Go Back

Ezara Chapter 3

• 1. Na rĩrĩ, mweri wa mũgwanja wakinya, nacio ciana cia Isiraeli igĩkorũo irĩ matũũra-inĩ ma cio-rĩ, andũ magĩkĩĩyũnganĩria kũu Jerusalemu o ta marĩ mũndũ ũmwe.
• 2. Hĩndĩ ĩo Jeshua wa Jozadaku, o na athĩnjĩri-Ngai arĩa ariũ a ithe, o na Zerubabeli wa Shealitieli na ariũ a ithe, magĩgĩũkĩra magĩaka kĩgongona kĩa Ngai wa Isiraeli, nĩ getha marutagĩre mahaki ma njino igũrũ rĩakĩo, o ta ũrĩa kwandĩkĩtwo watho-inĩ wa Musa, mũndũ ũrĩa wa Ngai.
• 3. Nakĩo kĩgongona kĩu magĩkĩhanda o handũ hakĩo, nĩ ũndũ nĩmaagwatĩtwo nĩ guoya nĩ ũndũ wa andũ a mabũrũri ma kũu; nao magĩkĩrutĩra Jehova mahaki ma njino o igũrũ rĩakĩo, namo nĩ mahaki ma njino ma rũcinĩ na hwaĩ-inĩ.
• 4. Ningĩ makĩgĩa na gĩathĩ kĩrĩa gĩĩtagwo Gĩathĩ gĩa Ithũnũ, o ta ũrĩa kwandĩkĩtwo, makĩruta mahaki ma njino ma mũthenya o mũthenya, o ta ũrĩa mũigana wamo watuĩtwo, o ta ũrĩa mũtugo wa kũrũmĩrĩrũo watariĩ, o na ta ũrĩa ũtungati wa mũthenya o mũthenya waagĩrĩire;
• 5. na thutha wa ũguo gũgacoka kũrutwo ihaki rĩa njino rĩa gũtũũra rĩrutagwo hĩndĩ ciothe, o na magongona ma karũgamo-inĩ ka mĩeri, o na ma ciathĩ ciothe iria ciamũrĩirũo Jehova, o na ma mũndũ o wothe ũrĩa warutagĩra Jehova kĩndũ na kwĩendera.
• 6. Nao maambĩrĩirie kũrutĩra Jehova mahaki ma njino kuuma o mũthenya wa mbere wa mweri wa mũgwanja; no rĩrĩ, gĩtina kĩa hekarũ ya Jehova gĩtiaakĩtwo.
• 7. O na ningĩ makĩhe aaki mbia, o na atharamara; o nao andũ a Zidoni o na a Turo makĩmahe irio, o na gĩa kũnyua, o na maguta, nĩguo matwarage mĩtarakwa hũgũrũrũ-inĩ cia iria o kũu Jopa mamĩrutĩte Lebanoni, o ĩrĩa metĩkĩrĩtio kũruta nĩ Kurusu, mũthamaki wa Perisia.
• 8. Na rĩrĩ, mwaka wa kerĩ ũrĩa maakorirũo macokete nyũmba ya Ngai o kũu Jerusalemu, o mweri wa kerĩ waguo-rĩ, Zerubabeli wa Shealitieli, na Jeshua wa Jozadahu, o na ariũ a ithe wao arĩa angĩ, o arĩa athĩnjĩri-Ngai na Alawii, o na andũ othe arĩa moimĩte kũrĩa maatwarirũo maatahwo magacoka Jerusalemu, makĩambĩrĩria mwako wa nyũmba ya Jehova, nao magĩgĩtua Alawii, arĩa maakinyĩtie mĩaka mĩrongo ĩĩrĩ na magakĩria hau, arori a wĩra ũcio.
• 9. Hĩndĩ ĩo Jeshua na ariũ ake, o na ariũ a ithe, na Kadimieli na ariũ ake, nĩo ariũ a Juda, makĩĩheana na ngoro ĩmwe matuĩke arori a andũ arĩa maarutaga wĩra nyũmba-inĩ ya Ngai; o nao ariũ a Henadadi na ariũ ao, na ariũ a ithe wao, Alawii, maarĩ o ho.
• 10. Na rĩrĩ, hĩndĩ ĩrĩa aaki maakire gĩtina kĩa hekarũ ya Jehova-rĩ, makĩrũgamia athĩnjĩri-Ngai ho mehumbĩte nguo ciao me na tũrumbeta, hamwe na Alawii, ariũ a Asafu, me na thani iria ihũrithanagio ikagamba, nĩguo magooce Jehova o ta ũrĩa Daudi, mũthamaki wa Isiraeli, aathanĩte gwĩkagwo.
• 11. Nao magĩkĩinanĩra o mũndũ na mũndũ ũrĩa ũngĩ, makĩgatha Jehova, makĩmũcokagĩria ngatho, makiugaga ũũ: Nĩ ũndũ nĩ mwega, nĩ gũkorũo tha ciake iria aiguagĩra Isiraeli itũũraga tene na tene. Nao andũ othe makĩanĩrĩra rĩanĩrĩra inene mũno hĩndĩ ĩo maagoocaga Jehova, nĩ ũndũ gĩtina kĩa nyũmba ya Jehova nĩgĩaakĩtwo.
• 12. No rĩrĩ, hĩndĩ ĩo gĩtina kĩa nyũmba ĩo ya kerĩ gĩaakagwo-rĩ, andũ aingĩ arĩa maarĩ akũrũ thĩinĩ wa athĩnjĩri-Ngai o na Alawii, o na anene a nyũmba cia maithe ma andũ acio, o arĩa monete nyũmba ĩrĩa ya mbere, mona ĩo ya kerĩ, nĩ kũrĩra maarĩrire na mĩgambo mĩnene; nao andũ angĩ aingĩ makĩanĩrĩra mũno nĩ ũndũ wa ũrĩa maakenete.
• 13. Na tondũ ũcio andũ matiigana gũkũũrana rĩanĩrĩra rĩa gĩkeno o na rĩa andũ acio maarĩraga; nĩ gũkorũo andũ nĩmaanagĩrĩra rĩanĩrĩra inene mũno, narĩo inegene rĩu rĩkĩiguwo kũndũ kũraya.

Home