Go Back

Thaburi Chapter 105

• 1. Ĩ GĨCOKERIEI Jehova ngatho, anĩrĩrai ngumo ya rĩĩtwa rĩake; ũhoro wa mawĩko make ũmenyithiei irĩndĩ ciothe cia thĩ.
• 2. Mũinĩrei, mũkumiei na nyĩmbo; kĩheanei ũhoro wa maũndũ mothe ma magegania marĩa aaneka.
• 3. Rĩĩtwa rĩu rĩake rĩamũre, wĩrahei nĩ ũndũ warĩo: arĩa marongoretie Jehova, ngoro ciao ta nĩikene.
• 4. Rongoragiai Jehova, o gwata hinya wake; kĩmathagei ũthiũ wake o hingo ciothe.
• 5. Ririkanai maũndũ ma magegania marĩa aaneka, mũkĩririkane morirũ marĩa make, o na matuĩro marĩa ma kanua gake,
• 6. Inyuĩ mbeũ ya Iburahimu, ndungata yake, o inyuĩ ciana cia Jakubu, inyuĩ athurũo ake.
• 7. We Jehova-rĩ, nĩwe Ngai witũ; matuĩro make makinyaga gũkũ thĩ guothe.
• 8. Kĩrĩkanĩro gĩake nĩakĩririkanaga nginya tene na tene, uuge ũcio ekĩrire watho-rĩ, agakĩũririkanaga nginya mariika ngiri,
• 9. O kĩo kĩrĩkanĩro kĩrĩa aarĩkanĩire na Iburahimu, mwĩhĩtwa o ro ũrĩa ehĩtire harĩ Isaaka;
• 10. Agĩcoka agĩkĩrũmia harĩ Jakubu, agĩgĩtua mũtugo wa kũrũmagĩrĩrũo, atĩ gĩtuĩke kĩrĩkanĩro harĩ Isiraeli gĩa tene na tene,
• 11. Akiuga, Wee nĩwe ngahe bũrũri wa Kanaani, ũtuĩke igai rĩaku rĩrĩa ngũgereire.
• 12. Na no hĩndĩ ĩrĩa maarĩ gakundi karĩa kangĩtarĩka, ĩĩ-ni, anyinyi mũno, o na ningĩ maarĩ ageni kuo;
• 13. Na no gũthama maathamangaga makoima rũrĩrĩ-inĩ rũmwe magathiĩ rũrĩrĩ-inĩ rũngĩ, magakiuma kwa mũthamaki ũyũ, magathiĩ gwa kĩrĩndĩ kĩrĩa kĩngĩ.
• 14. Ndaarekaga mũndũ o na ũmwe amanyarire; o na kũrĩ athamaki aarũithirie nĩ ũndũ wao,
• 15. Akoiga, Tigai kũhutia andũ akwa aya njitĩrĩirie maguta, anabii acio akwa-rĩ, menyai mũmeke ũũru.
• 16. Ningĩ agĩĩtĩra bũrũri ng’aragu, agĩkĩnina mwĩhoko wothe wa irio.
• 17. Na nĩaatũmĩte mũndũ aambe athiĩ mbere yao; we Jusufu-rĩ, nĩ kwendio endirio agĩtuĩka ngombo.
• 18. Magũrũ make magĩtuurio na bĩngũ, ngoro yake ĩgĩkĩohanio na igera,
• 19. O nginya uuge wake ũgĩgakinyĩrĩra, kĩĩranĩro kĩa Jehova nĩ kũroria kĩamũroragia.
• 20. Mũthamaki agĩcoka agĩtũmana akĩmuohorithia; mũnene ũcio wa irĩndĩ-rĩ, nĩaakĩmũrekirie.
• 21. Agĩcoka akĩmũtua wa gwathaga mũciĩ wake, mũnene wa kũramataga indo ciake ciothe;
• 22. Atuĩke wa kuoha akaburũ ake o rĩrĩa angĩenda, na arutage athuri ake ũũgĩ.
