Go Back

Ezara Chapter 6

• 1. Hĩndĩ ĩo Dario, ũcio mũthamaki, agĩgĩathana, naguo ũhoro ũcio ũgĩtuĩrio nyũmba-inĩ ĩrĩa yaigagwo mabuku ma maũndũ ma kũririkanwo o na ĩkaigwo mũthithũ wa indo cia bata kũu Babuloni.
• 2. Nakuo kũu Akimetha, nyũmba ya athamaki ĩrĩa ĩrĩ bũrũri wa Media, gũkĩoneka irũa rĩandĩke, narĩo rĩandĩkĩtwo ũhoro ũyũ wa gũtũũra ũririkanagwo:
• 3. Atĩrĩrĩ, mwaka wa mbere ũrĩa Kurusu, ũcio mũthamaki, aakorirũo athamakĩte, Kurusu o ro ũcio mũthamaki, nĩaathanire, akiuga ũũ: Ha ũhoro ũkoniĩ nyũmba ya Ngai, kũu Jerusalemu, nĩ wega nyũmba ĩo yakwo; nĩhaakwo handũ harĩa marutagĩra magongona; nacio itina ciayo ciakwo na hinya mũno, nakuo kũraiha na igũrũ kwa nyũmba ĩo gũtuĩke mĩkono mĩrongo ĩtandatũ, o nakuo kwarama kwayo gũtuĩke mĩkono mĩrongo ĩtandatũ;
• 4. na ĩĩkĩrũo mĩhari ĩtatũ ya mahiga manene mũno, o na ĩĩkĩrũo mũhari ũmwe wa mĩtĩ mĩtungu ya mũtuano; nacio mbia iria ikũrutwo nĩ ũndũ wa wĩra ũcio ciume nyũmba ya mũthamaki;
• 5. o na ningĩ indo cia thahabu na cia betha cia nyũmba ya Ngai, iria Nebukadinezaru aarutire hekarũ-inĩ ĩrĩa yarĩ Jerusalemu agĩcirehe gũkũ Babuloni, ihũndũrũo icokio o kũu hekarũ-inĩ ĩo ĩrĩ kũu Jerusalemu, o kĩmwe kĩmwe kĩigwo handũ hakĩo nawe ũgaciiga o kũu nyũmba ĩo ya Ngai.
• 6. Na rĩrĩ, tondũ wa ũhoro ũcio, wee Tatenai, barũthi wa mũrĩmo ũrĩa ũngĩ wa rũũĩ rũa Farati, o nawe Shetharu-bozenai, o na andũ arĩa angĩ a thiritũ yanyu arĩa Aafarisaki, arĩa marĩ mũrĩmo ũcio ũngĩ wa rũũĩ rũu, eherai kũu;
• 7. tiganai na wĩra ũcio wa nyũmba ĩo ya Ngai, mũreke barũthi wa Ayahudi, o na athuri a Ayahudi, maake nyũmba ĩo ya Ngai o handũ hayo.
• 8. O na ningĩ atĩrĩ, nĩngwathana njuge ũrĩa mũgwĩka athuri acio a Ayahudi, nĩ ũndũ wa gwaka nyũmba ĩo ya Ngai; nguuga atĩrĩ, atĩ gwĩkĩrũo kĩyo kĩnene gĩa kũnengera andũ acio mbia ciothe iria ikarutwo wĩra nacio; nacio ikoima mũthithũ-inĩ wa mũthamaki, naguo ũguo nĩ ta kuuga thĩinĩ wa indo iria irutagwo cia igoti o kũu mũrĩmo ũcio ũngĩ wa rũũĩ rũu, nĩ getha matikagirĩrĩrio kũruta wĩra wao.
• 9. Na rĩrĩ, kĩndũ kĩrĩa marĩbataragio nĩkĩo, ta tũtegwa tũrĩa tũtarĩ tũkũrũ, na ndũrũme, o na tũgondu twa kũrutĩra Ngai wa igũrũ mahaki ma njino, o na ngano, na cumbĩ, na ndibei, o na maguta, o ta ũrĩa mũkerũo nĩ athĩnjĩri-Ngai arĩa marĩ o kũu Jerusalemu-rĩ, nĩmaheagwo mũthenya o mũthenya gũtegũtigithĩrio;
• 10. nĩ getha marutagĩre Ngai wa igũrũ magongona ma mũtararĩko ũrĩa ũnungaga wega, na mahoyagĩre mũthamaki, o na ariũ ake, nĩguo matũũre muoyo.
• 11. O na ningĩ nĩnjathanĩte atĩ mũndũ o wothe ũrĩa ũkagarũra ũhoro ũcio, mũratho wa nyũmba yake nĩũgacomorũo, nake acoke oyũo na igũrũ ohanĩtio naguo, nayo nyũmba yake ĩtuwo iganjo nĩ ũndũ wa ũhoro ũcio;
