Go Back

Ezara Chapter 9

• 1. Na rĩrĩ, maũndũ macio maarĩkia gwĩkwo-rĩ, atongoria magĩ’thengerera, makĩnjĩra ũũ: Atĩrĩrĩ, andũ a Isiraeli, o na athĩnjĩri-Ngai na Alawii, nĩmaregete kwĩamũra methengie harĩ andũ a mabũrũri maya, no nĩ gwĩka mareka maũndũ me thahu o tao, naguo ũguo nĩ ta kuuga maũndũ marĩa mekagwo nĩ Akanaani, na Ahiti, na Aperizi, na Ajebusi, na Aamoni, na Amoabi, na Amisiri, na Aamori.
• 2. Nĩ ũndũ nĩmahikitie airĩtu ao, magetĩkĩra mahikio nĩ ariũ ao; na tondũ ũcio mbeũ ĩrĩa nyamũre nĩĩthombocanĩte na andũ a mabũrũri maya; na ti-titherũ atongoria ao o ene, o na andũ arĩa maathanaga, nĩo matemeire andũ arĩa angĩ njĩra ya kwagarara watho.
• 3. Na rĩrĩ, hĩndĩ ĩrĩa ndaiguire ũhoro ũcio, ngĩtembũranga nguo ciakwa, ya thĩinĩ o na ya igũrũ, o na ngĩmunya njuĩrĩ imwe cia mũtwe wakwa, o na kĩreru, ngĩgĩikara thĩ ndĩ mũmaku.
• 4. Hĩndĩ ĩo hagĩkigomana harĩ niĩ mũndũ o wothe ũrĩa wainainagio nĩ ciugo iria cioigĩtwo nĩ Ngai wa Isiraeli, nĩ ũndũ wa ũrĩa andũ acio maatahĩtwo maagararĩte watho; na niĩ ngĩikara thĩ ndĩ mũmaku o ro ũguo o nginya hĩndĩ ĩrĩa igongona rĩa hwaĩ-inĩ rĩrutagwo.
• 5. Narĩo ihinda rĩu rĩrutagwo igongona rĩa hwaĩ-inĩ ngĩũkĩra, ngiuma hau ndenyihĩirie, ndĩ na nguo yakwa ĩrĩa ya thĩinĩ o na ĩrĩa ya igũrũ itembũkangĩte o ro ũguo, ngĩcoka ngĩturia ndu, ngĩtambũrũkĩria Jehova Ngai wakwa moko,
• 6. ngĩmwĩra ũũ: Atĩrĩrĩ, Wee, Ngai wakwa, nĩngũconoka na ngaigua thoni nĩ gũkũinamũrĩra ũthiũ wakwa, wee Ngai wakwa, nĩ gũkorũo mawaganu maitũ nĩmongererekete magatũkĩrũka ciongo, o namo mehia maitũ nĩmanenehete magakinya o matu-inĩ marĩa maitũ.
• 7. Kuuma o matukũ ma maithe maitũ-rĩ, tũtũire tũkĩragĩrĩria o kwĩhia o nginya ũmũthĩ; na tondũ wa ũũru ũcio witũ nĩkĩo ithuĩ, o na athamaki aitũ, o na athĩnjĩri-Ngai aitũ, twarekereirio tũkĩneanwo moko-inĩ ma athamaki a mabũrũri mangĩ, tũũragwo nĩo na hiũ cia njora, o na tũgwatwo mĩgwate, o na tũtahwo, o na tũconorũo mũno, o ta ũrĩa gũtariĩ mũthenya ũyũ wa ũmũthĩ.
• 8. Na rĩrĩ, rĩu kahinda gaka kanini, Jehova Ngai witũ nĩatũiguĩrĩire tha, agatũma tũtigarĩrũo nĩ matigari manyinyi ma andũ mahonoke, o na agatũhe handũ ha gũikara tũrũmĩte tũtarĩ na ũgwati kũndũ gũkũ gwake kwamũre, nĩ getha Ngai witũ atũme maitho maitũ magĩe na ũtheri, o na atĩ tũikare ihinda ikuhĩ ta tũrĩ ariũku, tuumĩte ũkombo-inĩ;
