Go Back

Ayubu Chapter 3

• 1. THUTHA ũcio Ayubu agĩtumũra kanua, akĩruma mũthenya ũrĩa aaciarirũo.
• 2. We Ayubu agĩgĩcokia ũhoro akiuga:
• 3. Mũthenya ũrĩa niĩ ndaciarirũo-rĩ, ũrotoma! o hamwe na ũtukũ ũrĩa woimirie atĩ, Kũrĩ mwana wa mũndũ mũrũme wagĩirũo ihu!
• 4. Mũthenya ũcio ũrotuĩka o nduma; Ngai nĩamenye gũkaũrũmbũiya arĩ igũrũ, o na ũroaga gũthererũo nĩ ũtheri!
• 5. Nduma-rĩ, o gwata ĩrĩa nene ya gĩkuũ, ĩrowĩnyitĩra ũtuĩke wayo; nĩũtũũre ũhumbĩirũo nĩ itu; kĩrĩa gĩothe gĩcingimanagia mũthenya kĩrowĩkĩra icanjama!
• 6. Ũtukũ ũcio naguo-rĩ, ũrokumbatwo nĩ nduma ndumanu: nĩũmenye gũkagwatanio na matukũ ma mwaka; ũroaga gũtaranĩrio na mĩeri!
• 7. Ĩĩ-ni, ũtukũ ũcio ũrotũũra wĩ mũthatu; ihinda rĩaguo nĩkũmenye gũkanoigwo rũkemi!
• 8. Ũroekĩrũo ndirũ nĩ arĩa mekagĩra mĩthenya ndirũ, arĩa moĩ kwarahũra nyamũ ĩrĩa ĩĩtagwo rĩwiathani!
• 9. Njata ciaguo cia hĩndĩ ya gũkĩa irotuĩka nduma; ũrokĩrorereria ũtheri na ũwage, o na ndũkanakĩone imone cia kĩroko:
• 10. Nĩ ũndũ ndũigana kũhinga mĩirigo ya nda ya maitũ, na ndũkĩigana gũthiĩkĩrĩria maitho makwa matikonane na thĩna.
• 11. Ĩ nĩ kĩ kĩagiririe ngue o ndaciarũo? nĩ kĩ kĩagiririe nduĩkane o ndoima nda?
• 12. Nĩ ũndũ kĩ niĩ ndaamũkĩirũo maru-inĩ, kana ngĩamũkĩrũo nyondo-inĩ, atĩ nĩguo ngĩongage?
• 13. Tiga nĩ ũguo, rĩu nĩ gũkoma ingĩkomete ngakira; rĩu ingĩrĩ toro; nĩ kũhurũka ingĩhurũkĩte,
• 14. Hamwe na athamaki na ene-kĩrĩra a mabũrũri, arĩa meakĩire kũrĩa gũtarĩ andũ kwĩ na ihooru;
• 15. Kana ngagĩa hamwe na anene arĩa maarĩ na thahabu, arĩa-ni maaiyũrĩtie nyũmba ciao betha.
• 16. O na nĩ kaba itangĩatuĩkire mũndũ, ’haane ta kĩhuno gĩte, nduĩke ta twana tũrĩa tũtarĩ twona ũtheri.
• 17. Kũu-rĩ, arĩa aaganu nĩmatigĩte gocogoco, o na ningĩ kuo arĩa anogu nĩ kũhurũka mahurũkaga.
• 18. Kũu-rĩ, andũ arĩa anyite mĩgwate maarahĩte o hamwe, matigambagio nĩ mũgambo wa mũnyabara.
• 19. Andũ arĩa matarĩ igweta, gwata arĩa marĩ, othe me kuo, o na ngombo ĩgatiga gwathagwo nĩ mũmĩathi.
• 20. Nĩ ũndũ kĩ ũtheri ũheagwo mũndũ wa kĩnyamaro, muoyo-rĩ, ũgakĩheagwo arĩa maikaraga me na ũcũngũ ngoro,
• 21. O arĩa meriragĩria gĩkuũ, na gĩtingĩũka, na makĩenjagĩrĩra mũno o na gũkĩra managĩ marĩa mahitharu,
• 22. Arĩa-ni makenaga, magakenũrũrũka, makaigua wega mũno, maakinyĩrĩra mbĩrĩra?
• 23. Nĩ ũndũ kĩ ũtheri ũkĩheagwo mũndũ ũũrĩirũo nĩ njĩra, mũndũ mũhingĩrĩrie nĩ Ngai?
• 24. Amu-rĩ, ithenya rĩa ndĩe irio no gũthũmũka gũũkaga ho. Na mũraramo wakwa ũitũrũrũkaga o ta maĩ.
• 25. Amu ndetigĩra ũndũ, norĩo ũkũngorerera, ũndũ o ũcio ngũiguĩra guoya, noguo ũnginyagĩrĩra.
• 26. Ndihotaga kũhorera, kana gũkirĩrĩria, o na kana kũhurũka; no gĩtangĩko gĩũkaga.

Home