Go Back

Nehemia Chapter 9

• 1. Na rĩrĩ, mũthenya wa mĩrongo ĩĩrĩ na ĩna wa mweri ũcio-rĩ, ciana cia Isiraeli ikĩũngana ciĩhingĩte kũrĩa irio, na ikehumba matama ma makũnia, o na ikeitĩrĩria tĩri mĩtwe.
• 2. Nayo mbeũ ya Isiraeli ĩkĩĩamũra ĩthenganĩre na andũ a kũngĩ, nayo ĩkĩrũgama ĩkiumbũra mehia mayo, o na waganu wa maithe mayo.
• 3. Nao andũ ayo magĩikara marũgamĩte handũ hao ihinda rĩa thaa ithatũ magĩthoma ibuku rĩa watho wa Jehova, Ngai wao; narĩo ihinda rĩa thaa ingĩ ithatũ makiumbũra mehia mao, na makĩinamĩrĩra Jehova Ngai wao, makĩmũhoya.
• 4. Hĩndĩ ĩo aa Jeshua, na Bani, na Kadimieli, na Shebania, na Buni, na Sherebia, na Bani, na Kenani, makĩrũgama ihaicĩro-inĩ rĩa Alawii, nao magĩkaĩra Jehova Ngai wao na mũgambo mũnene.
• 5. Ningĩ Alawii, aa Jeshua, na Kadimieli, na Bani, na Hashabaneia, na Sherebia, na Hodia, na Shebania, na Pethahia, makiuga atĩrĩ, Rũgamai mũgooce Jehova, Ngai wanyu, ũrĩa ũtũũraga tene na tene, o na mĩndĩ na mĩndĩ. Narĩo rĩĩtwa rĩaku rĩrĩa rĩrĩ riri na rĩgatũũgĩrio rĩgakĩra ũgooci wothe o na ngumo yothe rĩrogathwo!
• 6. Wee nĩwe Jehova, o wee wiki; na nĩwe wombire igũrũ, o na igũrũ rĩrĩa rĩrĩ igũrũ rĩa matu-inĩ mothe, hamwe na mbũtũ yakuo yothe, o na thĩ, na indo ciothe iria irĩ kuo, o na maria, o na indo ciothe iria irĩ thĩinĩ wamo, ningĩ wee nĩwe ũmenyagĩrĩra indo icio ciothe; nayo mbũtũ ĩo ya igũrũ nĩ kũinamĩrĩra ĩinamagĩrĩra, ĩgĩkũhoya.
• 7. Wee nĩwe Jehova Ngai, ũrĩa wathurire Aburamu, ũkĩmũruta Uru-gwa-Akalidei, na ũkĩmũtua rĩĩtwa rĩrĩ rĩngĩ Iburahimu;
• 8. nawe ũgĩkĩona atĩ ngoro yake nĩĩkũrongoretie na ma, nawe ũkĩrĩkanĩra nake atĩ nĩũkamũhe bũrũri wa Akanaani, na Ahiti, na Aamori, na Aperizi, na Ajebusi, na Agirigashi, naguo ũguo nĩ ta kuuga ũũhe mbeũ yake; naguo ũhoro ũcio waku nĩũũhingĩtie o wega; nĩ ũndũ wee wĩ mũthingu.
• 9. Ningĩ nĩwonire kũnyarirũo kũrĩa maithe maitũ maanyarirĩirũo Misiri, na ũkĩigua gũkaya kwao marĩ o kũu Iria Itune;
• 10. nawe ũkĩringĩra Firauni ciama, o na ndungata ciake ciothe, o na andũ othe a bũrũri wake, o na ũgĩĩka maũndũ ma kũgegania; nĩ ũndũ wee nĩwamenyete atĩ Amisiri nĩmamokĩrĩire mameneneheirie, nawe ũkĩĩgĩĩra igweta, o ta ũrĩa gũtariĩ ũmũthĩ.