• 9. nĩ ũndũ tũkĩrĩ ngombo; no rĩrĩ, o na kũngĩtuĩka nĩ ũguo, Ngai witũ ndatiganĩte na ithuĩ ũkombo-inĩ ũcio witũ, no nĩ tha atũiguĩrĩire tũkĩonwo nĩ athamaki a Perisia, nĩguo tũikarange ta tũrĩ ariũku, nĩ getha twake nyũmba ya Ngai witũ rĩngĩ, na tũmĩcokererie kũndũ kũrĩa ĩtharũkĩte, na tũgĩe na rũthingo rũa gũtũirigĩra thĩinĩ wa Juda o na Jerusalemu.
• 10. Na rĩrĩ, Ngai witũ, tũngĩgĩcoka kuuga atĩa hihi? Nĩ gũkorũo, nĩ gũtigana tũtiganĩte na maathani maku,
• 11. o marĩa waathanire na ũndũ wa tũnua twa anabii, ndungata ciaku, ũkiuga atĩrĩ, Bũrũri ũrĩa mũgũthiĩ kwĩgwatĩra ũtuĩke wanyu-rĩ, nĩ bũrũri mũthũkie nĩ maũndũ marĩa matarĩ matheru ma andũ arĩa maũtũũrĩte, na maũndũ mao marĩa me thahu, marĩa maiyũrĩte kuo kuuma gĩturi kĩmwe kĩaguo o nginya gĩturi kĩrĩa kĩngĩ, magagĩtũma ũiyũrũo nĩ magigi.
• 12. Tondũ ũcio tigai kũreka ariũ ao mahikie airĩtu anyu, o na kana mwĩtĩkĩre airĩtu ao mahikio nĩ ariũ anyu, o na kana mwĩnogie na ũhoro wa atĩ magĩe na thayũ o na kana magaacĩre tene na tene. Tigagai gwĩka maũndũ macio nĩ getha mũgĩe na hinya, na mũrĩage indo iria njega cia bũrũri ũcio, na mũkaũtigĩra ciana cianyu ũtuĩke igai rĩacio tene na rene.
• 13. Na rĩrĩ, kuona atĩ nĩtũkoretwo nĩ maũndũ macio mothe manene ũguo nĩ ũndũ wa ũrĩa twĩkĩte ũũru, o na ũndũ wa ũrĩa tũrĩ ehia mũno-rĩ, ningĩ kuona atĩ wee, Ngai witũ, ũtũhũrĩte ihũra inyinyi gũkĩra ũrĩa twagĩrĩirũo nĩ kũhũrũo nĩ ũndũ wa ũũru ũcio witũ, o na ũgatũtigĩria matigari maya-rĩ,
• 14. githĩ nĩtũgagĩcoka kwĩhia maathani maku, o na tũtume ũthoni na andũ arĩa mekaga maũndũ macio me thahu mũno? Hĩ! Githĩ hihi ndũngĩkĩrakario nĩ ithuĩ mũno o nginya ũtũnine biũ, o nginya haage mũndũ o na ũmwe mũtigaru, o na kana mũndũ o na ũmwe mũhonoku?
• 15. Atĩrĩrĩ, wee, Jehova Ngai wa Isiraeli, wĩ mũthingu; nĩ gũkorũo nĩtũtigĩirio matigari ma andũ arĩa mahonokete, o ta ũrĩa gũtariĩ ũmũthĩ; na atĩrĩrĩ, rĩu twĩ mbere yaku tũkĩonagwo atĩ ti-itherũ tũrĩ ehia; nĩ ũndũ gũtirĩ mũndũ ũngĩhota kũrũgama mbere yaku nĩ ũndũ wa ũhoro ũcio.

Home