Go Back

Ayubu Chapter 33

• 1. No rĩrĩ, wee Ayubu, ta igua ndeto ici ciakwa, ũhoro wakwa wothe ũũthikĩrĩrie.
• 2. One, kanua gakwa rĩu nĩndagatumũra; rũrĩmĩ rũakwa rũrĩ kwaria, rũrũ rũa kanua gakwa.
• 3. Ciugo ciakwa nĩikũheana ũhoro mwerekereru o ũrĩa wa ngoro yakwa, mĩromo yakwa yuge ũmenyi wayo hatarĩ na kohinga.
• 4. Nĩ roho wa Mũrungu wanyũmbire, mĩheeho ya Mwene-Hinya nĩyo ĩndũũragia muoyo.
• 5. Akorũo nĩũkũhota-rĩ, kĩ’hũndũrĩre ũhoro, ta haarĩria ciugo ciaku ũrĩ haha mbere yakwa, ũkiumĩre.
• 6. Atĩrĩ, mbere ya Mũrungu niĩ ndariĩ o tawe; o na niĩ nĩ kũũmbwo ndombirũo na rĩũmba.
• 7. Itebebia rĩakwa-rĩ, rĩtingĩgũtua nda ũritũ wakwa ndũngĩkũhihinya.
• 8. Nĩ ma, nĩwarĩtie o ngĩiguaga na matũ, ngakĩigua mũgambo waku ũkiuga atĩrĩ:
• 9. Niĩ ndĩ mũtheru, ndirĩ na mehia; niĩ ndirĩ ũũru njĩkĩte, thĩinĩ wakwa waganu gũtirĩ;
• 10. Nĩ rĩ’, We nĩ gũ’thigana a’thiganaga, nĩ kũndua anduĩte thũ yake;
• 11. Nĩanjohereire ndungu magũrũ, na nĩandĩithagia ikĩro ciakwa ciothe.
• 12. Atĩrĩrĩ, nĩngũgũcokeria ũhoro: ũkiuga ũguo-rĩ, ndũrĩ na kĩhooto, nĩ gũkorũo Ngai nĩ mũnene kũrĩ andũ.
• 13. Ũrakĩgiana nake nĩkĩ nĩ ũndũ atĩ maũndũ make o na ũmwe ndaheanaga gĩtũmi kĩaguo?
• 14. Amu kwaria, Mũrungu nĩaaragia rĩmwe, ĩĩ-ni, o na rĩa kerĩ, andũ mangĩaga kũrũmbũria.
• 15. Nĩ kĩroto-inĩ, kĩoneki-inĩ gĩa ũtukũ, andũ maagwatwo nĩ toro mũnene, hĩndĩ ĩrĩa makomete ũrĩrĩ,
• 16. Nĩrĩo ahingũraga andũ matũ, na ũtaaro ũrĩa maataarũo akawĩkĩra rũũri,
• 17. Nĩ getha atigithie mũndũ rĩĩthugunda rĩrĩa ethugundĩte, na athiĩkĩrĩrie mũndũ mwĩtĩo, atigane naguo;
• 18. Agakĩriĩrana roho wake na irima, akagiria muoyo wake ũkaninwo na njomo.
• 19. Hĩndĩ ĩngĩ mũndũ akaherithio na ruo arĩ ũrĩrĩ, agaikara o agĩatagio nĩ mahĩndĩ matangĩtigithĩria,
• 20. O kinya ngoro yake ĩgathũũra irio, roho wake ũgagĩthũũra o na kandũ karĩa ga ũthuro.
• 21. Nyama cia mwĩrĩ wake nĩihwererekagĩra, ikaya gũthira, na mahĩndĩ make marĩa mataronagwo makoimĩra.
• 22. Ĩĩ-ni, roho wake ũkaya gũkuhĩhĩria irima, muoyo wake ũgagĩthengerera harĩ arĩa maninanaga.
• 23. Gwakorũo kũrĩ mũraika arekeirio, mũtaũranĩri, ũmwe wa arĩa ngiri, wa kuonia mũndũ ũrũngĩrĩru ũrĩa ũmwagĩrĩire-rĩ,
• 24. Hĩndĩ ĩo akamũkinyĩria wega wake, akoiga, Ũyũ nĩohorũo nga ndagatuĩke wa kũharũrũka irima; nĩnyonete kĩmũkũũri.
• 25. Hĩndĩ ĩo nyama cia mwĩrĩ wake igagĩĩthĩha kũrĩ cia mwana, agagĩcokererũo nĩ matukũ make marĩa ma ũnyinyi:
• 26. Ahoyaga Ngai, nake agatuĩka wa kũmũiguĩra wega; ũthiũ wa Ngai aawĩrorera, nĩ gũkena akenaga: nake-rĩ, agatũma mũndũ ta ũcio acokwo nĩ ũthingu wake.
• 27. Nĩ kũina ainaga e mbere ya andũ arĩa angĩ, akoiga atĩrĩ, Niĩ nĩndahĩtirie, ũhoro ũrĩa mwerekereru-rĩ, ngĩwagania; na ũũru ũcio ndiigana kũwĩrĩhĩrio.
• 28. Nĩ gũkũũra akũũrĩte roho wakwa ndũgatonye irima, muoyo wakwa ũgĩtũũre o wonaga ũtheri.
• 29. One, maũndũ macio mothe Mũrungu nĩekaga; kerĩ, o na gatatũ, ageka mũndũ ũguo,
• 30. Nĩguo ahũndũre roho wake uume irima-inĩ, atheragĩrũo nĩ ũtheri ũrĩa wonagwo nĩ arĩa me muoyo.
• 31. Thikagĩrĩria, wee Ayubu, ũkaigua ũhoro wakwa; wĩkirĩre, niĩ njaragie.
• 32. Akorũo wĩ na ũndũ wa kuuga, njokeria. Aria, amu ũrĩa ngwenda no gũtuĩke atĩ wĩ mũthingu.
• 33. Na akorũo ndũrĩ naguo, no gĩ’thikĩrĩrie; wee ĩĩkirĩre, niĩ ngũrute ũũgĩ.

Home