• 11. Nawe ũkĩgayũkanĩria iria mbere yao, na tondũ ũcio magĩtuĩkanĩria iria gatagatĩ harĩa haatuĩkĩte thĩ nyũmũ; nao arĩa maamateng’eretie ũkĩmaikia kũndũ kũriku mũno, o ta ũrĩa ihiga rĩrikaga o thĩ maĩ-inĩ marĩa mariku.
• 12. O na ningĩ ũkĩmatongoria na gĩtugĩ gĩa itu mũthenya, o na gĩtugĩ kĩa mwaki ũtukũ, nĩ getha mamũrĩkagĩrũo njĩra ĩrĩa maagĩrĩirũo nĩ kũgera.
• 13. O na ningĩ ũgĩikũrũka ũgĩkinya kĩrĩma-inĩ gĩa Sinai, ũkĩaria nao uumĩte igũrũ, ũgĩkĩmonia matuĩro ma cira ma kĩhooto, o na mawatho ma ma, o na irĩra iria njega cia watho wa kũrũmĩrĩrũo, o na maathani marĩa mega,
• 14. o na ũkĩmamenyithia thabatũ yaku theru na ũndũ wa ũhoro ũrĩa waheire Musa ndungata yaku, o na ũkĩmaatha marũmagĩrĩre maathani maku, o na irĩra cia watho waku wa kũrũmĩrĩrũo, o na watho waku;
• 15. ningĩ ũkĩimahe mũgate uumĩte igũrũ nĩ ũndũ wa ng’aragu ĩrĩa maarĩ nayo, o na ũkĩmarutithĩria maĩ ihiga-inĩ nĩ ũndũ wa nyota ũrĩa maarĩ naguo, o na ningĩ ũkĩmaatha mathiĩ makegwatĩre bũrũri ũrĩa waambararĩirie guoko gwaku na igũrũ, ũkiuga atĩ nĩũkamahe ũtuĩke wao.
• 16. No rĩrĩ, andũ acio, maithe maitũ, nĩmekire maũndũ menenehetie, magĩkĩũmia ngingo ciao, na matiigana kũigua maathani maku,
• 17. magĩkĩrega gwathĩka, o na kana maririkane maũndũ maku ma kũgegania marĩa wekire thĩinĩ wao; no rĩrĩ, nĩ kũũmia momirie ngingo ciao, o na ningĩ tondũ wa ũremi wao magĩĩthurĩra mũnene mecokie ũkombo-inĩ wao. No rĩrĩ, wee nĩwe Ngai muohanĩri, na muuma-andũ, na mũiguanĩri tha mũno, na ndũhiũhaga kũrakara, na ũiyũirũo nĩ tha, na ndũigana gũtigana nao.
• 18. Ningĩ ti-itherũ hĩndĩ ĩrĩa maakorirũo methondekeire njaũ ya gũtwekio, makiuga atĩ, Ĩno nĩyo ngai yaku ĩrĩa yakũrutire bũrũri wa Misiri, na magĩkorũo magũthirĩkĩtie na maũndũ maingĩ-rĩ,
• 19. ti-itherũ wee tondũ wa ũrĩa tha ciaku ciingĩhĩte mũno, ndwatiganire nao kũu werũ-inĩ; gĩtugĩ kĩu gĩa itu gĩa kũmatongoria na njĩra gĩtieherire igũrũ rĩao mũthenya, o na kana gĩtugĩ kĩa mwaki gĩa kũmamũrĩkĩra njĩra ĩrĩa maagĩrĩirũo nĩ kũgera gĩkĩehera harĩ o ũtukũ.
• 20. O na ningĩ ũkĩmahe Roho waku mwega wa kũmataaraga, na ndwamahatire mana ciaku atĩ matigacirĩe, o na ũkĩmahe maĩ nĩ ũndũ wa nyota ũrĩa maarĩ naguo.
