Go Back

Nehemia Chapter 5

• 1. Hĩndĩ ĩo gũgĩkĩgĩa kĩrĩro kĩnene kĩa andũ amwe a bũrũri ũcio, o na gĩa atumia ao, nĩ ũndũ wa ũrĩa mekagwo nĩ Ayahudi arĩa angĩ ariũ a ithe wao.
• 2. Gũgĩkĩgĩa amwe mekuuga atĩrĩ, Ithuĩ na ariũ aitũ, o na airĩtu aitũ, tũrĩ aingĩ; rekei tũgĩĩcarĩrie irio, nĩ getha tũcirĩe, tũtũũre muoyo!
• 3. Ningĩ gũkĩgĩa angĩ mekuuga atĩrĩ, Nĩtũragwatia mĩgũnda iitũ ya irio, na ya mĩthabibu, o na nyũmba ciitũ; rekei twĩcarĩrie irio, nĩ ũndũ wa ng’aragu ĩno twĩ nayo.
• 4. O na gũkĩgĩa angĩ mekuuga atĩrĩ, Nĩtuohorete mbia nĩ ũndũ wa kũruta igoti rĩa mũthamaki, tũkaneana mĩgũnda iitũ ya irio, o na ya mĩthabibu.
• 5. No rĩrĩ, githĩ mĩĩrĩ iitũ ndĩgĩtariĩ o ta mĩĩrĩ ya ariũ arĩa angĩ a ithe witũ? Nacio ciana ciitũ-rĩ, githĩ itigĩtariĩ o ta ciana ciao? No rĩrĩ, nĩ gũtwara tũratwara ariũ aitũ, o na airĩtu aitũ, ũkombo-inĩ, o na rĩu airĩtu aitũ amwe nĩmarĩkĩtie gũtuĩka ngombo; na ithuĩ tũtirĩ na hinya wa kũgiria ũndũ ũcio woneke, nĩ gũkorũo mĩgũnda iitũ ya irio, o na ya mĩthabibu, nĩ andũ angĩ me nayo.
• 6. Na niĩ ngĩkĩrakara mũno ndaigua ũrĩa mararĩra, o na ndaigua ndeto icio.
• 7. Hĩndĩ ĩo ngĩgĩĩciria ũhoro ũcio, ngĩkĩrũithia andũ arĩa anene a matũũra, o na aathani, ngĩmera atĩrĩ, Nĩ gwĩtia mũretia uumithio mũkĩohoranĩra mbia, o mũndũ agetia mũrũ wa ithe. Ngĩgĩcoka ngĩgĩa na ũũngano mũnene nĩguo ndetie andũ acio.
• 8. Ngĩkĩmera atĩrĩ, Nĩtũkũũrĩte Ayahudi ariũ a ithe witũ arĩa mendeirio ndũrĩrĩ, o ta ũrĩa tũhotete. Anga na inyuĩ nĩmũkwenda kwendia ariũ acio a ithe wanyu? Ningĩ-rĩ, anga nĩkwagĩrĩire menderio ithuĩ? Magĩgĩkira ki, na matiigana kuona kiugo o na kĩmwe gĩa gũcokia.
• 9. Ningĩ ngĩkiuga atĩrĩ, Ũndũ ũcio mũreka ti mwega; githĩ mũtiagĩrĩirũo nĩ gũthiaga mwĩtigĩrĩte Ngai witũ, nĩ getha mũtikamenwo nĩ ndũrĩrĩ iria irĩ ũthũ na ithuĩ?
• 10. Niĩ na niĩ, o na ariũ a baba o na ndungata ciakwa-rĩ, nĩtũmohoragĩra mbia o na ngano. Ndamũthaitha mwĩtĩkĩre tũtigacoke kũmetia uumithio.
• 11. O na ningĩ ndamũthaitha mũmacokerie mĩgũnda yao ya irio o ro ũmũthĩ, o na ya mĩthabibu, o na ya mĩtamaiyũ, na nyũmba ciao; o na mũmacokerie gĩcunjĩ kĩa igana kĩa mbia ciao, o na kĩa ngano, o na kĩa ndibei, o na kĩa maguta, icio mũmetagia cia kuongerera.
