Go Back

Ezara Chapter 1

• 1. NA RĨRĨ, mwaka wa mbere ũrĩa Kurusu, mũthamaki wa Perisia, aakorirũo athamakĩte-rĩ, Jehova akĩarahũra roho wa Kurusu, ũcio mũthamaki wa Perisia, nĩ getha ũhoro wa Jehova ũrĩa waaririo na kanua ka Jeremia ũhingio, agĩgĩtũma ahunjanĩrie ũhoro mabũrũri mothe marĩa aathamakaga, o na awandĩke, oige ũũ:
• 2. Atĩrĩrĩ, Kurusu, mũthamaki wa Perisia, oiga ũũ: Jehova, Ngai wa igũrũ, nĩa’heete mabũrũri mothe ma gũkũ thĩ ndĩmaathage; na nĩanjathĩte ngamwakĩre nyũmba Jerusalemu, itũũra rĩa Juda.
• 3. Tondũ ũcio, mũndũ o wothe wa andũ ake ũrĩa wĩ thĩinĩ wanyu-rĩ, Ngai wake aroikara hamwe nake, nake nĩaambate athiĩ Jerusalemu, kũu Juda, agaakĩre Jehova, Ngai wa Isiraeli ũrĩa ũrĩ kũu Jerusalemu, nyũmba yake, (tondũ nĩwe Ngai wa ma).
• 4. Na rĩrĩ, mũndũ o wothe ũrĩa ũtigarĩte kũndũ o na kũrĩkũ kũrĩa atũũrĩte arĩ mũgeni-rĩ, nĩateithio nĩ andũ akuo, aheo betha, na thahabu, o na indo ingĩ, o na ũhiũ, hamwe na indo iria mangĩruta na kwĩendera ikoniĩ nyũmba ya Jehova ĩrĩa ĩrĩ o kũu Jerusalemu.
• 5. Hĩndĩ ĩo hagĩgĩũkĩra anene a nyũmba cia maithe ma andũ a Juda na Benjamini, o na athĩnjĩri-Ngai, o na Alawii, o andũ othe arĩa Ngai aarahũrĩte ngoro ciao nĩguo maambate magaake nyũmba ya Jehova kũu Jerusalemu.
• 6. Nao andũ othe arĩa maamaikarĩte na ndwere ciothe makĩmekĩra hinya makĩmahe indo cia betha, na thahabu, o na indo ingĩ, na ũhiũ, o na indo cia goro, makĩria ma iria ciothe maarutaga na kwĩendera.
• 7. Ningĩ Kurusu, ũcio mũthamaki, akĩrutithia indo cia nyũmba ya Jehova, iria Nebukadinezaru aatwarithĩtie kuo acirutĩte Jerusalemu, agaciĩkĩra nyũmba ya ngai ciake,
• 8. nacio indo icio-rĩ, Kurusu, mũthamaki wa Perisia, agĩathana akiuga irutwo nĩ Mithiredathu, mũigi mũthithũ, nake agĩcitarĩra Sheshibazaru, mũtongoria wa andũ a Juda.
• 9. Naguo mũigana wacio nĩ ũyũ: nĩ thani nene mĩrongo ĩtatũ cia thahabu, o na thani ingĩ nene ngiri ĩmwe cia betha, na hiũ, mĩrongo ĩĩrĩ na kenda,
• 10. na tũbakũri mĩrongo ĩtatũ twa thahabu, o na tũbakũri twa mũthemba ũngĩ twa betha magana mana na ikũmi, o na indo ngiri ĩmwe cia mĩthemba ĩngĩ.
• 11. Indo icio ciothe cia thahabu na cia betha ciarĩ ngiri ithano na magana mana igĩtarũo. Nacio indo icio ciothe-rĩ, nĩcio Sheshibazaru aambatithirie hĩndĩ ĩrĩa andũ arĩa maatahĩtwo maambatagio makĩrutwo Babuloni, macokio Jerusalemu.

Home