩte o wega, wee Jehova, kũringana o na ũrĩa wanoiga.
• 66. Kĩndutage gũkũũrana maũndũ wega o na kũmamenya, nĩ gũkorũo maathani maku niĩ nĩndĩmetĩkĩtie.
• 67. Mbere itaanona thĩna nĩndahĩtagia, no rĩu uugo waku nĩndĩũmenyagĩrĩra.
• 68. Wee wĩ mwega, na no wega wĩkaga: kĩndutage mĩtugo ĩrĩa waathanire.
• 69. Andũ arĩa egereri nĩ gũ’thondekera ma’thondekeire maheni, no niĩ-rĩ, ngũtũũra nũmĩtie mataaro maku na ngoro yakwa yothe.
• 70. Ngoro ciao-rĩ, inorete ta ngurunyu; niĩ, nĩ kĩrĩra gĩaku ndĩĩkenagĩra nĩkĩo.
• 71. Kuonio thĩna kũu nyonetio nĩkũnjagĩrĩire, nĩ getha ndĩkĩĩrute mĩtugo ĩo waathanire.
• 72. Kĩrĩra gĩa kanua gaku nĩ kĩega harĩ niĩ gũkĩra ngiri cia thahabu na betha.
• 73. Moko maku nĩmo maanyũmbire na magĩ’thondeka ũguo ndariĩ: kĩnjĩtĩire mbuguĩro, ndĩkĩĩrute maathani maku.
• 74. Arĩa agwĩtigĩri marĩnyonaga magakena, nĩ ũndũ ũhoro waku noguo ndĩĩrĩgĩrĩire.
• 75. Jehova, nĩnjũĩ atĩ matuĩro maku nĩ ma kĩhooto, na kũnyonia ũnyonetie thĩna no tondũ wĩ mwĩhokeku.
• 76. Ta kĩreke ũtugi waku ũtuĩke nĩguo ũkũ’nyamarũra, kũringana na uuge waku ũrĩa werire ndungata ĩno yaku.
• 77. Matha maku ta nĩmanginyĩrĩre, nĩ getha ngĩtũũre, nĩ tondũ kĩrĩra gĩaku nĩkĩo kĩngenagia.
• 78. Arĩa egereri-rĩ, maroconoka, amu nĩ ũrongo mainamanĩtie ũhoro wakwa naguo, no niĩ-rĩ, nĩ mataaro maku ndĩrĩtaranagia.
• 79. Andũ arĩa agwĩtigĩri nĩmanjerekere, na nĩmegũkĩmenya ũguni wa maũira macio maku.
• 80. Tũma ngoro yakwa ĩtuĩke nginyanĩru ũhoro-inĩ wa mĩtugo ĩrĩa mĩathane nĩwe, nĩ getha niĩ ndikanaconoke.
• 81. Ngoro yakwa nĩ kũũrũo yũrĩtwo nĩ hinya nĩ kwĩrirĩria ũhonokio waku, no niĩ-rĩ’, ũhoro waku noguo ndĩĩrĩgĩrĩire.
• 82. Maitho makwa nĩ kũira mairĩte nĩ ũrĩa ndũire ndoragĩrĩria uuge ũcio waku, o ngĩũragia atĩrĩ, Nĩ rĩ ũgakĩ’nyamarũra?
• 83. Amu ’haanĩte ta mondo ya rũũa ĩrĩa itũire ndogo-inĩ, ĩndĩ ndingĩriganĩrũo nĩ mĩtugo ĩrĩa waathanire.
• 84. Matukũ ma ndungata ĩno yaku makĩrĩ maigana? arĩa mathingatanĩte na niĩ, nĩ rĩ ũrĩmakinyĩria ituĩro?
• 85. Andũ arĩa egereri nĩmanyenjeire marima ma kũndekia, nĩo arĩa mateerekanagĩrĩria na kĩrĩra gĩaku.
• 86. Maathani maku mothe nĩ mehokeku: o no ũrongo ma’thingatagia; wee, ndeithia!
