Go Back

Esiteri Chapter 9

• 1. Na rĩrĩ, mweri wa ikũmi na ĩĩrĩ, naguo nĩguo mweri wa Adari, o mũthenya wa ikũmi na ĩtatũ wa mweri o ro ũcio-rĩ, hĩndĩ ĩrĩa watho wa mũthamaki wakuhĩhĩirie gwĩkwo o ta ũrĩa oigĩte, o naguo ũhoro ũcio waathanĩtwo nĩwe wa kũrũmĩrĩrũo, naguo nĩguo mũthenya ũrĩa thũ cia Ayahudi cierĩgĩrĩire atĩ nĩikũmaatha, no rĩrĩ, ti-itherũ ũhoro ũcio nĩwagarũrũkire ũndũ ũngĩ, gũkĩonwo atĩ Ayahudi nĩo maarĩ a gwatha andũ acio maamathũũrĩte;
• 2. mũthenya o ro ũcio-rĩ, Ayahudi magĩgĩĩcokanĩrĩria matũũra-inĩ mao mabũrũri mothe marĩa maathagwo nĩ Ahasuerusu, mũthamaki, nĩ getha mahũre andũ arĩa mendaga kũmeka ũũru; na gũtirĩ mũndũ wahotire kũmetiiria, nĩ gũkorũo ndũrĩrĩ ciothe nĩciagwatirũo nĩ guoya magĩĩtigĩra Ayahudi.
• 3. Nao anene othe a mabũrũri marĩa maathagwo nĩ mũthamaki wao, o na abarũthi anene o na anyinyi, o na andũ arĩa maaroraga maũndũ ma mũthamaki, magĩteithia Ayahudi, nĩ ũndũ nĩmaagwatirũo nĩ guoya wa gwĩtigĩra Moridekai.
• 4. Nĩ ũndũ Moridekai ũcio nĩonagwo arĩ mũnene kũu nyũmba ya mũthamaki, nayo ngumo yake ĩkĩhunja mabũrũri mothe ma mũthamaki ũcio; nĩ gũkorũo mũndũ ũcio ti Moridekai aakĩrĩrĩirie o kũneneha.
• 5. Nao Ayahudi makĩhũra thũ ciao ciothe na hiũ cia njora, magĩciũraga, magĩcinina biũ; nao andũ acio maamathũũrĩte-rĩ, makĩmeka o ta ũrĩa meendeire.
• 6. Nao Ayahudi makĩũraga andũ magana matano kũu Shushani mũciĩ wa mũthamaki, makĩmanina.
• 7. Nao makĩũraga Parishandatha, na Dalifoni, na Asipatha,
• 8. na Poratha, na Adalia, na Aridatha,
• 9. na Parimashata, na Arisai, na Aridai, na Vaizatha,
• 10. nao nĩo ihĩĩ iria ikũmi cia Hamani, mũrũ wa Hamedatha, ũrĩa warĩ thũ ya Ayahudi; no rĩrĩ, matiigana gũtaha indo ciao.
• 11. Na rĩrĩ, mũthenya ũcio mũthamaki agĩgĩtwarĩrũo ũhoro wa ũrĩa andũ maaiganaga, arĩa moragĩtwo kũu Shushani mũciĩ wa mũthamaki.
• 12. Nake mũthamaki agĩkĩĩra Esiteri, mũtumia wake, atĩrĩ, Ayahudi nĩmoragĩte andũ magana matano mũciĩ wa mũthamaki, gũkũ Shushani, makamanina, o na ihĩĩ iria ikũmi cia Hamani. Hĩ! Nĩ atĩa hihi mangĩgĩkorũo mekĩte mabũrũri marĩa mangĩ makwa? Rĩu-rĩ, ũrenda gwĩkwo atĩa ũngĩ hihi? Uga, naguo ũndũ ũcio nĩũgwĩtĩkĩrũo. O naguo ũndũ ũrĩa ũngĩ ũkwenda kũ’hoya nĩ ũrĩkũ? Nĩ ũndũ-rĩ, ũndũ ũcio nĩũgwĩkwo.