• 21. Ti-itherũ nĩ mĩaka mĩrongo ĩna watũire ũmaheaga irio kũu werũ-inĩ, na matirĩ kĩndũ o na kĩmwe maagire; nguo ciao itiigana gũkũrĩra kuo, namo magũrũ mao matiaimbĩire kuo.
• 22. O na ningĩ ũkĩmahe mabũrũri ma athamaki, o na ndũrĩrĩ ciao; ũkĩmagayania mabũrũri kũndũ na kũndũ matuĩke igai rĩao; nao magĩkĩĩgwatĩra bũrũri wa Sihoni ũgĩtuĩka wao, naguo ũguo nĩ ta kuuga bũrũri wa mũthamaki wa Heshiboni, o na bũrũri wa Ogu, mũthamaki wa Bashani.
• 23. O na ningĩ ciana ciao ũgĩciingihia o ta njata cia igũrũ, na ũgĩcitwara nĩguo ũcikinyie bũrũri ũrĩa waheire maithe ma cio ũhoro waguo atĩ nĩigathiĩ kuo ikawĩgwatĩre ũtuĩke wacio.
• 24. Nacio ciana icio igĩgĩthiĩ kuo, ikĩĩgwatĩra bũrũri ũcio; nao andũ arĩa maaũtũũraga ũkĩmatoria biũ mehere mbere yao, nao nĩ Akanaani; ũgĩkĩmarekereria ũkĩmaneana moko-inĩ ma cio, hamwe na athamaki ao, o na ndũrĩrĩ cia bũrũri ũcio, nĩ getha andũ acio akuo mekwo nĩcio o ta ũrĩa ingĩenda.
• 25. Nacio igĩgĩtunyana matũũra maairigĩtwo, o na bũrũri mũnoru, o na ikĩĩgwatĩra nyũmba ciiyũrĩte indo ciothe iria njega, o na marima menjetwo ma maĩ, na mĩgũnda ya mĩthabibu, na mĩgũnda ya mĩtamaiyũ, na mĩtĩ mĩingĩ mũno ya matunda; nacio igĩkĩrĩa irio, ikĩhũna, na ikĩnora, igĩgĩkena nĩ ũndũ wa wega waku mũingĩ.
• 26. No rĩrĩ, o na gwatuĩka nĩ ũguo-rĩ, andũ acio matiigana gwathĩka, no nĩ kũrema maaremire magĩgũũkĩrĩra, naguo watho waku makĩũikia na thutha wao, o na makĩũraga anabii aku arĩa maamataaraga nĩguo mamagarũre magũcokerere, nao magĩĩka maũndũ manene ma gũgũthirĩkia.
• 27. Na tondũ ũcio ũgĩkĩmarekereria ũkĩmaneana moko-inĩ ma thũ ciao, ikĩmanyarira; narĩo ihinda rĩrĩa maathĩnĩkire, magĩgũkaĩra, ũkĩmaigua ũrĩ o kũu igũrũ; nawe tondũ wa ũrĩa tha ciaku ciingĩhĩte ũkĩmahe andũ a kũmahonokia, nao makĩmahonokia makĩmaruta moko-inĩ ma thũ ciao.
• 28. No thutha-inĩ rĩrĩa maahurũkire, magĩcoka gwĩka ũũru makĩonagwo nĩwe; na tondũ ũcio ũkĩmatigania moko-inĩ ma thũ ciao, nacio igĩkĩmaatha; no maagũcokerera maagũkaĩra-rĩ, ũkĩmaigua ũrĩ o kũu igũrũ, na nĩ mahinda maingĩ wanamahonokia nĩ ũndũ wa ũrĩa ũiguanagĩra tha;
• 29. na ũgĩkĩmataara, nĩ getha ũmacokie watho-inĩ waku; no rĩrĩ, o nĩ gwĩka mekaga maũndũ menenehetie, na makaaga kũigua maathani maku; no kwĩhia mehagia matuĩro maku ma cira, (na nĩmo mangĩrũmĩrĩrũo nĩ mũndũ mamũtũũrie muoyo), magakĩrema o kũrema, makomia ngingo, makarega kũigua watho waku.
