Go Back

Ayubu Chapter 4

1. HĨNDĨ ĩo Elifazu, ũrĩa Mũtemani, agĩcokia, akĩũria atĩrĩ,
2. Mũndũ ũgeria gũkũgwetera koigo-rĩ, hihi wanoga? ningĩ nũ ũngĩkĩhota kwĩgiria ndakaarie?
3. Atĩrĩrĩ, wee-rĩ, nĩ andũ aingĩ wanaruta ũhoro, na moko marĩa maregeru nĩwe wanamekĩra hinya.
4. Ndeto ciaku-rĩ, nĩcio cianatiirĩrĩra ũrĩa wendaga kũgũa, maru marĩa magondoku, nĩwe ũratũire ũmomagĩrĩria.
5. Ĩndĩ rĩu wakinyĩrĩrũo nĩ maũndũ wee, nĩ kũũrũo worũo nĩ hinya; wakĩhutio nĩmo wee, no kũmaka wamaka.
6. Mwĩhoko waku githĩ ti gwĩtigĩra Ngai, kũu ũtũire ũmwĩtigĩrĩte; wagĩrĩru wa mĩthiĩre yaku githĩ tiguo kĩĩrĩgĩrĩro gĩaku?
7. Ta ririkana atĩrĩ, nĩ mũndũ ũrĩkũ wanatoma atarĩ ũũru ekĩte? kana arĩa arũngĩrĩru-rĩ, nĩ na kũ maanakĩgatĩka?
8. Niĩ, ũrĩa nyonete, no atĩ arĩa marĩmaga waganu na kũhanda makahanda kĩnyamaro, nocio magethaga.
9. Acio nĩ kũninwo maninagwo nĩ mĩhũmũ ya Ngai, magatomio nĩ itiiha rĩa marakara make.
10. O hĩndĩ ĩrĩa mũrũthi ũrathunguruma, o hĩndĩ ĩrĩa ngatia ĩrĩ ũrũme ĩrararama-rĩ, magego ma mĩrũthi ĩo mĩĩthĩ nĩ kũhehenjwo mahehenjagwo.
11. Mũrũthi ũrĩa mũkũrũ ũgagĩkua nĩ kũũrũo nĩ ndĩa, nacio ciana cia ngatia ĩrĩa ya mũgoma ikahurunjũka.
12. Gwĩ kohoro kaanginyĩrĩire na ngunguĩ, matũ makwa magĩkaigua ta karaheehanwo.
13. Ndarĩ na macũrania njĩkĩrĩtwo nĩ cioneki cia ũtukũ, ihinda rĩrĩa andũ magwatagwo nĩ toro mũnene;
14. Ngĩnyitwo nĩ guoya, o na kĩinaino, mahĩndĩ makwa mothe magĩgĩthingitha.
15. Na hĩndĩ ĩo uthiũ-inĩ wakwa hakĩhĩtũkĩra roho; njuĩrĩ ciakwa ngĩigua ta ikũgũũka.
16. Nakĩo kĩndũ kĩu gĩkĩrũgama, no ndiahotire gũkũũrana ũrĩa kĩhaana; maitho-inĩ makwa no kĩhũmba haarĩ: gwakirĩte ngiria, na ngĩcoka ngĩigua mũgambo, ũkiuga,
17. Mũndũ na nĩagakua-rĩ, githĩ aahota gũtuĩka mũthingu harĩ Ngai? mũndũ-rĩ, aahota gũtuĩka mũtheru harĩ Ũrĩa wamũũmbire?
18. Atĩrĩrĩ, o kinya ndungata iria ciake, we ndaciĩhokaga; o gwata araika acio ake, onaga ta mahĩtagia:
19. Githĩ makĩria ti andũ, aya atũũri nyũmba cia ndaka, itina ciacio ciakĩtwo o rũkũngũ-inĩ, na nĩmamemendekaga ta ciĩhuruta?
20. Gatagatĩ-inĩ ka rũcinĩ na hwaĩ-inĩ gũthuthĩka magathuthĩka, gũthira magathira tene na tene na matekũrũmbũiyo.
21. Githĩ mũkanda wa hema yao to kwambũrũo wambũragwo thĩinĩ wao? nĩ gũkua makuaga, na magakua matarĩ mohĩga.

Home