• 87. Maratigarĩtie hanini ma’nine njehere gũkũ thĩ, no mataaro maku ndinagĩtigana namo.
• 88. Kĩrurumũkie muoyo wakwa kũringana o na ũtugi waku, na niĩ, ũira wa kanua gaku, nĩndĩĩkĩũmenyagĩrĩra.
• 89. Gwata o tene na tene, Jehova, ũhoro waku ũtũũraga wĩ mũhandĩku kũu igũrũ.
• 90. Wĩhokeku waku nĩ wa njiarũa na njiarũa: thĩ nĩwe ũmĩrũmĩtie, nayo ĩgagĩikara o ho.
• 91. Gũikarĩte o ũguo kinya ũmũthĩ kũringana na matua marĩa watuire, nĩ tondũ indo ciothe no ndungata ciaku.
• 92. Guca ngenagio nĩ kĩrĩra gĩaku-rĩ, nĩ gũthira ingĩanathira nĩ gũtandiũka.
• 93. Niĩ ndirĩ hĩndĩ ngariganĩrũo nĩ mataaro macio maku, amu nĩmo ũrurumũkĩtie muoyo wakwa namo.
• 94. Ndĩ waku niĩ, ’honokia, nĩ gũkorũo nongoretie o mataaro macio maku.
• 95. Andũ arĩa aaganu nĩmanjohagĩria nĩguo ma’nine, no niĩ-rĩ, ndĩrĩĩcũranagia o ũhoro wa maũira maku.
• 96. Ũndũ o wothe, o na wĩ mũkinyanĩru, nĩnyonete atĩ wĩ na mũhaka, no rĩrĩ, watho waku waramĩte o kwarama.
• 97. Kĩrĩra gĩaku-rĩ, kaĩ nĩndĩkĩendete-ĩ! ndindaga ngĩtarania ũhoro wakĩo mũthenya wothe.
• 98. Maathani maku matũmaga njũhĩge gũkĩra thũ ciakwa, nĩ gũkorũo maikaraga harĩ niĩ o hingo ciothe.
• 99. Ndĩ na ũgerereri kũrĩ arĩa othe anduti ũhoro, amu nĩ maũira maku ndaranagia ũhoro wamo.
• 100. Ndĩ mũtaũku gũkĩra athuri arĩa akũrũ, nĩ ũndũ ndũire o nũmĩtie mataaro maku.
• 101. Nĩndigagĩrĩria magũrũ makwa matikanakinye njĩra njũru o na ĩrĩkũ, nĩ getha ’menyagĩrĩre ũhoro ũrĩa uugĩte.
• 102. Matuĩro maku niĩ ndirĩ ndehũka ngĩtigana namo, nĩ gũkorũo wee mwene nĩwe ũtũire ũndutaga.
• 103. Ciugo ciaku, ii karakara yakwa-rĩ, ĩ itikĩrĩ mũcamo mwega! ii kanua gakwa nĩikĩrĩte ũũkĩ!
• 104. Tondũ wa mataaro maku nĩndĩĩgĩagĩra na mbuguĩro, na tondũ ũcio ngagĩthũũra njĩra o yothe ya ũrongo.
• 105. Ũhoro waku nĩ tawa ũmũrĩkagĩra makinya makwa, nĩ ũtheri ũrĩa ũnyonagia njĩra.
• 106. Kwĩhĩta nĩndĩĩhĩtĩte, na ũhoro ũcio ngaũgwatĩria, atĩ matua maku, o ũguo me ma kĩhooto, nĩndĩrĩmamenyagĩrĩra.
• 107. Gũthĩnio nĩ’thĩnagio mũno: Jehova, rurumũkia muoyo wakwa kũringana o na ũrĩa wanoiga.
• 108. Ta ĩtĩkĩra mahaki ma kanua gakwa, Jehova, maya ngũruta o na mwĩendero, nawe ũkĩ’menyithagie matua macio maku.