• 30. No rĩrĩ, wee nĩwakiragĩrĩria ũhoro wao mĩaka mĩingĩ, na ũkamataara na ũndũ wa roho waku, na tũnua twa anabii aku; no o na gwatuĩka nĩ ũguo-rĩ, matiigana gũkũigua; na tondũ ũcio ũkĩmaneana moko-inĩ ma ndũrĩrĩ cia mabũrũri mangĩ.
• 31. Ningĩ o na gwatuĩka nĩ ũguo-rĩ, tondũ wa tha ciaku nyingĩ mũno, ndwamaninire biũ, o na kana ũgĩtigana nao, tondũ wee wĩ Mũrungu muuma-andũ, na ũiyũirũo nĩ tha.
• 32. Na tondũ ũcio wee Ngai witũ wĩ na hinya, Mũrungu mũnene wa kũmakania, wee ũtũũraga ũmenyereire kĩrĩkanĩro kĩrĩa ũrĩkanĩire na andũ, o na ũkamaiguĩra tha, ndagũthaitha ndũkone mĩnyamaro ĩo iitũ, o na ya athamaki aitũ, na anene aitũ, o na athĩnjĩri-Ngai aitũ, o na anabii aitũ, o na maithe maitũ, o na andũ aku othe, o ĩo twananyarirũo nayo gwata hĩndĩ ya athamaki a Ashuri o nginya ũmũthĩ, ta ĩrĩ ũndũ ũtarĩ bata.
• 33. No rĩrĩ, maũndũ-inĩ mothe marĩa maanatũkora-rĩ, wee ũkoragwo ũrĩ o mũthingu; nĩ gũkorũo wee nĩũtwĩkaga maũndũ ma ma o ma, no ithuĩ nĩ gwĩka twĩkĩte maũndũ ma waganu;
• 34. nao athamaki aitũ, o na anene aitũ, o na athĩnjĩri-Ngai aitũ, o na maithe maitũ, hatirĩ maamenyereire watho waku, kana makĩigua maathani maku, o na kana ndeto iria wamataaraga nacio, o icio wamataaraga nacio ũkiumbũranĩra ũhoro wao.
• 35. Nĩ ũndũ matigũtungatĩire mabũrũri-inĩ marĩa wamaheire mathamakage, o na kana hĩndĩ ĩrĩa maatũire maũndũ-inĩ maingĩ ma ũtugi marĩa wamatugaga namo, o na kana magĩgũtungatĩra me kũu bũrũri ũcio mũnene na mũnoru, o ũcio wamaheire ũkĩũiga o mbere yao, o na kana makĩgarũrũka matigane na mawĩra mao ma waganu.
• 36. Atĩrĩrĩ, ithuĩ ũmũthĩ tũrĩ o ndungata; o naho ha ũhoro wa bũrũri ũrĩa waheire maithe maitũ, atĩ nĩguo marĩage maciaro maguo, o na irio iria njega ciaguo-rĩ, tũtuĩkĩte o ndungata thĩinĩ waguo.
• 37. Naguo nĩwonagĩra athamaki arĩa ũigĩte kuo matũthamakagĩre nĩ ũndũ wa mehia maitũ uumithio mũingĩ; ningĩ o nayo mĩĩrĩ iitũ no o mamĩathaga, o na ũhiũ witũ, o ta ũrĩa mekwenda, na ithuĩ twĩ na thĩna mũnene mũno.
• 38. No rĩrĩ, o na gwatuĩka atĩ ũguo nĩguo maũndũ macio mothe matariĩ-rĩ, nĩtũkũrĩkanĩra kĩrĩkanĩro kĩrũmu, tũgakĩandĩka marũa-inĩ; nao anene aitũ, na Alawii aitũ, o na athĩnjĩri-Ngai aitũ, magagĩĩkĩra rũũri rũao.

Home