Go Back

Thaburi Chapter 103

• 1. NGORO yakwa, gatha Jehova; gwata kĩrĩa o gĩothe gĩĩ thĩinĩ wakwa nikigathe rĩĩtwa rĩake rĩamũre.
• 2. Ngoro yakwa, kĩgathe Jehova, na ndũkariganĩrũo nĩ wega o na ũmwe marĩa agwĩkaga:
• 3. Arĩ we ũkuohagĩra waganu waku wothe; ndũari ciaku ciothe o nacio nowe mũkũhonia;
• 4. O we mũkũũri muoyo waku harĩ irima rĩa gĩkuũ, na nowe mũgwĩki maũndũ ma ũtugi na ma matha maigũ, ta arĩ thũmbĩ aragwĩkĩra ya ũnene;
• 5. Ningĩ nowe ũrĩa ũhũnagia kanua gaku hũni ya wega, wĩthĩ waku ũgakĩanakaha ta wa nderi.
• 6. Jehova-rĩ, nĩwe mwĩki ciĩko cia ũthingu, arĩa othe agũmĩre agagĩtua matuĩro ma kĩhooto nĩ ũndũ wao.
• 7. Mĩthiĩre ĩo yake nĩaamenyithirie Musa, mĩĩkĩre yake nĩ ciana cia Isiraeli aakĩonirie.
• 8. Jehova nĩ wa matha maingĩ na nĩ muuma-andũ mũno; ndahiũhaga kũrakara, na e na ũtugi mũingĩ.
• 9. Ndangĩikara o acirithanagia hĩndĩ ciothe, na ndangĩtũũra arakarĩte nginya tene na tene.
• 10. Ndatwĩkĩte ta ũrĩa mahĩtia maitũ maagĩrĩirũo, kana agatũcokeria kũringana na ũrĩa waganu witũ ũigana.
• 11. Nĩ amu-rĩ, o ũguo matu-inĩ kũhaicĩte o igũrũ rĩa thĩ, no taguo ũtugi wake ũneneheire arĩa amwĩtigĩri.
• 12. O ta ũrĩa irathĩro kũraihanĩrĩirie na ithũĩro, no taguo atũthengeirie mehia maitũ matũraihĩrĩrie.
• 13. O ũrĩa mũthuri aiguagĩra ciana ciake tha, noguo Jehova aiguagĩra arĩa mamwĩtigĩrĩte.
• 14. Nĩ gũkorũo we nĩoĩ ũũmbe ũrĩa twombirũo; nĩaririkanaga atĩ ithuĩ tũrĩ o rũkũngũ.
• 15. Mũndũ-rĩ, matukũ make mahaana o ta ria; ta kĩro gĩa gĩthaka, noguo atumũkaga.
• 16. Amu kĩhũragwo nĩ rũhuho, gĩgaitĩka, na hau kiuma gĩtingĩgacoka kuonwo.
• 17. No rĩrĩ, ũtugi wa Jehova ũtũũraga harĩ arĩa amwĩtigĩri kuuma o tene na nginya tene na tene, naguo ũthingu wake ũkinyagĩrĩra ciana cia ciana ciao,
• 18. Arĩa marũmagia kĩrĩkanĩro gĩake, makaririkanaga mataaro make magakĩmekaga.
• 19. Jehova ahandĩte gĩtĩ gĩake kĩa ũnene kũrĩa igũrũ; ũthamaki wake wathaga maũndũ mothe.
• 20. Kĩgathei Jehova, inyuĩ araika ake, inyuĩ njamba cia hinya, inyuĩ mwĩkaga o ũrĩa oigĩte, mũgagĩthikagĩrĩria mũgambo ũrĩa ekuuga.
• 21. Gathai Jehova, inyuĩ mbũtũ ciake ciothe cia ita, o inyuĩ atungati ake mwĩkaga o ũrĩa endaga.
• 22. Gathai Jehova, inyuĩ mawĩra make mothe, kũndũ guothe wathani-inĩ wake o kũrĩa warũma: wee, ngoro yakwa, no kĩgathe Jehova!

Home