Go Back

Thaburi Chapter 106

• 1. GOOCAI Jehova! Ĩ gĩcokeriei Jehova ngatho, tondũ nĩ mwega; tondũ ũtugi wake nĩ wa tene na tene.
• 2. Nũ ũngiuga mawĩko ma ũhoti ma Jehova amaithĩranie, atĩ aiguithie andũ ũkumio wake wothe?
• 3. Gũkena-rĩ, nĩ arĩa marũmagia kĩhooto, arĩa mekaga maũndũ ma ũthingu mahinda mothe.
• 4. Ĩ Jehova, ndirikana na wĩtĩkĩri ũrĩa ũtũũraga naguo harĩ kĩrĩndĩ gĩaku; ũ’ng’ethere, ũkĩnginyĩrie ũhonokio waku,
• 5. Nĩ getha nduĩke wa gũkona athurũo aku magaacĩire, rũrĩrĩ rũrũ rũaku ngenere gĩkeno kĩaruo, igai rĩu rĩaku-rĩ, tũgakĩĩraha hamwe narĩo.
• 6. Ithuĩ nĩtũhĩtĩtie o ũndũ ũmwe na maithe maitũ, nĩ kwagana twaganĩte, o na tũkamaramara.
• 7. Maithe maitũ matiarũmbũirie maũndũ maku ma magegania marĩa wekĩte me Misiri; matiaririkanaga ũrĩa ũtugi waku waingĩhĩte; no nĩ kũhanda maahandire rũng’athio me rũtere rũa iria, o Iria Itune.
• 8. No we, tondũ wa rĩĩtwa rĩake, akĩmahonokia, nĩ getha atũme ũhoti wake ũmenyeke.
• 9. Agĩgĩkũma Iria Itune, narĩo rĩkĩhũa, akĩmahĩtũkĩria o kũu kũriku o ta arĩ werũ.
• 10. Akĩmahonokia guoko-inĩ kwa ũrĩa mũmathũũri, gũkũũra akĩmakũũra agĩkĩmaruta moko-inĩ ma thũ ciao.
• 11. Namo maĩ makihuba acio maarĩ muku nao; gũtirĩ o na ũmwe watigarire.
• 12. Hĩndĩ ĩo magĩĩtĩkia uuge ũrĩa wake, magĩkĩmũinĩra makĩmũgooca.
• 13. No rĩrĩ, mawĩko macio make, magĩcoka o narua kũriganĩrũo nĩmo; matiigana kwĩetereria ũtaari wake ũmatongorie:
• 14. No gũitĩka maaitĩkire kũgĩa na thuti me kũrĩa werũ-inĩ, magĩkĩgereria Mũrungu kũu rũaga-inĩ.
• 15. Nake akĩmahe kĩrĩa maamwĩtagia; no ngoro ciao, agĩcitonyia ũhĩnju.
• 16. Ningĩ makĩiguĩra Musa ũiru maikaire kũu iraaro-inĩ, o na makĩiguĩra Haruni, ũrĩa mwamũre nĩ Jehova.
• 17. Thĩ ĩgĩkĩemũka ĩkĩmerũkia Dathani, thiritũ ĩo ya Abiramu-rĩ, ĩkĩmakunĩkĩria.
• 18. Na gĩkundi-inĩ kĩao hagĩakana mwaki, rũrĩrĩmbĩ rũgĩcina acio aaganu magĩthira.
• 19. Marĩ Horebu nĩ gũthondeka maathondekire gĩcaũ, makĩinamĩrĩra mũhianano wombĩtwo na mũũmbĩre wa gũtwekio.
• 20. Magĩgĩkũũrania riri ũrĩa wao na kĩndũ gĩtuĩtwo ta ng’ombe ĩrĩaga nyeki.
• 21. Makĩriganĩrũo nĩ Mũrungu mũhonokia wao, ũrĩa wekĩte maũndũ manene kũu Misiri,
• 22. Ageka mawĩko ma magegania thĩ ĩo ya Hamu, na ageka maũndũ marĩ itua-nda Iria-inĩ Itune.
• 23. We agĩkiuga atĩ nĩekũmanina, guca Musa, mũthurũo wake, aamũrũgamire mbere hau haarĩ mwanya, agarũre marũrũ make, ndakae kũmonũha.
• 24. Bũrũri ũrĩa wa kwendeka mũno, o naguo makĩwagĩra bata, makĩrega gwĩtĩkia uuge ũrĩa wake;
