Go Back

Ayubu Chapter 39

• 1. Wee-rĩ, mbũri cia werũ-inĩ, iria itũũraga mahiga-inĩ, nĩwe ũmenyaga iciarĩro rĩacio? thwariga nĩwe ũrũmbũyagia rĩrĩa mĩgoma yacio ĩkuohoka?
• 2. Wee nĩwe ũtuaga mĩeri ĩrĩa irĩhingagia, kana ũkamenya rĩrĩa igaciara?
• 3. Ciĩthunanagĩra, igaciara tũũri twacio, ikeaũra ruo.
• 4. Ciũri icio ciacio nĩigarĩĩraga; ciĩreraga o kũu rũriĩ gũtheri, ikaya gũgathiĩ, na iticicokerere.
• 5. Njagĩ-rĩ, nũ wamĩrekereirie ĩthiage ĩtarĩ mũũria? kana rĩrĩ, njagĩ yo-rĩ, ũrĩa wamĩohorire mĩhĩndo nũ?
• 6. To niĩ ndamĩheire werũ ũtuĩke mũciĩ wayo, ngĩtua rũng’ũrĩ rũa cumbĩ gĩtũũro kĩayo?
• 7. Yo nĩ kũnyarara ĩnyaraire ironja rĩa itũũra, o na mũkaĩrĩrio wa mũhũri ndĩiguaga.
• 8. Mũtambũko-inĩ wa irĩma nĩkuo ũrimũtho wayo, ĩhaarage kahuti o karĩa gothe karuru.
• 9. Mbogo-rĩ, nĩĩngĩkirĩrĩria ĩgũtungatĩre, kana ĩĩtĩkĩre gũikara kiugũ gĩaku?
• 10. Wakĩhota kuoha mbogo na mũkwa ĩgucagie mũraũ? yagĩĩtĩkĩra kũrĩma ituamba na ngari ĩkuumĩte o thutha?
• 11. Wamĩĩhoka, nĩ ũndũ atĩ ĩĩ na hinya mũnene, kana ũmĩtigĩre wĩra waku ĩrutage?
• 12. Wakĩmĩĩtĩkia atĩ nĩĩrĩkũinũkagĩria kĩmera gĩaku, ĩgagĩkũũnganĩria ngano, ĩkĩrehage kĩhũrĩro-inĩ?
• 13. Ithagu rĩa nyaga-rĩ, rĩbatabataga na gĩkeno, ĩndĩ mĩhĩko ĩo yayo, na njoya ciayo, nĩikĩrĩ tha?
• 14. Tondũ-rĩ, ĩtigaga matumbĩ mayo tĩri-inĩ, atĩ magwatagĩre ũrugarĩ o hau rũkũngũ-inĩ,
• 15. Ĩgakĩriganĩrũo nĩ atĩ maahota kũũragwo nĩ kũgũrũ kwene, kũrangwo marangwo nĩ nyamũ ya werũ-inĩ.
• 16. Ĩthũkĩire ciana ciayo o ta itarĩ ciayo; ndĩnehaga, o na mĩnoga yayo ĩngĩtuĩka ya tũhũ,
• 17. Nĩ gũkorũo Ngai nĩamĩagithĩtie ũũgĩ, akaaga kũmĩgaĩra mbuguĩro.
• 18. Hĩndĩ ĩrĩa ningĩ yatua kwĩarahũra yũre-rĩ, ĩkanyarara mbarathi o gwata mũmĩhaici.
• 19. Ĩ mbarathi-rĩ, nĩwe ũmĩĩkĩrĩte hinya? nĩwe ũmĩguĩkĩire ngingo na mũreera ũcio wayo wĩribaribaga?
• 20. Wee nĩwe ũtũmaga ĩrũũge ta ngigĩ? riri wa mũtiihĩre wayo-rĩ, ũrĩ itebebia!
• 21. Nĩ gũtutia ĩtutagia kũu gĩtuamba-inĩ ĩgĩĩkenagĩra nĩ ũhoti ũrĩa ĩĩ naguo, ĩgagĩthiĩ gũtũnga ita.
• 22. Guoya nĩ gũtheka ĩũthekagĩrĩra, kũmaka ndĩngĩmaka, o na ndĩngĩgarũrũka yũre nĩ rũhiũ rũa njora.
• 23. Ĩthiaga ĩgĩkorakoragĩrũo nĩ thiaka wa mũmĩhaici, o ĩkĩmenũkagĩrũo nĩ mĩenjerere na thũgo cia mĩkũng’i.
• 24. Ĩgakĩhũmbũra thĩ nĩ ũrĩa ĩĩ na ũrũme na ĩkeha; karumbeta karĩ kũgamba ndĩngĩrũgama.
• 25. O karumbeta kaagamba ĩkoiga, Inũ! ĩiguaga thaha wa mbaara ĩĩ hanene, ĩkaigua mĩgoromoko ya njamba, na mũgũũthũkanĩro wa ita.
• 26. Ũũgĩ waku-rĩ, nĩguo ũtũmaga rũĩgĩ rũthang’ate igũrũ na rũgatambũrũkia mathagu rũkerekera o na gũthini?
• 27. Ĩ nderi-rĩ, nĩ gwatha gwaku gũtũmaga yambate o kwambata, ningĩ gĩtara kĩayo ĩkaara o igũrũ mũno?
• 28. Yo ĩtũũraga ihiga-inĩ o igũrũ; nĩho gĩikaro kĩayo, o kũu rũhĩa-inĩ rũa rũaro, handũ he mwĩgitĩro.
• 29. Kũu nĩkuo ĩcũagĩra ĩyonere ndĩa; maitho mayo makamĩonera kũraya mũno.
• 30. Njui ciayo ikundaga o thakame, na handũ harĩ andũ orage, nderi nĩho ĩrĩ.

Home