• 109. Muoyo wakwa ndũire ndĩũgwatĩrĩirie na hĩ, ĩndĩ kĩrĩra gĩaku ndingĩriganĩrũo nĩkĩo.
• 110. Andũ arĩa aaganu nĩmaandegeire mũtego, na ndiigana kũhĩtia njĩra ya mataaro macio maku.
• 111. Maũira maku-rĩ, matuĩkĩte igai rĩakwa rĩa nginya tene, amu nĩmo matũmaga ngoro yakwa ĩkenage.
• 112. Ngoro yakwa ndĩmĩerekeirie gwĩkaga mĩtugo o ĩo wathanĩte, njĩkage o yo nginya tene, ĩĩ-ni, o nginya ithirĩro.
• 113. Andũ a ngoro igĩrĩ-rĩ, gũthũũra nĩndĩmathũire, no kĩrĩra gĩaku-rĩ, nĩkĩo niĩ nyendete.
• 114. Wee nĩwe wĩhitho wakwa o na ngo yakwa; ũhoro ũrĩa uugĩte noguo ndĩĩrĩgĩrĩire.
• 115. Njehererai, inyuĩ eki ũũru, nĩguo ngĩrũmagie maathani ma Ngai wakwa.
• 116. Wee, ’nyitagĩrĩra, kũringana na uuge ũcio waku, nĩ getha ngĩtũũre; wĩrĩgĩrĩro ũyũ wakwa-rĩ, ndũkanareke ũnjonore.
• 117. Ũndiiragĩrĩre, njikarage ndĩ mũhonoku, ndũũre o nũmbũĩtie mĩtugo ĩrĩa waathanire.
• 118. Arĩa othe macangaga matiganĩte na mĩtugo ĩo yaku-rĩ, wee nĩ gũtemba ũmatembete, amu kwĩhenia kũu mehenagia nakuo nĩ kwa ũrongo.
• 119. Nĩ kũhakũra ũhakũraga acio aaganu a thĩ othe ũkamate ta nganga cia ũturi: tondũ ũcio-rĩ, nĩkĩo ngĩendete maũira marĩa maku.
• 120. Mwĩrĩ wakwa nĩũringagwo nĩ thithi nĩ ũndũ wa guoya waku, o na matuĩro macio maku ngakĩmetigagĩra.
• 121. Niĩ maũndũ marĩa ndũire njĩkaga no marĩa ma kĩhooto, o marĩa ma ũthingu: ndũgakĩndekererie arĩa ma’hinyagĩrĩria.
• 122. Ndungata ĩno yaku, mĩgwatie ithaga rĩa atĩ nĩũrĩmĩĩkaga wega; tiga kũreka nduĩke wa kũhinyagĩrĩrio nĩ andũ acio egereri.
• 123. Maitho makwa nĩ kũira mairĩte nĩ ũrĩa ndũire ndoragĩrĩria ũhonokio waku, o ngĩetagĩrĩra uuge ũrĩa waku wa ũthingu.
• 124. Ndungata yaku, mĩĩkage ta ũrĩa ũringaine na ũtugi waku, na ũndutage mĩtugo ĩrĩa mĩathane nĩwe.
• 125. Tondũ ndĩ o ndungata yaku-rĩ, njĩkĩra mbuguĩro, nĩ getha ’hotage kũmenya ũguni wa maũira marĩa maku.
• 126. Hingo nĩ nginyu Jehova eke ũndũ, nĩ gũkorũo andũ nĩmathahĩtie kĩrĩra gĩaku.
• 127. Tondũ ũcio nĩ kwenda niĩ ngĩendete maathani maku o na gũkĩra thahabu, gwata o ĩrĩa njega mũno.
• 128. Na nĩkĩo nyonaga atĩ mataaro maku mothe no marũngĩrĩru, na ngathũũra njĩra o yothe ya ũrongo.
• 129. Maũira maku-rĩ, me kĩgeganio mũno: nĩkĩo ngoro yakwa ĩmarũmagia.
• 130. Mohoro maku magĩtaũrũo nĩmarehage ũtheri; kũũhĩgia nĩmohĩgagia ũrĩa ũtarĩ mũũgĩ.
