Go Back

Ayubu Chapter 38

• 1. HĨNDĨ ĩo Jehova agĩcokeria Ayubu ũhoro e kĩhuhũkanio-inĩ, akiuga atĩrĩrĩ,
• 2. Nũ ũyũ ũrekĩra kĩrĩra nduma na ndeto itarĩ cia ũmenyo?
• 3. Ta ĩhotore rĩu ta mũndũ mũrũme! amu nĩngũkũũria, nawe ũkĩ’menyithie.
• 4. Atĩrĩ, rĩrĩa ndaakire gĩtina gĩa thĩ-rĩ, wee warĩ ha? ndũkiuge, akorũo wĩ na ũũgĩ wa kũmenya.
• 5. Nũ wathimire kũrĩa ĩgũkinya? amu wee nĩũkĩũĩ; kana nũ wamĩtambũrũkĩirie rũrigi rũa kũgera?
• 6. Makinya ma itugĩ ciayo-rĩ, maahandĩrĩirũo kĩ-inĩ? kana nũ waigire ihiga rĩayo rĩa koine,
• 7. Hĩndĩ ĩrĩa njata cia rũcinĩ ciainire o hamwe, na ariũ a Ngai othe magĩkĩanĩrĩra nĩ gũkena?
• 8. Kana nũ wahingĩire iria rĩrĩa inene na mĩrango rĩrĩa rĩatothokire rĩkiuma ĩhu-inĩ,
• 9. Hĩndĩ ĩrĩa ndatuire matu nguo yarĩo, ngĩgĩtũma nduma ndumanu ĩtuĩke tama warĩo, ta ũrĩa ũrigicagĩrio mwana,
• 10. Na ngĩrĩĩkĩrĩra mũhaka mũtue nĩ niĩ, ngĩkĩrĩhingĩra na mĩgĩĩko o na mĩrango,
• 11. Ngiuga, Ũrĩkinyaga o hau, na ndũkanaagarare; hau nĩho makũmbĩ maku megũgũmi marĩtĩmagĩrĩra.
• 12. Gwata kĩambĩrĩria kĩa matukũ maku ũrĩ weathĩra atĩ gũkĩe, ũgakĩonereria ũtheri wa rũcinĩ harĩa ũkuumĩrĩra,
• 13. Nĩguo ũkĩnyite thĩ icũrĩ ciayo, andũ arĩa aaganu maribaribwo mamiume?
• 14. Hĩndĩ ĩo thĩ nĩĩgarũrũkaga ũrĩa ĩkũhaanaga, o ta rĩũmba rĩarĩkia gũturumwo na mũhũri, rĩekĩrũo rũũri, indo ciothe ikoimĩra o wega, nayo ĩgagĩikara ta yehumba nguo:
• 15. Nao acio aaganu magagĩtunyũo ũtheri ũrĩa wao, nakuo guoko kũrĩa kũhang’arairio gũkoinĩka.
• 16. Iria rĩrĩa inene-rĩ, ũrĩ watonya kinya matherũkĩro-inĩ marĩo? kana gũceera ũgaceera thĩinĩ wa ndia icio o kũu kũriku mũno?
• 17. Ũrĩ hingo wanaguũrĩrio ihingo cia gĩkuũ? igukumo icio cia nduma ya gĩkuũ-rĩ, ũrĩ waciona, wee?
• 18. Ĩ wariĩ wa thĩ, ĩĩ yothe, wee nĩũrĩkĩtie kũũmenya? ta uga, akorũo wothe nĩũkĩũũĩ!
• 19. Ũtheri-rĩ, njĩra ya gũkinya gĩtũũro kĩaguo ĩrĩ ha? nayo nduma, nĩ na kũ kwayo,
• 20. Nĩguo ũmĩtware ũmĩcokie mũhaka wayo, ũgĩtuĩke nĩwĩkũũranĩire mĩirigo ya gũkinya nyũmba-inĩ yayo?