• 13. Hĩndĩ ĩo Esiteri agĩkiuga atĩrĩ, Wee, mũthamaki wakwa, ũngĩkorũo nĩũkuona arĩ wega-rĩ, ndagũthaitha ũreke Ayahudi arĩa marĩ Shushani metĩkĩrĩrũo mageka rũciũ o ta ũrĩa watho ũcio ũgwathanĩtwo nĩwe wĩkwo ũmũthĩ ũtariĩ, o na ũreke ciimba cia ihĩĩ icio ikũmi cia Hamani icuurio mũtĩ igũrũ.
• 14. Nake mũthamaki agĩathana atĩ ũndũ ũcio ũgekwo o ro ũguo, naguo ũhoro wa watho ũcio ũkĩheanwo kũu Shushani. Nacio ciimba cia ihĩĩ icio ikũmi cia Hamani igĩcuurio mũtĩ igũrũ.
• 15. Nao Ayahudi arĩa maarĩ kũu Shushani magĩĩcokanĩrĩria mũthenya wa ikũmi na ĩna wa mweri ũcio wa Adari, makĩũraga andũ magana matatũ kũu Shushani; no rĩrĩ, matiigana gũtaha indo ciao.
• 16. Nao Ayahudi arĩa angĩ arĩa maarĩ mabũrũri-inĩ marĩa maathagwo nĩ mũthamaki ũcio magĩĩcokanĩrĩria, makĩĩrũĩrĩra nĩguo mehonokie mĩoyo yao, matige gũcoka gũthĩnio nĩ thũ ciao, nao makĩũraga andũ ngiri mĩrongo mũgwanja na ithano thĩinĩ wa andũ arĩa maamathũũrĩte; no rĩri, matiigana gũtaha indo ciao.
• 17. Ũndũ ũcio wekirũo mũthenya wa ikũmi na ĩtatũ wa mweri wa Adari; naguo mũthenya wa ikũmi na ĩna wa mweri o ro ũcio makĩhurũka, na makĩũtua mũthenya wa kũgĩa na ciathĩ cia kũrĩa irio, o na wa gĩkeno.
• 18. No rĩrĩ, Ayahudi arĩa maarĩ Shushani makĩũngana mũthenya ũcio wa ikũmi na ĩtatũ waguo, o na mũthenya wa ikũmi na ĩna waguo; naguo mũthenya wa ikũmi na ĩtano wa mweri o ro ũcio-rĩ, magĩkĩhurũka, makĩũtua mũthenya wa kũgĩa na ciathĩ cia kũrĩa irio, o na wa gĩkeno.
• 19. Ũndũ ũcio nĩguo ũtũmaga Ayahudi a tũtũũra-inĩ, o acio matũũraga matũũra marĩa matairigĩtwo, matue mũthenya ũcio wa ikũmi na ĩna wa mweri Adari mũthenya wa gĩkeno, o na wa kũgĩa na ciathĩ cia kũrĩa irio, o na wa gũtinda makenete, o na wa gũtwaranĩrũo njĩĩga cia irio, o mũndũ agatwarĩra mũndũ ũrĩa ũngĩ.
• 20. Nake Moridekai akĩandĩka maũndũ macio, agĩtwarithĩria Ayahudi othe arĩa maarĩ mabũrũri mothe marĩa maathagwo nĩ Ahasuerusu, mũthamaki, marũa, arĩa maarĩ gũkuhĩ, o na arĩa maarĩ kũraya,
• 21. nĩ getha amere mũno maikare mamenyereire mũthenya wa ikũmi na ĩna wa mweri wa Adari, o na mũthenya wa ikũmi na ĩtano wa mweri o ro ũcio, mwaka o mwaka,
• 22. maririkanage atĩ nĩyo Ayahudi maaninirũo thĩna wa thũ ciao, o na atĩ mweri ũcio nĩguo kwonekire atĩ ũhoro wao nĩ mũgarũrũku, mathirũo nĩ kĩeha magĩe na gĩkeno, o na matige kĩrĩro matindage makenete; o na ningĩ mĩthenya ĩo mamĩtue ya ciathĩ cia kũrĩa irio o na ya gĩkeno, o na ya gũtwaranĩra njĩĩga cia irio o mũndũ na mũndũ ũrĩa ũngĩ, o na ya gũtwarĩra athĩni iheo.