• 25. Magĩgĩikara makĩng’ong’oraga me thĩinĩ wa hema ciao, na matithikĩrĩrie mũgambo wa Jehova.
• 26. Tondũ ũcio akĩmoera guoko na igũrũ, akiuga atĩ no amang’aũranĩrie kũu werũ-inĩ,
• 27. Na mbeũ yao amĩhurunje ndũrĩrĩ-inĩ, akĩmĩharaganĩrie na kũu mabũrũri-inĩ.
• 28. Ningĩ nĩmegwatanirie na Baali-Peoru, makĩrĩa magongona ma arĩa matarĩ na muoyo.
• 29. Magĩgĩtũma athirĩke nĩ maũndũ mao; makĩya kũharũkĩrũo nĩ mũmitũko.
• 30. Hĩndĩ ĩo gũkĩrũgama Finehasi, akĩhorohia ngero ĩo, mũmitũko ũcio ũgĩkĩrigĩrĩrio.
• 31. Ũndũ ũcio akĩĩrũo nĩ ũthingu ekĩte, ngatho ĩo ĩtuĩke yake njiarũa na njiarũa, o kinya tene.
• 32. Na ningĩ makĩmũrakarĩria maĩ-inĩ ma Meriba, Musa agĩgĩkinyĩrĩrũo nĩ ũũru nĩ ũndũ wao,
• 33. Nĩ gũtuĩka nĩmaang’athĩirie Roho wake, nake nĩ kwaria aaririe na mĩromo yake ũrĩa ũtaagĩrĩire.
• 34. Ningĩ matiigana kũnina irĩndĩ cia bũrũri ta ũrĩa merĩtwo nĩ Jehova;
• 35. No rĩ’, nĩ gwĩtukania metukanirie na ndũrĩrĩ, na makĩĩmenyeria maũndũ ma cio.
• 36. Magĩtuĩka a gũtungatĩra mĩhianano ĩrĩa yacio, nayo ĩgĩtuĩka mũtego wa kũmagwatia;
• 37. Ĩĩ-ni, makarutagĩra ndaimono ariũ ao na aarĩ ao matuĩke kĩndũ gĩa gũcithĩnjĩra,
• 38. Magagĩita thakame ĩrĩa ĩtehĩtie, thakame o ĩo ya ariũ ao na aarĩ ao, arĩa maarutaga matuĩke kĩruti igongona cia mĩhianano ĩo ya Kanaani; bũrũri ũgĩkĩgwata gĩko nĩ gũitwo thakame.
• 39. Ũguo nĩguo methũkirie na ciĩko icio ciao, magĩgĩtuĩka ta ahũri ũmaraya nĩ maũndũ marĩa mekaga.
• 40. Marakara ma Jehova magĩgĩakanĩra kĩrĩndĩ gĩake, igai rĩu rĩake akĩrĩnyira o kũrĩnyira.
• 41. Akĩmaneana moko-inĩ ma ndũrĩrĩ, magĩtuĩka a gwathagwo nĩ arĩa maamathũũraga.
• 42. Thũ icio ciao igĩikara o imakũrĩire, o kinya makĩya kũhooteka o marĩ moko-inĩ ma cio.
• 43. Mahinda nĩ maingĩ aamateithũrire, nao, tondũ wa gwĩtaara kũrĩa metaaraga, magĩtũũra o mamũng’athagĩria, makĩya gũkahwerereka tondũ wa waganu wao.
• 44. No we nĩaaroragĩrĩria mĩnyamaro yao, rĩrĩa aaigua magĩkaya;
• 45. Akaririkana kĩrĩkanĩro gĩake nĩ ũndũ wao, agacoka kũigua tha kũringana o na ũrĩa ũtugi wake ũingĩhĩte.
• 46. Na nĩaatũmaga matuĩke a kũiguĩrũo nĩ arĩa othe maamatahĩte makamatua mĩgwate.
• 47. Tũhonokie, Jehova Ngai witũ, ũtũũnganie ũtũrute ndũrĩrĩ-inĩ, nĩ getha tũcokagĩrie rĩĩtwa rĩaku rĩamũre ngatho, gũkumio gwaku-rĩ, tũgĩtũũre twĩrahaga nĩ ũndũ wakuo.
• 48. Jehova arogathagwo, o we Ngai wa Isiraeli, kuuma o tene wa tene na nginya o tene na tene. Nao andũ othe nĩmakiuge, Amen. Goocai Jehova!

Home