Go Back

Nehemia Chapter 1

• 1. ŨYŨ nĩguo ũhoro wa Nehemia, mũrũ wa Hakalia. Atĩrĩrĩ, mweri wa Kiselevu, mwaka wa mĩrongo ĩĩrĩ, niĩ ndĩ kũu Shushani nyũmba ya mũthamaki,
• 2. Hanani, mũndũ ũmwe wa ariũ a awa, agĩũka, o na andũ amwe angĩ moimĩte Juda; na niĩ ngĩkĩmahoya ũhoro wa Ayahudi arĩa maahonokete, o acio maatigarĩte makahonoka thĩinĩ wa arĩa maatahĩtwo, o na ũhoro ũkoniĩ Jerusalemu.
• 3. Nao makĩnjĩra atĩrĩ, Matigari ma andũ arĩa matigarĩte thĩinĩ wa arĩa maatahĩtwo, o acio marĩ kũu bũrũri ũcio-rĩ, me na mĩnyamarĩko mĩingĩ mũno, o na makamenwo mũno; o naruo rũthingo rũa Jerusalemu rũtũire rũrĩ o rũtharie rũkagũithio thĩ, nayo mĩrango yarĩo ĩgacinwo na mwaki.
• 4. Na gũgĩkinya atĩrĩ, atĩ ndaigua ciugo icio, ngĩikara thĩ, ngĩrĩra, ngĩgĩikara mĩthenya mĩingaingĩ ngwatĩtwo nĩ kĩeha; na ngĩĩhinga kũrĩa irio, ngĩhoya ndĩ mbere ya Ngai wa igũrũ,
• 5. ngiuga atĩrĩ, Ndagũthaitha wee, Jehova Ngai wa igũrũ, wee Mũrungu mũnene na wa kũmakania, wee ũhingagĩria kĩrĩkanĩro gĩaku andũ arĩa makwendaga na makamenyerera maathani maku, o na ũkamaiguĩra tha;
• 6. ndagũthaitha ũtege matũ, o na ũracũrie maitho, nĩ getha ũthikĩrĩrie ihoya rĩakwa, niĩ ndungata yaku, rĩrĩa ngũhoya mũthenya o na ũtukũ ndĩ mbere yaku ihinda rĩrĩ, nĩ ũndũ wa ciana cia Isiraeli, ndungata ciaku, o hĩndĩ ĩrĩa ngũkuumbũrĩra mehia ma ciana cia Isiraeli, marĩa tũkwĩhĩtie; ti-itherũ, niĩ mwene, o na andũ a nyũmba ya baba, nĩtwĩhĩtie.
• 7. Nĩtũgwĩkĩte maũndũ moru mũno mũno, na tũkaaga kũmenyerera maathani marĩa watwathire, o na irĩra cia watho wa kũrũmĩrĩrũo, o na matuĩro maku ma cira, o macio waathire Musa ndungata yaku.
• 8. Ndagũthaitha ũririkane ũhoro ũrĩa waathire Musa, ndungata yaku, ũkĩmwĩra atĩrĩ, Mũngĩkaagarara watho wakwa-rĩ, nĩngamũhurunjĩra ndũrĩrĩ-inĩ mũtwarũo kũndũ kũraya;
• 9. no rĩrĩ, mũngĩkanjokerera, na mũmenyerere maathani makwa mũmekage-rĩ, o na andũ anyu arĩa mateetwo mangĩgakorũo marĩ o gĩturi-inĩ gĩa kũu igũrũ, ndirĩ hingo itakamacokereria, ndĩmarute kũu, ndĩmatware o handũ harĩa ’thurĩte nĩ getha ndũme rĩĩtwa rĩakwa rĩtũũre ho.
• 10. Na rĩrĩ, ici nĩcio ndungata ciaku, o na andũ aku, arĩa wakũũrire na hinya waku mũnene, o na ũndũ wa guoko gwaku kwĩ hinya.
• 11. Atĩrĩrĩ, Jehova, ndagũthaitha ũtege gũtũ gwaku ũigue mahoya makwa, niĩ ndungata yaku, o na mahoya ma ndungata ciaku, o ici ikenagio nĩ gwĩtigĩra rĩĩtwa rĩaku; o na ningĩ ndagũthaitha ũtũme niĩ ndungata yaku ngĩe na mũnyaka ũmũthĩ, na wĩtĩkĩre njiguĩrũo tha ngĩthengerera mũndũ ũcio. (Tondũ nĩ niĩ ndarĩ mũtwarĩri mũthamaki gĩa kũnyua.)

Home