• 12. Nao magĩkiuga atĩrĩ, Nĩtũkũmacokeria indo icio ciao, na gũtirĩ kĩndũ tũkũmetia; ũguo nĩguo tũgwĩka, o ta ũguo uugĩte. Ngĩgĩcoka ngĩĩra athĩnjĩri-Ngai, nao andũ acio ngĩmehĩtithia moige atĩ nĩmegwĩka o ta ũguo meranĩire.
• 13. Ningĩ ngĩribariba nguo yakwa, ngiuga atĩrĩ, Ngai aroribariba o ro ũguo mũndũ o wothe ũtakahingia kĩĩranĩro kĩu, aingatwo nyũmba yake, o na wĩra-inĩ wake; aroribaribĩka ũguo, atigwo ũtheri. Nakĩo kĩrĩndĩ kĩu gĩothe gĩkiuga, Amen, gĩkĩgooca Jehova. Nao andũ acio othe magĩgĩĩka o ta ũrĩa kĩĩranĩro kĩu gĩatariĩ.
• 14. Ningĩ kuuma o hĩndĩ ĩrĩa ndatuirũo barũthi wao gũkũ bũrũri wa Juda, kũrutia mwaka wa mĩrongo ĩĩrĩ, nginya o mwaka wa mĩrongo ĩtatũ na ĩĩrĩ ĩrĩa Aritashashita mũthamaki aakorirũo athamakĩte, narĩo nĩ ihinda rĩa mĩaka ikũmi na ĩĩrĩ-rĩ, niĩ na ariũ a ithe witũ, tũtirĩ twarĩa irio iria iheagwo barũthi.
• 15. No rĩrĩ, abarũthi arĩa maarĩ mbere yakwa nĩmaahinyagĩrĩria andũ a bũrũri wao, makametia irio na ndibei cia cekeri mĩrongo ĩna cia betha, o mũthenya; o na ndungata ciao nĩcietuaga aathani a andũ akuo; no niĩ ndiigana gwĩka ũguo, nĩ ũndũ wa gwĩtigĩra Ngai.
• 16. Niĩ-rĩ, nĩ kũrũmanĩria ndarũmanĩirie kũruta wĩra wa gwaka rũthingo rũu, na tũtiigana kũgũra gĩthaka o na kĩmwe; nacio ndungata ciakwa ciothe ikĩũnganio kũu mwako-inĩ nĩ ũndũ wa wĩra ũcio.
• 17. Ningĩ nĩkwarĩ Ayahudi, o na andũ arĩa maathanaga, igana rĩa mĩrongo ĩtano maarĩaga irio metha-inĩ yakwa, thengia arĩa maatũthamĩrĩire, moimĩte ndũrĩrĩ-inĩ iria ciatũrigicĩirie.
• 18. Na rĩrĩ, indo iria ciahaarĩirio cia kũrĩo mũthenya ũmwe ciarĩ ndegwa ĩmwe, na ndũrũme noru ithathatũ, o na ningĩ ngathĩnjagĩrũo ngũkũ; naguo mũthenya ũmwe thĩinĩ wa mĩthenya ikũmi ngaigithĩrio mĩthemba yothe ya ndibei; no rĩrĩ, o na gwatuĩka ũguo-rĩ, ndiigana gwĩtia irio iria iheagwo barũthi, nĩ gũkorũo andũ acio nĩmaaritũhĩirũo mũno nĩ ũkombo ũrĩa maarĩ naguo.
• 19. Ndagũthaitha wee, Ngai wakwa, ũndirikane, ũnjĩke maũndũ mega nĩ ũndũ wa maũndũ mothe marĩa njĩkĩte andũ aya.

Home