Go Back

Nehemia Chapter 11

• 1. Na rĩrĩ, anene a andũ magĩgĩtũũra Jerusalemu; nao andũ arĩa angĩ magĩcuka mĩtĩ, nĩguo matware mũndũ ũmwe thĩinĩ wa andũ ikũmi agatũũre Jerusalemu, itũũra rĩrĩa rĩamũre, nao andũ arĩa angĩ kenda thĩinĩ wa acio ikũmi magatũũre matũũra marĩa mangĩ.
• 2. Nao andũ acio makĩrathima andũ othe arĩa megathũrire o ene atĩ magatũũre Jerusalemu na ũndũ wa kwĩendera na ngoro ciao.
• 3. Na rĩrĩ, aya nĩo anene a bũrũri ũcio arĩa maatũũrire Jerusalemu. No rĩrĩ, matũũra-inĩ marĩa mangĩ ma Juda-rĩ, o mũndũ aatũũrire gĩthaka gĩake matũũra-inĩ mao, naguo ũguo nĩ ta kuuga Aisiraeli, na athĩnjĩri-Ngai ao, na Alawii, o na Anethini, o na ciana cia ndungata cia Suleimani.
• 4. Nakuo kũu Jerusalemu gũgĩtũũra andũ amwe a ciana cia Juda, o na a ciana cia Benjamini. Nao arĩa maarĩ a ciana cia Juda nĩ aya: nĩ Athaia, mũrũ wa Uzia, wa Zekaria, wa Amaria, wa Shefatia, wa Mahalaleli, wa ciana cia Perezu;
• 5. na Maaseia, mũrũ wa Baruku, wa Koli-hoze, wa Hamia, wa Adaia, wa Joiaribu, wa Zekaria, mũrũ wa mũndũ Mũshiloni.
• 6. Nao ariũ a Perezu othe arĩa maatũire Jerusalemu maarĩ andũ njamba magana mana ma mĩrongo ĩtandatũ na anana.
• 7. Nao ariũ a Benjamini nĩ aya: nĩ Salu, mũrũ wa Meshulamu, wa Joedi, wa Pedaia, wa Kolaia, wa Maaseia, wa Ithieli, wa Jeshaia,
• 8. na thutha wake haarĩ Gabai, na Salai; nao maarĩ andũ magana kenda ma mĩrongo ĩĩrĩ na anana.
• 9. Nake Joeli wa Zikiri nĩwe warĩ mũnyabara wao; nake Juda wa Hasenua nĩwe warĩ mũrori itũũra wa kerĩ.
• 10. Nao a athĩnjĩri-Ngai nĩ Jedaia wa Joiaribu, na Jakini,
• 11. na Seraia, mũrũ wa Hilikia, wa Meshulamu, wa Zadoku, wa Meraiothu, wa Ahitubu, mwathi wa maũndũ ma nyũmba ya Ngai,
• 12. nao ariũ a ithe wao arĩa maarutaga wĩra wa nyũmba ĩo ya Ngai, maarĩ magana manana ma mĩrongo ĩĩrĩ na erĩ; o nake Adaia mũrũ wa Jerohamu, wa Pelalia, wa Amuzi, wa Zekaria, wa Pashuru, wa Malikija,
• 13. na ariũ a ithe, ciongo cia nyũmba cia maithe, maarĩ magana merĩ ma mĩrongo ĩna na erĩ; nake Amashusai, mũrũ wa Azareli, wa Ahazai, wa Meshilemothu, wa Imeri,
• 14. na ariũ a ithe wao, andũ njamba irĩ hinya, maarĩ igana rĩa mĩrongo ĩĩrĩ na anana; nake mũnyabara wao aarĩ Zabidieli wa Hagedolimu.
• 15. Nao Alawii, nĩ aya: Shemaia, mũrũ wa Hashubu, wa Azirikamu, wa Hashabia, wa Buni;