• 131. Njathamĩtie kanua o na ngatuumatuuma ngoro, nĩ amu nĩ kwĩrirĩria ndĩĩrirĩirie maathani maku mũno.
• 132. Njerekera, ũnginyĩrie wega waku, ta ũrĩa endi rĩĩtwa rĩaku magĩrĩirũo nĩ gwĩkwo.
• 133. Rũngagĩrĩria makinya makwa na uuge waku, ndikanatuĩke wa gwathagwo nĩ waganu o na ũrĩkũ.
• 134. Ngũũra ũndute ũhinyanĩrĩria-inĩ wa andũ, na niĩ mataaro maku ngũtũũra o ndĩmamenyereire.
• 135. Tũma ũthiũ waku waragĩre ndungata ĩno yaku, ũkĩndutage mĩtugo ĩo wathanĩte.
• 136. Maitho makwa manyũrũrũkagia maĩ maigana ta rũũĩ, nĩ ũndũ andũ matimenyagĩrĩra kĩrĩra gĩaku.
• 137. Wee, Jehova, wĩ mũthingu, na matua maku no marũngĩrĩru.
• 138. Maũira marĩa maku ũmaathanĩte o na ũthingu na wĩhokeku o ũrĩa mũnene.
• 139. Kĩyo kĩrĩa ndĩ nakĩo no kũnjũraga, nĩ ũndũ a-muku akwa nĩmariganĩirũo nĩ mohoro maku.
• 140. Uuge waku-rĩ, nĩ ũrĩa mũthuranĩre o mũno, na niĩ ndungata yaku nĩ kwenda ndĩkĩwendete.
• 141. Ndĩ wa gĩikaro kĩnyinyi, o na ngaagĩrũo bata, no rĩrĩ, mataaro maku ndingĩriganĩrũo nĩmo.
• 142. Ũthingu waku nĩ uthingu wa tene na tene, kĩrĩra gĩaku nakĩo no ũhoro ũrĩa wa ma.
• 143. Nĩnginyĩrĩirũo nĩ mĩnyamaro o na ruo rũa ngoro, no ningĩ maathani maku-rĩ, nĩmo mangenagia.
• 144. Maũira maku no ma ũthingu kinya tene na tene: kĩnjĩkĩre mbuguĩro, na nĩngũtũũra muoyo.
• 145. Njĩtanĩte na ngoro yakwa yothe; ĩ Jehova, nyamũkĩria: mĩtugo ĩrĩa mĩathane nĩwe, nĩyo ndĩrĩrũmagia.
• 146. Nĩ na kũrĩ we njĩtanĩte; kĩ’honokie, maũira macio maku ndĩkĩmamenyagĩrĩre.
• 147. Njũkagĩra tene mũno o gũtaanakĩa, ngakũrĩrĩra, ngaikara o njĩrĩgĩrĩire atĩ nĩũkũhingia ũhoro waku.
• 148. Maitho makwa makoragwo maramũkĩte ngahĩtaga matuanĩra ma macamu ma ũtukũ, nĩ getha uuge waku ndĩũtaranagie.
• 149. Ndũkĩigue mũgambo wakwa kũringana o na ũtugi waku; rurumũkia muoyo wakwa, Jehova, kũringana na ũguo matuĩro maku matariĩ.
• 150. Arĩa marũmagĩrĩra uungumania nĩmara’thengerera: acio-rĩ, kĩrĩra gĩaku nĩmatiganĩte nakĩo hanene.
• 151. Wee, Jehova, nĩwe ũkĩnjikaraga hakuhĩ, namo maathani maku mothe no ma ma.
• 152. Kuuma o tene nĩ’menyete nĩ ũndũ wa maũira maku atĩ ũmahandĩte me ma gũtũũra nginya tene na tene.
• 153. Ta rora thĩna ũrĩa nyonete, ũgĩ’thare harĩ guo, nĩ amu kĩrĩra gĩaku niĩ ndiriganagĩrũo nĩkĩo.