• 23. Nao Ayahudi magĩĩtĩkĩra gwĩkaga o ta ũguo maambĩrĩirie gwĩka, na ta ũrĩa Moridekai aamaandĩkĩire;
• 24. nĩ gũkorũo Hamani, mũrũ wa Hamedatha, Mũagagi, thũ ya Ayahudi othe, nĩaacirĩire kũmanina, nake agĩcuka ’Puri’, naguo ũguo nĩ ta kuuga agĩcuka mĩtĩ, nĩguo amahukie amanine biũ;
• 25. no rĩrĩ, ũhoro ũcio wamenyũo nĩ mũthamaki, agĩathana akĩandĩkithia marũa, atĩ ũndũ ũcio wa waganu Hamani aacirĩire gwĩka Ayahudi, o ũcio aacirĩire ameke, ũmũcokerere we mwene; na atĩ we mwene o na ariũ ake macuurio mũtĩ igũrũ.
• 26. Na tondũ ũcio magĩĩta matukũ macio Purimu, nĩ ũndũ wa gũthingata rĩĩtwa rĩu, Puri. Na rĩrĩ, tondũ wa mohoro marĩa maandĩkĩtwo marũa-inĩ macio, o na tondũ wa maũndũ marĩa mothe monete makoniĩ ũndũ ũcio, o na nĩngĩ tondũ wa maũndũ marĩa maamakorire,
• 27. Ayahudi magĩgĩtua atĩ kũgĩe mũtugo wa kũrũmĩrĩrũo nĩo o ene, o na rũciaro rũao, o na andũ othe arĩa maakuruhaine nao, wa atĩ matũũre mamenyereire mĩthenya ĩo yerĩ o ta ũrĩa ũhoro wayo ũrĩa waandĩkĩtwo watariĩ, o ta ũrĩa ihinda rĩayo rĩrĩa rĩatuĩtwo rĩatariĩ, mwaka o mwaka, nĩ getha mũtugo ũcio ndũkanatigwo;
• 28. na atĩ mĩthenya ĩo ĩtũũre ĩririkanagwo na ĩmenyagĩrĩrũo njiaro-inĩ ciothe, o na mbarĩ ciothe, o na mabũrũri mothe, o na matũũra mothe; na atĩ mĩthenya ĩo ya Purimu ndĩkanaage kũririkanwo thĩinĩ wa Ayahudi, o na kana ũhoro wayo wa kũririkanwo ũũre biũ mbeũ-inĩ ciao.
• 29. Hĩndĩ ĩo Esiteri wa Abihaili, mũtumia wa mũthamaki, me na Moridekai, Mũyahudi, makĩandĩka maũndũ na wathani wothe ũrĩa maarĩ naguo ma gwĩkĩra marũa macio ma kerĩ hinya, o macio ma ũhoro wa Purimu.
• 30. Nake Moridekai agĩgĩtwarithĩria Ayahudi othe arĩa maatũire mabũrũri marĩa igana rĩa mĩrongo ĩĩrĩ na mũgwanja, o macio maathagwo nĩ Ahasuerusu, marũa ma kũmahe ũhoro wa atĩ magĩe na ũiguano wa ma,
• 31. na wa atĩ mekĩre mũtugo ũcio wa kũmenyerera mĩthenya ĩo ya Purimu hinya o ihinda rĩayo rĩrĩa rĩtuĩtwo, o ta ũrĩa Moridekai, ũcio Mũyahudi, o na Esiteri, mũtumia wa mũthamaki, maamerire, o na ta ũrĩa maatuĩte mekage o ene, o na rũciaro rũao, ũhoro-inĩ wa kwĩhinga kũrĩa irio, o na wa kĩrĩro kĩrĩa mekũrĩra.
• 32. Naguo wathani ũcio wa Esiteri ũgĩĩkĩra maũndũ macio maathanĩtwo mekagwo hĩndĩ ĩo ya Purimu hinya; naguo ũhoro wamo ũkĩandĩkwo ibuku-inĩ rĩrĩa rĩa maũndũ ma ihinda rĩu.

Home