• 23. Isiraeli nake agĩgĩkinya Misiri, we Jakubu agĩikara e mũgeni thĩ ĩo ya Hamu.
• 24. Kĩrĩndĩ kĩu gĩake Jehova agĩtũma gĩciare mũno, agĩtũma kĩgĩe na hinya kũrĩ a-muku akĩo.
• 25. Acio nĩaagarũrire ngoro ciao nĩguo mathũũre kĩrĩndĩ gĩake, magekaga ndungata icio ciake maũndũ ma wara.
• 26. Agĩgĩtũma Musa, ndungata yake, o na Haruni, ũrĩa mũthurũo wake.
• 27. Akĩringa ciama ciake mĩthemba mĩthemba gatagatĩ-inĩ kao, agĩkĩonania morirũ thĩ ĩo ya Hamu.
• 28. Akĩrehe nduma, agĩtũma gũcingimane; nao matiigana kũng’athĩria uuge wake.
• 29. Maĩ ma kwao nĩ kũgarũra aagarũrire ũrĩa maahaanaga magĩtuĩka thakame, akĩũraga ciũngũyũ ciakuo.
• 30. Bũrũri wao ũgĩcoka ũkĩhunja ciũra o kũhunja, nginya o thĩinĩ wa nyũmba cia athamaki ao.
• 31. Kwaria akĩaria, gũgĩũka ngi mĩrumbĩ mĩingĩ mĩingĩ, ndaa nacio ikĩiyũra thĩ yao o nginya ndere guothe.
• 32. Ningĩ handũ ha mbura ya ndũire, aamaheire mbura ya mbembe, gwata nĩnĩmbĩ cia mwaki ciahenũrũkagĩra bũrũri wao.
• 33. Agĩkĩhũra mĩthabibu yao o na mĩkũyũ yao ya kũrĩyo; akiunanga mĩtĩ ĩrĩa yarĩ kũu kwao o nginya ndere.
• 34. Kwaria akĩaria, gũgĩũka ngigĩ, o gwata itono, itangĩgereka,
• 35. Ikĩrĩa ihuti o rĩothe rĩrĩa rĩarĩ thĩ ĩo yao, igĩkĩrambia maciaro ma tĩri wao ikĩnina.
• 36. Ningĩ akĩringa marigithathi mothe ma thĩ yao akĩmoraga, o mo mũtũrio wa hinya wao wothe.
• 37. Agĩkĩya kũmaruta kuo marĩ na betha na thahabu, na thĩinĩ wa mĩhĩrĩga ĩo yake gũtiarĩ mũndũ o na ũmwe watũgũgaga.
• 38. Misiri nĩ gũkenwo gwakenirũo moima kuo, tondũ nĩkwagũĩrĩirũo nĩ guoya nĩ ũndũ wao.
• 39. Nĩ gũtambũrũkia aamatambũrũkĩirie itu rĩmathiĩkagĩrĩrie, o na mwaki wa kũmamũrĩkagĩra ũtukũ.
• 40. Magĩĩtia, nake akĩrehe tũmakia-arũme, na akĩmahũnia mũgate uumĩte igũrũ.
• 41. Ningĩ agĩtumũra ndũmba ya ihiga, ĩgĩthothoka maĩ; magĩgĩikũrũka kũu burugĩi-inĩ o ta rũũĩ.
• 42. Amu nĩ kũririkana aaririkanaga uuge ũrĩa wake mũtheru, agakĩririkana Iburahimu, ndungata yake.
• 43. Akĩruta kĩrĩndĩ gĩake kũu kĩĩ na gĩkeno, athurũo acio ake agĩkĩmoimia kuo me na mũkũngũiyo.
• 44. Akĩmahe mabũrũri ma ndũrĩrĩ; indo iria cianogeirũo nĩ irĩndĩ icio magĩkĩĩgĩĩra nacio:
• 45. Na nĩ getha matũũre marũmĩtie mĩtugo ĩrĩa aatuanĩire, na makĩmenyagĩrĩre kĩrĩra gĩake. Goocai Jehova!

Home