Go Back

Ayubu Chapter 36

• 1. NINGĨ Elihu agĩtwara ũhoro na mbere, akiuga atĩrĩ,
• 2. Ta njĩtĩkĩria hanini, nĩguo nguonie; amu kũrĩ o ciugo ndigairie cia gũcirĩrĩra Ngai nacio.
• 3. Ngũrehe ũmenyi ngĩũrutaga kũnene, nyonanie atĩ Mũnyũmbi nĩwe wĩ na ũthingu.
• 4. Amu ti-itherũ ndeto ciakwa ti cia maheni: ũyũ mwĩ nake-rĩ, nĩ mũndũ wĩ na ũmenyo mũkinyanĩru.
• 5. Atĩrĩ, Mũrungu nĩ kĩhoti, na ndarĩ mũndũ airaga: nĩ mũhoti na ũhoti wa ngoro.
• 6. Ndatũũragia arĩa aaganu muoyo, no nĩatuagĩra andũ arĩa athĩnie na kĩhooto.
• 7. Andũ arĩa athingu-rĩ, ndarĩ hĩndĩ angĩĩhũgũra maitho ndakamone, no nĩamaikaragĩria gĩtĩ kĩa ũnene hamwe na athamaki, maikarage ho kinya tene, nao magagĩtũũgĩra.
• 8. Ningĩ maakorũo marĩ ohe, magekĩrũo bĩngũ, matuĩke nĩ nga cia ũthĩnĩki imanyitĩte,
• 9. Nĩ kũmonia amonagia wĩko wao ũrĩa ũtariĩ, agakĩmonia mehia mao, mamenye nĩ maũndũ ma mwĩgerero mekĩte.
• 10. Nĩ kũhingũra ahingũraga matũ mao nĩguo mataarĩke, na akamaatha atĩ mahũndũke matigane na waganu.
• 11. Nao metĩkĩra kũigua, magĩcoke kũmũtungatagĩra-rĩ, hĩndĩ ĩo nĩ kũhingia makahingia matukũ mao o na wega, magĩte mĩaka yao marĩ o na maũndũ ma gĩkeno.
• 12. Na maarega kũigua, nĩ kũninwo makaninwo na njomo, nĩ gũkua magakua matarĩ maagĩa na ũmenyi.
• 13. No rĩrĩ, andũ arĩa me na ngoro cia ũthagathago matũũraga o maigĩte marakara: kũrĩra matingĩmũrĩrĩra rĩrĩa aramoha.
• 14. Acio makuaga marĩ o anyinyi, mĩoyo yao ĩgathira ta ya arĩa methũkagia.
• 15. Mũndũ mũthĩnĩku-rĩ, amũtharaga ũũru-inĩ na njĩra ya thĩna ũcio e naguo, agakĩmahingũra matũ na njĩra o ĩo ya kũhinyĩrĩrio.
• 16. Ĩĩ-ni, o nawe nĩendaga akũgucĩrĩrie uume harĩa ũhatĩkĩrĩirio akuumĩrie kũndũ kwariĩ, kũrĩa gũtarĩ ũkunderu; hĩndĩ ĩo kĩrĩa ũrĩigagĩrũo metha-inĩ yaku kĩhunjage maguta.
• 17. No rĩrĩ, wee nĩ kũiyũrũo ũiyũirũo nĩ mũcirĩre wa arĩa aaganu: no mũhaka ũnyitwo o nawe nĩ cira o na ituĩro rĩrĩa rĩa kĩhooto.
• 18. Kĩĩmenyerere, ndũkagucĩrĩrio nĩ marũrũ ũtuĩke wa ndendwa, ningĩ-rĩ, tiga gwĩtĩkĩra kwehũka nĩ ũrĩa gĩgũkũũri gĩkũneneha.
• 19. Ũtonga waku arĩ guo nĩũngĩkĩigana wa gũkũruta hatĩ-inĩ? o na kana nditi ciothe cia ũhoti ũcio wĩ naguo?
• 20. Tiga gũkĩhũmĩrĩra ũtukũ, nĩrĩo ihinda rĩrĩa irĩndĩ ituĩkanaga irĩ o gwacio.
• 21. Ĩrĩithie, ndũkae kwerekera na waganu-inĩ, amu nĩguo wee ũthurĩte handũ ha gũthĩnĩka.
• 22. Atĩrĩrĩ: Mũrungu, tondũ wa ũhoti wake, nĩekaga maũndũ manene mũno: nũ ũngĩ mũrutani take?
• 23. Nũ ũkĩmwĩraga njĩra ĩrĩa ekũgera? ningĩ nũ ũngĩmwĩra, Wee nĩwĩkĩte wogogi?
• 24. Ririkanaga kũgathĩrĩria wĩra wake, ũrĩa wanainĩrũo nĩ andũ.
• 25. Kĩrĩndĩ gĩothe nĩgĩtũire kĩũcũthagĩrĩria; andũ-rĩ, mawĩroragĩra marĩ o kũraya.
• 26. Atĩrĩ, Mũrungu nĩ mũnene, na ithuĩ tũtimũũĩ; mĩaka yake ndĩngĩtuĩrĩka ũrĩa ĩigana.
• 27. Amu-rĩ, agucagia tũtaata twa maĩ o agĩtwambatagia, tũrĩa tũcokaga gũtuĩka mbura yumĩte thaarũ-inĩ wayo;
• 28. Ĩgagĩitĩrĩrio thĩ nĩ matu macio me igũrũ, makiuragĩria andũ o makĩmĩingĩhagia.
• 29. Nĩngarĩ kwĩ mũndũ ũngĩmenya ũrĩa matu matandayagio, kana amenye ũhoro wa marurumĩ ma hema-inĩ ĩo aikaraga?
• 30. One ũrĩa ahunjagia ũtheri wake ũkamũthiũrũrũka kũu arĩ, agacoka akaũhumbĩra na ndia iria nene cia iria!
• 31. Maũndũ macio nĩ kũherithia aherithagia irĩndĩ namo, ningĩ kũheana akaheana bũthi wa irio.
• 32. Rũheni-rĩ, nĩethayaga moko naruo, akarũatha atĩ rũrathe o kĩrĩa rũaikĩrio.
• 33. Mũgambĩre waruo nĩ rũrongoro rũake ũrehage, mahiũ namo ũkamamenyithia atĩ kũrĩ kĩhuhũkanio kĩroka.

Home