• 16. na Shabethai na Jozabadi, a anene a Alawii, nao nĩo maaroraga mawĩra ma nyũmba ya Ngai marĩa maarutagwo na kũu nja;
• 17. na Matania, mũrũ wa Mika, wa Zabedi, wa Asafu, nake nĩwe warĩ mũtongoria ũhoro-inĩ wa gũcokeria Ngai ngatho gũkĩhoyũo; o na Bakabukia, nake nĩwe wamũrũmĩrĩire thĩinĩ wa ariũ a ithe; na Abada, mũrũ wa Shamua, wa Galali, wa Jeduthuni.
• 18. Nao Alawii othe arĩa maarĩ itũũra rĩu rĩamũre maarĩ magana merĩ ma mĩrongo ĩnana na ana.
• 19. Ningĩ aikaria mĩrango, nao nĩo Akubu na Talimoni, na ariũ a ithe wao, arĩa maarangagĩra ihingo-inĩ, maarĩ igana rĩa mĩrongo mũgwanja na erĩ.
• 20. Namo matigari ma Isiraeli, o na ma athĩnjĩri-Ngai, o na ma Alawii, maaikarĩte matũũra-inĩ mothe ma Juda, o mũndũ agaikara kũndũ kũrĩa egwatĩire gũgĩtuĩka igai rĩake.
• 21. No rĩrĩ, Anethini maatũũrire Ofeli; nao Ziha na Gishipa nĩo maaroraga Anethini.
• 22. Nake mũrori wa Alawii, kũu Jerusalemu, nĩ Uzi mũrũ wa Bani, wa Hashabia, wa Matania, wa Mika, wa ariũ a Asafu, arĩa maarĩ aini nyĩmbo, nake nĩwe waroraga mawĩra marĩa maarutagwo kũu nyũmba ya Ngai.
• 23. Nĩ ũndũ kwarĩ watho waathanĩtwo nĩ mũthamaki ũmakoniĩ, gũgakĩgĩa watho wa atĩ aini acio maheagwo kĩrĩa mabatairio nĩkĩo o mũthenya.
• 24. Na rĩrĩ, Pethahia wa Meshezabeli, wa ciana cia Zera wa Juda, nĩwe waikaranagia na mũthamaki nĩ ũndũ wa maũndũ mothe marĩa maakoniĩ andũ acio.
• 25. Naho ha ũhoro wa tũtũũra na mĩgũnda yatuo-rĩ, ciana imwe cia Juda igĩtũũra Kiriathu-ariba, o na matũũra marĩo; o na Diboni, na matũũra marĩo; o na Jekabizeeli, na tũtũũra twarĩo;
• 26. o na Jeshua, na Molada, na Bethi-peleti;
• 27. na Hazaru-shuali, na Biri-shiba na matũũra marĩo;
• 28. na Zikilagi, na Mekona na matũũra marĩo;
• 29. na Eni-rimoni, na Zora, o na Jaramuthu;
• 30. na Zanoa, na Adulamu na tũtũũra twamo, na Lakishi hamwe na gĩthaka kĩarĩo, na Azeka, na matũũra marĩo. Ũguo nĩguo maatũũrire kũu kuuma Biri-shiba o nginya kĩanda kĩa Hinomu.
• 31. Nacio ciana cia Benjamini igĩtũũra Geba o na na kũu mbere yakuo o kũu Mikimashi na Aija, o na kũu Beth-eli na matũũra makuo;
• 32. o na kũu Anathothu, na Nobu, na Anania;
• 33. na Hazoru, na Rama, na Gitaimu;
• 34. na Hadidi, na Zeboimu, na Nebalati;
• 35. na Lodi, na Ono, o na gĩtuamba kĩrĩa gĩĩtagwo Gĩtuamba kĩa Abundi.
• 36. Nao andũ amwe a Alawii magĩtũũra matonyanĩte na ciana cia Benjamini, no maarĩ a matuanĩra ma bũrũri wa Juda.

Home