• 21. Wee no ũkĩũĩ, amu wakĩrĩ o mũciare, na matukũ maku makĩgerũo nĩ maingĩ mũno!
• 22. Tharunji-rĩ, ũrĩ wagĩtonya kũrĩa ĩigĩtwo mĩthithũ, kana mĩthithũ ya mbura ya mbembe, wee nĩũmĩonete,
• 23. Ĩrĩa njigĩire hingo ya gũtũma mĩnyamaro, ngamĩiga nĩ ũndũ wa hingo ya mbaara na ya ita?
• 24. Nĩ njĩra ĩrĩkũ ũtheri ũgayanganagĩrio nayo? kana ĩrĩa rũhuho rũa irathĩro rũhunjagio nayo gũkũ thĩ?
• 25. Kĩboboto kĩa mbura-rĩ, nũ wagĩatũrĩire mũkaro wa gũũkagĩra, o na kana agĩtemera rũheni rũa marurumĩ njĩra,
• 26. Nĩguo atũme mbura yurage bũrũri ũtarĩ andũ, o werũ-inĩ, kũrĩa gũtarĩ kamũndũ;
• 27. Nĩ getha ĩhũnagie rũng’ũrĩ, o kũrĩa gũkirĩte ĩhooru, ĩgĩtũmaga kũmere nyeki ĩrĩa ya mũmerano?
• 28. Mbura-rĩ, nĩĩrĩ ithe? ningĩ nũ mũciari tũtaata tũrĩa twa ime?
• 29. Mbarabu-rĩ, yoimire nda ya ũ? nake nũ mũciari mbaa ĩrĩa yumaga igũrũ ĩĩ ngenyekenyi?
• 30. Nĩrĩo maĩ mehithaga ta mekunĩkĩirie na ihiga, ndia igũrũ gũgakĩgwatana nĩ heho.
• 31. Wee-rĩ, nĩwe muohania kamanja karĩa ga Kĩrĩmĩra? kana muohori mĩgeto ya Karau?
• 32. Njata iria ciĩtagwo Mazarothu, wee wahota gũciumagaria o mahinda ma cio maakinya? kana Nduba na mũtongoro wa ciana ciayo-rĩ, watuĩka wa kũmĩonagĩrĩria njĩra?
• 33. Mĩathĩre ya kũrĩa igũrũ, wee nĩũmĩũĩ? nĩwe ũrũmĩtie ũtabania warĩo nĩguo rĩtabanagie thĩ?
• 34. Wee nĩũĩyũkagĩrĩria mũgambo waku ũkaarĩria matu, nĩguo gũũke mbura nyingĩ ĩkũhumbe?
• 35. Wee nĩwe ũtũmaga heni, ithiĩ ihiũke, nacio igagĩkwĩra, Ithuĩ aya?
• 36. Matu na mũthimbĩre wamo-rĩ, nũ wamekĩrire ũũgĩ? kana njata iria igũaga, nũ waciheire ũmenyi?
• 37. Matu-rĩ, nũ ũhotaga kũmagera, tondũ wa ũrĩa e na ũũgĩ? kana nũ ũkĩogekaga inya cia igũrũ,
• 38. Rĩrĩa rũkũngũ rũtondorokaga, nacio ngũgĩ ikagwatana hamwe?
• 39. Mũrũthi wa mũgoma-rĩ, wee nĩwe ũũguĩmithagia ũkawonera ndĩa, kana ũkininĩra ciana cia ngatia mũhaaha,
• 40. Rĩrĩa ciĩkonotete ciemo-inĩ ciacio, igagĩikara harĩa hagitaru nĩguo ciohagĩrie?
• 41. Ĩ ihuru-rĩ, nũ ũrĩonagia irio ciarĩo, rĩrĩa tũcui twarĩo tũrarĩrĩra Mũrungu, na tũkaanganga nĩ kwaga gĩa kũrĩa?

Home