• 12. nake Ngai ũrĩa watũmire rĩĩtwa rĩake rĩtũũre kuo arong’aũrania athamaki othe, o na andũ a ndũrĩrĩ, o arĩa magatambũrũkia moko mao magarũre ũndũ ũcio, nĩguo maanangithie nyũmba ĩo ya Ngai ĩrĩ o kũu Jerusalemu. Nĩ niĩ Dario njathanĩte ũguo. Ũndũ ũcio nĩwĩkwo na kĩyo kĩnene.
• 13. Hĩndĩ ĩo Tatenai, barũthi wa mũrĩmo ũyũ wa rũũĩ rũu, na Shetharu-bozenai, o na andũ a thiritũ yao, magĩĩka maũndũ macio mothe marĩ na kĩyo kĩnene, nĩ ũndũ wa ũhoro ũcio maatwarithĩirio nĩ Dario, ũcio mũthamaki.
• 14. Nao athuri a Ayahudi magĩgĩaka nyũmba ĩo, naguo ũhoro wao ũkĩgaacĩra nĩ ũndũ wa ũrathi wa Hagai, ũrĩa mũnabii, o na Zekaria wa Ido. Nao magĩgĩaka nyũmba ĩo makĩmĩrĩkia, o ta ũrĩa Ngai wa Isiraeli aathanire, o na ta ũrĩa watho wa Kurusu, na Dario, o na Aritashashita, athamaki a Perisia, watariĩ.
• 15. Nayo nyũmba ĩo yarĩkirio mũthenya wa ĩtatũ wa mweri wa Adari wa mwaka-inĩ wa ĩtandatũ ĩrĩa Dario, ũcio mũthamaki, aakorirũo athamakĩte.
• 16. Nacio ciana cia Isiraeli, athĩnjĩri-Ngai, na Alawii, o na andũ arĩa angĩ a ciana cia Isiraeli arĩa maatahĩtwo, makĩũngana makĩamũrĩra Ngai nyũmba ĩo ĩtuĩke yake kĩũmbe makenete.
• 17. Naguo ũhoro-inĩ ũcio wa kwamũrĩra Ngai nyũmba ĩo ĩtuĩke yake, makĩruta ndegwa igana rĩmwe, na ndũrũme magana merĩ, o na tũtũrũme magana mana; naho ha ũhoro wa igongona rĩa mehia rĩa kũrutwo nĩ ũndũ wa Aisiraeli othe, gũkĩrutwo thenge ikũmi na igĩrĩ, o ta ũrĩa mĩhĩrĩga ya Isiraeli yaiganaga.
• 18. Nao makĩiga athĩnjĩri-Ngai magayanĩtio o ikundi o ikundi, o nao Alawii makĩmagayania mawĩra mao o ta ũrĩa matuanĩra mao maatariĩ, nĩ getha matungatagĩre Ngai o kũu Jerusalemu, o ta ũrĩa kwandĩkĩtwo ibuku-inĩ rĩa Musa.
• 19. Nao andũ acio, nao nĩo andũ arĩa maatahĩtwo, makĩrĩa gĩathĩ kĩa Bathaka mũthenya wa ikũmi na ĩna wa mweri wa mbere.
• 20. Nĩ gũkorũo athĩnjĩri-Ngai o na Alawii nĩmetheririe me hamwe, nao othe maarĩ atheru; nao Alawii magĩgĩthĩnja Bathaka nĩ ũndũ wa andũ acio maatahĩtwo, o na ũndũ wa athĩnjĩri-Ngai ariũ a ithe wao, o na ũndũ wao o ene.
• 21. Nacio ciana cia Isiraeli iria ciacokire ciumĩte ndaho-inĩ, o na andũ arĩa angĩ othe arĩa maagwatanĩte nacio na makeamũra magathirũo nĩ mathahu ma ndũrĩrĩ cia bũrũri ũcio nĩ getha marongorie Jehova, Ngai wa Isiraeli, nĩmaarĩire gĩathĩ kĩu kĩa Bathaka,
• 22. o na kĩa mĩgate ĩrĩa ĩtarĩ mĩimbie, mĩthenya mũgwanja, makenete mũno; nĩ ũndũ Jehova nĩaatũmĩte magĩe na gĩkeno kĩnene, na nĩaagarũrĩte ngoro ya mũthamaki wa Ashuri ĩrore kũrĩ o, amateithie, amekĩre hinya wa kũruta wĩra wa nyũmba ya Ngai, o Ngai ũrĩa wa Isiraeli.

Home