• 154. Cira wakwa njirĩrĩra, ũngũũre; rurumũkia muoyo wakwa kũringana o na uuge ũrĩa waku.
• 155. Arĩa aaganu-rĩ, ũhonokio nĩũmaraihĩrĩirie, tondũ matirongoragia mĩtugo ĩrĩa waathanire.
• 156. Matha maku, Jehova, nĩ manene mũno: rurumũkia muoyo wakwa kũringana na ũguo matuĩro maku matariĩ.
• 157. Arĩa mathingatanaga na niĩ nĩ aingĩ, o acio a-muku akwa; na maũira maku-rĩ, ndirĩ ndakĩehũka harĩ mo.
• 158. Nĩnyonete andũ arĩa mĩgarũka, ngaira ngoro nĩo, nĩ ũndũ uuge waku matimenyagĩrĩra.
• 159. Mataaro maku ta kĩrore ũrĩa niĩ ndĩmendete; rurumũkia muoyo wakwa, Jehova, kũringana o na ũtugi waku.
• 160. Ũhoro wothe ũrĩa uugĩte-rĩ, mũigana waguo no ma; itua rĩaku o rĩrĩkũ, o ũguo rĩĩ rĩa kĩhooto, no rĩa tene na tene.
• 161. ’Thingatanĩtwo na niĩ nĩ anene hatarĩ na gĩtũmi, no rĩ’, ngoro yakwa ĩtũire ĩguoyoheire o mohoro maku.
• 162. Uuge waku-rĩ, ndĩũkenagĩra o ta mũndũ wĩgĩĩrĩire na mataha manene.
• 163. Ũrongo ndĩũthũire ngaũnyira; kĩrĩra gĩaku nĩkĩo nyendete.
• 164. Nĩngũgoocaga o mũthenya maita mũgwanja, nĩ ũndũ wa ũrĩa matuĩro maku me ma kĩhooto.
• 165. Arĩa menda kĩrĩra gĩaku matũũraga na thayũ mũnene, na gũtirĩ ũndũ monaga ũngĩmahĩnga.
• 166. Niĩ ndũire njĩrĩgĩrĩire ũhonokio waku, Jehova, na maathani maku nĩmo njĩkaga.
• 167. Maũira macio maku-rĩ, ngoro yakwa ĩtũire o ĩmamenyereire, na kũmenda ngamenda o mũno.
• 168. Niĩ mataaro maku, o gwata maũira, nĩmo ’menyagĩrĩra, amu-rĩ, mĩthiĩre yakwa yothe ĩrĩ o mbere yaku.
• 169. Kayũ gakwa ta reke gathengerere harĩ wee, Jehova; kĩnjĩkĩre mbuguĩro kũringana na ũrĩa woigire.
• 170. Ũgũthaithi ũyũ wakwa reke ũkinye o harĩ wee; ndeithũra kũringana o na uuge ũcio waku.
• 171. Mĩromo yakwa nĩĩheanage ũhoro wa gĩkũgooca, nĩ ũndũ no ũtũire ũndutaga mĩtugo ĩrĩa waathanire.
• 172. Uuge waku, rũrĩmĩ rũakwa kũina nĩrũkĩũinagĩre, tondũ maathani maku mothe no ma ũthingu.
• 173. Reke guoko gwaku gũkoragwo kwĩhaarĩirie kũndeithia, amu mataaro maku nĩmo niĩ ndĩĩthurĩire.
• 174. Ndũire o ndĩĩriragĩria ũhonokio waku, Jehova, ningĩ kĩrĩra gĩaku nokĩo kĩngenagia.
• 175. Ngoro yakwa ĩrotũũra, nĩguo ĩkũgoocage, namo matuĩro maku nĩmatũũre o mandeithagia.
• 176. Ndururĩte ta mbũri yũrĩte; gĩcarie ndungata yaku, amu niĩ, ndirĩ hingo ndiganagĩrũo nĩ maathani maku.

Home